Read Zou EZRA 9 Bible Online

EZRA 9 - Zou bible

EZRA 9

¹Tam thu teng a kisep zaw ciengin uliente in keima kungah ei nai vua, “Israel mite, siempute, le Levi-te in khum gama mipi kidah ahi Canaan-te, Hit-te, Perez-te, Jebus-te, Ammon-te, Moab-te, Egypt-te, le Amor-te kung panin amau le amau a kituomkoih sih uhi.

²Azieh pen amahaw’ tanute pawlkhat amate ding le a tapate vua dingin zi-in a la vua, tua bangin a siengtho cihlahte pen tua gam sung mite tawh a kisisawhal ta vua, tami citah lona-ah uliente le lamkaite makai ahi hi,” ei ci uhi.

³Tami thu ka zah bepin ka puonte balkehin ka sam le ka khamul ka bot a, ci ding mel thei loin ka mawh to hi.

⁴Tua ciengin saltang kilekiate’ citah lona ziehin Israel Pasien’ thugen a zau-in a citun zosie keima kungah ang kikhawm vua, nitah biehpiehna hun dongin ci nading mel thei loin ka mawh to hi.

⁵Nitah biehpieh hunin ka antanna pana ka sil ka puontuol kibalkeh kawm pi-in tho-in ka khupdin a, TOPA Pasien lamah ka khut ka zah a,

⁶tuale, “Ka Pasien aw, ka khielnate uh ka lu uh sangin sang zaw a, ka mawnate un vantung dong banto ta ahi ziehin ka zum sengin kang mai ngat ngam sih hi.

⁷Ka pu ka pate uh’ khanga patin tuni dong ka khielna uh lien mama hi. Ka khielnate ziehun gamdang kumpite’ khut sungah kote, ka kumpite ule ka siempute uh kipie-in, namsau tawh sina, saltanna, neisa kisutna, le maizumna ci bangin ka na thuoh vua, tu dongin ka tuaci lai uhi.

⁸Ahi vangin tu bano khat sungin TOPA ka Pasien un kote ei angvan a, a suohta pawlkhat ei omsahin ama in[16] ka mit uh ei vahsah a, ka saltanna vuah husanna themno khat ei pieh thei nadingin a mun siengtho sungah pansia det khat ei pie zo hi.

⁹Azieh pen kote sila ka hi vua, hinanle ka saltanna vuah ka Pasien un ei nuasie loin ka Pasien uh’ biehinn a dinkia nading, a kisie teng a kipuophat nading, Judah le Jerusalem ah kulpite ei pieh thei nading, le hinkhuo tha ei pieh thei nadingin ama in Persia kumpite’ mai-ah a itna kip ei pie zo hi.

¹⁰“Tuale tu-in kote’ Pasien aw, tam zaw ciengin bang gen nawn ding uh ka hei? Bangzieh ahei cile na thupiehnate ka taisan ta vua,

¹¹na nasem kamsangte tungtawnin kote kungah, ‘Na luo ding vua na va lut nading uh gam pen a gam mite in a kidahhuoi amau’ gamtatna tawh a buasah uh a sieng lo gam ahi hi. A gam sung uh mong khat pan mong khat dongin amau’ sientho lona tawh a kidimsah uhi.

¹²Tua ahi ziehin a tanute ule na tapate uh kinungsah sih unlen, na tapate’ uh zi dingin a tanute la sih un. A nopsahna ding uh hile, a maavan nading uh hile hasui pieh sih un. Tua bang hi leh thahatin tua gam sunga a piengte na ne ding vua, kum tawna na tate uh’ luo dingin tua gam na nuasie pieh thei ding uhi,’ ci-a nei thupiehnate ka zui sih uhi.

¹³Ka sil hoilo bawlte ule a lien mama ka khielnate uh ziehin tam bang gimna zosie ka tung vua ang tun zaw ciengin, ka Pasien un ka thuoh ding vua a kilawm kohaw’ mawna paat sanga a tawmzaw gimna nei thuohsah a, a suohta le a omlai teng tam bangin themkhatin nei koi hi;

¹⁴na thupiehnate kote in palsatkia-in, tami a kidahhuoi nate a bawl mite tawh kiteng kipikia ding ka hi uh amah? A omlai le a suohta koima a op nawn lo dongin ka tung vuah nang hing lungthahin ei susie lo ding na mah?

¹⁵Israel Pasien, TOPA aw, nang khu na thutang a, ahi vangin tu-a bangin a suohta a omlai dingin kote nei bawl hi. Tami ziehin koima in nang ang maingat ngam lo vangin na mai-ah ka khielna pi ma utawh kang ding uhi,” ci-in thu ka ngen hi.