Read Zou NEHEMIAH 3 Bible Online

NEHEMIAH 3 - Zou bible

NEHEMIAH 3

¹Tua ciengin siempu lien pa Eliashib in a siempu seppite tawh Tuu Tunkot a bawlpha uhi. Amate in siensuo-in a kotkhahte a bul vua, Zakhat Tausang cieng dong le Hananel Tausang cieng dong a siensuo uhi.

²Tuale ama’ zomah Jericho mite in lam uhi. Amate[1] zaw ciengin Imri’ tapa Zaccur in lam hi.

³Hassenaah’ tapate in Nga Tunkot a lam uhi; amate in a zawlte a hlung vua, tuale a kotkhahte, a kotgolhte a siatunte a bul uhi.

⁴Amau’ zomah Hakkoz’ tapa Uriah, a tapa Meremoth in puo hi. Amate zaw ciengin Meshezabel, a tapa Meshullam in puo hi. Amate zaw ciengin Banna’ tapa Zadok in puo hi.

⁵Amate zomah Tekoa-te in a puo uhi; ahi vangin a TOPA[2] uh’ nasepna-ah a miliente uh a hapan nuom sih uhi.

⁶Tunkot Lui pen Paseah’ tapa Joiada, le Besodeiah’ tapa Meshullam in a puo uhi; amate in a zawlte a hlung vua, a kotkhahte, a kotgolhte, le a siatunte a bul uhi.

⁷Amate zomah Gibeon-te Melatiah le Meronoth-te Jadon in Gungal gamkhen a uhpa’ thuneina[3] sunga a om Gibeon-te le Mizpah-te tawh a puo uhi.

⁸Amate zomah khamkhengte khat ahi Harhaiah’ tapa Uzziel in puo hi. Ama zomah sathau namtui bawlte khat ahi Hananiah in puo hi; tuale amate in Kulpi Lien dongin Jerusalem a ngai a bangsah kia uhi.

⁹Amahaw zomah Jerusalem gam phalkhat[4] a uh Hur’ tapa Rephaiah in puo hi.

¹⁰Amate zomah Harumaph’ tapa Jedaiah in ama’ inn tawh kimaingat son teng puo hi; tuale ama zomah Hashabneiah’ tapa Hattush in puo hi.

¹¹Harim’ tapa Malchijah le Pahath-moab’ tapa Hasshub in Meikhuh Tausang le khawh dang khat puo uhi.

¹²Ama zomah Jerusalem phalkhat[5] a uh Hallohesh’ tapa Shallum le a tanute in puo uhi.

¹³Hanun le Zanoah-a tengte in Kuom Tunkot a puo uhi; amahawn a zawlte a hlung vua, a kotkhahte, a kotgolhte, le a siatunte a bul uhi, tuale kulpi tong tulkhat sung Buathah Tunkot dong a puo uhi.

¹⁴Beth-haccherem gam phalkhat[6] a uh Rechab’ tapa Malchijah in Buathah Tunkot puo hi; ama in a kotkhahte, a kotgolhte, le a siatunte a bawlphakia hi.

¹⁵Tuale Mizpah gam[7] a uh Col-hozeh’ tapa Shallum in Tuinah Tunkot puo hi; ama in tua tunkot bawlpha a, a tung khu-in a kotkhahte, a kotgolhte, le a siatunte bul hi; tuale ama in kumpipa’ um sunga om Shelah buol kulpi zong David’ khuopi pana kidawsuh kalei dongin bawl hi.

¹⁶Ama zomah Beth-zur gam phal langkhat[8] a uh Azbuk’ tapa Nehemiah in David’ han tawh a kimaingat mun panin a kisiemthu tuikhuh le galhangte’ inn dong a puo hi.

¹⁷Ama zomah a puo Levi mite: Bani’ tapa Rehum; ama zomah Keilah gam phal langkhat[9] a uh Hashabiah in ama’ gam tangin a puo hi.

¹⁸Ama zomah a puo a unaute: Keilah gam phal langkhat[10] a uh Henadad’ tapa Binnui;[11]

¹⁹ama zomah Mizpah uhpa[12] Jeshua’ tapa Ezer in Kulning-a galvan kikoina katona tawh a kimaingat khawh dang khat puo uhi.

²⁰Ama zomah Zabbai’ tapa Baruch in Kulning panin siempu lien pa Eliashib’ inn kotkhah dong puo hi.

²¹Ama zomah Hakkoz’ tapa Uriah, a tapa Meremoth in Eliashib’ inn kotkhah panin innmong dong puo hi.

²²Ama zomah a kim a pam-a om siempute in puo uhi.

²³Amate zaw ciengin Benjamin le Hasshub in ama gel’ inn tawh a kimaingat teng puo uhi. Ama gel zaw ciengin Ananiah’ tapa Masseiah, a tapa Azariah in a inn tawh a kimaingat teng a puo hi.

²⁴Ama zaw ciengin Henadad’ tapa Binnui in mun tuomdang khat, Azariah’ inn panin Kulning dong puo hi.

²⁵Uzai’ tapa Palal in Kulning tawh a kigalsaina mun teng le kumpipa’ inn pana a dawhkhie, zumcingte’ opna tausang tungnung teng puo hi. Ama zomah Parosh’ tapa Pedaiah in puo hi.

²⁶Ophel tunga a teng[13] biehinn nasemte in ni suona lam, Tui Tunkot tawh a kimaingat teng le tausang dawh puo uhi.

²⁷Ama banah Tekoa-te in tausang dawhpi tawh a kimaingat teng le Ophel kulpi dong puo uhi.

²⁸Sakol Tunkot tung son teng ahile siempute in a inn ciet utawh a kimaingat teng a puo uhi.

²⁹Amahaw zomah Immer’ tapa Zadok in ama’ inn tawh a kimaingat son teng puo hi. Ama zomah Shecaniah’ tapa, Nisuona Kotcingpa Shemaiah in a puo hi.

³⁰Ama zomah Shelemiah’ tapa Hannaniah, Zalaph’ tapa guhna Hanun in khawh dang khat a puo uhi. Ama zomah Berechiah’ tapa Meshullam in ama’ lupna khan tawh a kimaingat son teng puo hi.

³¹Ama zaw ciengin khamkhengte khat ahi Machijah in biehinn nasemte’ inn le sumbawlte’ inn cieng, le Kikhopna Tunkot[14] tawh a kimaingat son teng, le Kulning inndan tungnung cieng dong puo hi.

³²Kulning inndan tungnung le Tuu Tunkot kikal pen khamkhengte le sumbawlte in puo uhi.