Read Zou NEHEMIAH 13 Bible Online

NEHEMIAH 13 - Zou bible

NEHEMIAH 13

¹Khum ni-in amate in mipite’ zahin Moses’ thukham laibu a sim uhi; tuale Pasien’ mite kikhopna sungah Ammon-te le Moab-te a lut thei ngai lo nading uh a kigiel lai kimu hi,

²azieh pen amate in an le tui tawh Israel-te na lamdot loin amate a gausam dingin Balaam na ciel zawsop uhi. Ahi vangin kohaw’ Pasien in tua awsie teng thupha-in ei heipieh hi.

³Mipite in tua thukham a zah ciengun Israel sung panin gamdang suon zosie a tuomkhen uhi.

⁴Khum hun masangin eite’ Pasien’ innpi sunga vankholna inndeite uh dinga kise Tobiah tawh a kithei siempu Eliashib in,

⁵tu masang lai-in Levi-te, lasate le tunkot cingte tunga a thupieh tawh kizui-a kipie ding ahi an tawh biehna, gimnamtui, vanzahte, sawm-ah-khat a kipie an, lenggazu, sathau, le siempute dinga a kipie nate koina dinga kizang innkhan golpi khat, Tobiah adingin na bawlpieh hi.

⁶Babylon Kumpi Artaxerxes in a uh zaw a kum sawmthum le nina kumin ama kunga ka hawziehin tam thu a pien hunin Jerusalem ah kei ka om kha sih hi. Keima in bakhat zaw ciengin kumpipa tung panin phalna ka ngen a,

⁷tuale Jerusalem ah ka peikia hi. Tua ciengin keima in Tobiah adingin Pasien biehinn huong sungah Elishiab in inndei khat a na bawlpiehna thu, a sil hoi lo bawlte ka va mukhie ta hi.

⁸Tuale ka lung a thah mama a, inndei sung panin Tobiah’ van zosie ka paimang sieng hi.

⁹Tua ciengin keima in thu pie-in, amate in inndeite a siensuo vua, tua sungah Pasien’ biehinn vanzahte, an tawh biehna le gimnamtuite ka koikia hi.

¹⁰Levi-te’ tanh dinga kisete amate tungah kipie lo ahi ziehin a lo ciet vuah Levi-te le lasate a kuonkia ta uhi, ci thu zong keima in ka va thei kha ta hi.

¹¹Tuaci’n uliente tungah ka lung a kim sih a, “Bang dinga Pasien’ innpi kinuasie dawh ta ahei?” ka ci hi. Tuale keima in amate ka kaikhawm a, a mun ciet vuah ka koikia hi.

¹²Tua ciengin Judah zosie in antang, lenggazu le sathau sung panin sawm-ah-khat hing peipi-in vankoina innte-ah ang tut uhi.

¹³Tuale keima in vankoina innte a kem dingin siempu Shelemiah, laithei Zadok, le Levi-te Pedaih, le amate a hu dingin Mattaniah’ tapa Zaccur, a tapa Hanan-te ka se hi, bangzieh ahei cile amate pen mi muonhuoite-in kingaisun hi; tuale amau’ sep ding tavuon pen a kithuopite tungah neh le dawn hawmpieh ding ahi hi.

¹⁴Aw, ka Pasien, tami thu tawh kisai-in keima ei phawh inlen, ka Pasien’ innpi le ama’ nasepna dinga ka bawl na hoite ei suhmangpieh sin.

¹⁵Khum hun lai-in keima in Judah mite sungah sabbath ni-in lenggazu suhin, buphaite khawmin, laa tunga a van guon ule sabbath ni-in laa tungah lenggazu, lengga, theiba gate, le van namcin zong guongin Jerusalem-a ang puoh uh zong ka mu hi; tuale khum ni-in a anzua uh a hoi lona thu amate tungah ka gen hi.

¹⁶Khuopi sunga teng Tyre-te in zong ngasa le van namkim ang puo vua, sabbath ni-in tuate Judah mite tung le Jerusalem-ah a zua uhi.

¹⁷Tua ciengin Judah mi thupite tungah ka lung a kim sih a, amate kungah, “Sabbath ni buasah a, tami sil hoi lo na bawlte uh bang ahiei?

¹⁸Na pu na pate uh tam banga a na gamtat ziehun i Pasien in eite tung le tam khuopi tungah tam bang gimna zosie ang tunsah hi lo amah? Tua hi napi-in note in sabbath buasahna tawh Israel tungah lungthahna na tut be uhi,” ka ci hi.

¹⁹Sabbath masang, Jerusalem tunkotte-ah khuo mut patin kotpite a kikhah nadingin ka sawl a, sabbath tawp zaw masangsie a kihon lo nadingin thu ka pie hi. Keima in sabbath ni-a ang kipuo van poma a lut thei lo nadinga a khaam dingin tunkot tengah ka nasemte pawlkhat ka pangsah hi.

²⁰Tua ciengin sumbawlte le van namkim zuate khatvei ni vei Jerusalem pulamah a gieh uhi.

²¹Ahi vangin keima in amate ka phawhsie a, a kung vuah, “Bang dinga kulpi mai-a gieh na hi uh ahei? Nang giekia poma uleh kang dopbawl vawt sih ding hi,” ka ci hi. Tua huna kipan sabbath ni-in amate ang pei nawn sih uhi.

²²Siengtho tahin tua sabbath a kitan thei nadingin a kisiensuosa-in amate pei-in tunkot teng a cin nadingun Levi-te thu ka pie hi. Ka Pasien aw, tam thu-ah zong nangma in nei angvanna tawh keima ei phawh inlen, a lien mama na itna kip dung zui-in kei ei pengsah in.

²³Khum hun lai-in keima in zong Ashdod, Ammon, le Moab numeite tawh a kinung Jew mite ka mu hi;

²⁴tuale a tate uh alang in Ashdod ham a zang vua, tuale amate in Judah ham zang thei loin minam tuomtuomte’ ham a zangzaw uhi.

²⁵Amate phawhsie-in ka samsie a, pawlkhat vuo-in, pawlkhat a sambung vuah ka luoi gawp hi; tuale keima in Pasien’ min tawh amate ka kiciemsah a, “Na tanute uh a tapate uh’ zi dingin na pie sih ding vua, a tanute uzong noma le na tapate’ zi dingin na la poma sih ding uhi.

²⁶Tua bang numeite ziehin Israel Kumpipa Solomon khiel hi lo amah? Minam tampite lahah ama tawh a kibang kumpi khat zong om loin, a Pasien in ama it a, Israel zosie tungah kumpi dingin Pasien in ama koi hi; ahi vangin gamdang numeite in ama nangawn a khielsah uhi.

²⁷Tua ahile gamdang numeite tenpina ziehin tami sietna lienpite zosie bawlin ka Pasien tung vua a zuoutat dingin kote in na thu ngai ding ka hi uh amah?” ka cisah hi.

²⁸Tuale siempu lien pa Eliashib’ tapa Jehoiada’ tapate khat pen Horon-te Sanballat’ mahpa na hi hi; keima in ka kung panin ama ka delmang hi.

²⁹Ka Pasien aw, amate in siempu nasepna le siempute le Levi-te’ thuciemna a buasah ziehun amate na thei ta’n.

³⁰Tua bangin gamdang tawh a kizom nate zosie panin amate ka siensuo a, siempute le Levi-te a nasep ngai ma vuah ka semsahkia hi;

³¹tuale a kise hun cienga vah ding sing tawh biehna le anpal tawh biehna ding zong ka vaihawmpieh hi. Ka Pasien aw, a hoi lamin ei phawh bo in.