Read Zou NEHEMIAH 2 Bible Online

NEHEMIAH 2 - Zou bible

NEHEMIAH 2

¹Kumpi Artaxerxes in a uh zaw a kum sawmnina Nisan hla-in, lenggazu pieh ding hun ciengin lenggazu tawi-in kumpipa ka pie hi. Ni dangin ama mai-ah damai-in ka om ngai sih hi.

²Tuaci’n kumpipa in keima kungah, “A cina lah hi lo bang dinga damai na hei? Na dana khat om hi ngel ding hi,” ei ci hi. Tua ciengin zau citahin ka zau hi.

³Keima in kumpipa kungah, “Kumpipa hing denden in! Ka pu ka pate kivuina han opna mun ahi khuopi kisie-in a tunkotte zong mei in katum sieng ta ahi ziehin damai lo-in bangci op thei ding ka hei?” ka ci hi.

⁴Tua ciengin kumpipa in keima kungah, “Bang ngen nuom na hei?” ei ci hi. Tuaci’n keima in vantung Pasien kungah thu ka ngen hi.

⁵Tua ciengin keima in kumpipa kungah, “Kumpipa na lung a kim a, na nasempa in na maipha ka mu khah leh, ka pu ka pate’ han opna khuopi ka va lamkia thei nadingin Judah gamah ei hawsah in,” ci-in ka ngen hi.

⁶Kumpipa in (kumpinu zong a gei-ah a to hi) keima kungah, “Pei lacin bang tanvei va tham ding a, bang huna hing kilekia ding na hei?” ei ci hi. Tuaci’n kumpipa in ka pei ding ei lungkimpi a, kei zong hun khat ka se hi.

⁷Tua ciengin keima in kumpipa kungah, “Kumpipa na thukim leh, Judah gam ka tun masangsie amate in ei peisah thei nadingun Gungal gamkhen a uhte ka pieh ding laihlahte ei puosah in;

⁸tuale kumpipa’ gammang tulah kempa Asaph in biehinn kulpi tunkot zawlte, khuopi kul le keima’ inn lam nading sing ei pieh nadingin thupiehna lai zong ei puosah in,” ka ci hi. Keima tungah hepi siem ka Pasien’ khut om ahi ziehin kumpipa in ka nget teng ei pie hi.

⁹Tua ciengin Gungal gamkhen a uhte kungah ka tung a, keima in kumpipa’ laihlahte amate ka pie hi. Kumpipa in galkapmangte le sakol galkapte kei ei hlasah hi.

¹⁰Horon-te le Sanballat le Ammon milien Tobiah-te in Israel mite’ phattuomna sem dingin mi khat ang pei hi, ci thu a zah ciengun nahpitahin lungkim lo uhi.

¹¹Tuaci’n Jerusalam ah ka tung a, ni thum sung ka tam hi.

¹²Tua ciengin zanin keima le ka zawpi mi tawmno khatte tawh ka tho hi; Jerusalem adinga ka bawlpieh ding ka Pasien in ka lungsim sunga ei guot thute koima kungah ka gen vawt sih hi. Keima tuonna ganhing sim lo ganhing dang ka zawpi sih hi.

¹³Zanin Kuom Tunkot panin pusuohin Gulpi Tuikhuh le Buathah Tunkot lamah ka pei a, a kicimsa Jerusalem kulpi teng le mei in a kahtumsa a tunkotte ka va en ta hi.

¹⁴Tua ciengin Tuinah Tunkot le Kumpipa’ Buol dong ka peisuoh hi; ahi vangin ka tuonna ganhing pei thei nading mun a om sih hi.

¹⁵Tuaci’n kuom lampi tawnin zan lai-in khuopi kul ka vel hi. Tua ciengin ka kinuahei a, Kuom Tunkot ah lutin ka kilekia hi.

¹⁶Kei hei-ah pei-in bang teng bawl ka hei, ci uliente in ei thei sih uhi; keima in na sem dingte ahi Jews-te, siempute, mi thupite, uliente le adangte kungah ka vai ka gen nai sih hi.

¹⁷Tua ciengin amate kungah, “Tam mun a i lungkhamna thu na thei uhi. Jerusalem a kisusie ta a, a tunkotte zong mei in a katum ta hi. Hing pei un, zakona i thuoh nawn lo nadingin Jerusalem kulpi ciengpha kia vai,” ka ci hi.

¹⁸Keima in ka tunga ka Pasien in ang bawl hepina le kumpipa in ka tunga ang gen thute amate kungah ka gen hi. Tua ciengin amate in, “Nasep kipan pai vai!” ei ci uhi. Tuaci’n amate zong tangpi phattuomna dingin a kipumpieh uhi.

¹⁹Hizongle Horon-te Sanballat, Ammon milien Tobiah, le Arab-te Geshem in tua thu a zah ciengun amate in, “Tami na sil bawl uh bang ahei? Kumpipa ledo sawm na hi uh amah?” ci-in simmawna tawh ei ehneh ho uhi.

²⁰Tua ciengin keima in amate kungah, “Lawcinna ei guon ding pen vantung Pasien ahi a, tuale ko ama’ nasemte in nasep ka kipan ta ding uhi; hinanle note in Jerusalem ah tanh ahi a, nget ding ahi a, tangthu lam panin ahi zongin nga ding hamphatna bangma na nei sih uhi,” ci-in ka dawngkia hi.