Read Zou NEHEMIAH 4 Bible Online

NEHEMIAH 4 - Zou bible

NEHEMIAH 4

¹[15]Tu-in ka kulpi cien lam uh Sanballat in a zah ciengin lungthah mama a, ama in Jews-te a zako gawp hi.

²Ama in ama’ kithuopite le Samaria galkapte mai-ah, “Tua Jew miginalote bang bawl uh ahei? Amate in nate a puophat sawm uh amah? Biehpiehna bawl ding ahi uh amah? Ni khat thu-in a man zo ding uh amah? Buathah lom lah panin a kavamsa suongte la-in puokia ding ahi uh amah?” a ci hi.

³Ama’ gei-a om Ammon-te Tobiah in, “A cien uh suongte tungah ngie khatpo kato leh cimsuh pai lel ven!” a ci hi.

⁴Kote’ Pasien aw, ei ngai in; azieh pen kote ei kisimmaw hi; amau’ ei kosietna teng amau’ lutung ma-ah tusah inlen, saltanna gam khatah mite’ tomgam dingin amate piedawh ta’n.

⁵Amau’ khielna khupieh sinlen, na muna panin amau’ mawna phietmang sin; bangzieh ahei cile amate in kulciengte mai-ah kote ei zako uhi.

⁶Tuaci’n kote in kulpi ka ciengpha kia vua, tuale kulpi buppi’ a sanna alang cieng kizo hi; azieh pen mite in kinna lungsim a nei uhi.

⁷[16] Ahi vangin Sanballat, Tobiah, le Arab-te, Ammon-te, le Ashdod-te in Jerusalem kulpite cienphatna nasep kizom suohin, kulvang teng huhbih ding kipan zo hi, ci a zah ciengun a lungthah mama uhi.

⁸Amate a unpi-un a kuon vua, tuale Jerusalem simin a sungah a buoisah sawm uhi.

⁹Tuaci’n kohawn zong ka Pasien uh kungah thu ka ngen vua, amate a dal dingin sun le zanin galvil ka koi uhi.

¹⁰Ahi vangin Judah in, “Van puo mite a tha uh a zaw gawp ta hi, buathah lah a tam ta mama a, tuaci’n kote in kulpi ka cieng zo nawn sih uhi,” ei ci hi.

¹¹Tuale ka galte un, “A thei lo kalun ei mu masangun amate kungah va pei-in i va that ta ding a, a nasep uh i dinkhawlsah ding hi,” ei ci uhi.

¹²Amau’ gei-a teng Jew mite ang pei ciengun amate in ko kungah, “Kote ei sim dingin a tenna[17] uh mun zosie panin ang kuonto ding uhi,” ci-in sawmvei vilvel ei gen uhi.[18]

¹³Tuaci’n keima in kulpi nualam mun ngiem penna mun-awng tengah a namsau uh, a teipi ule a thal utawh a innkuon kuonun[19] ka pangsah hi.

¹⁴Tam teng ka van zaw ciengin mi thupite, uliente le a omlai mite kungah, “Amahaw giing sih un. Na sanggamte, na tapate, na tanute, na zite ule na innte uh adinga ang do pieh, a lien le a giinhuoi TOPA phawh un,” ka ci hi.

¹⁵Ka galte’ ei sawmna teng kote in ka thei lam ule Pasien in amau’ gelna teng a susiet zo lam amate in a zah ciengun, ka unpi-un ka nasepna uh kulpi cietah ka kuonkia uhi.

¹⁶Khum ni-a kipanin ka nasemte alang in na semin, alang in teipite, lumte, thalpite, le awmdalte a tawi uhi; tuale Judah innkuon buppi’ nua-ah makaite a pang uhi.

¹⁷Kulpi-a cien ding van a nawn mite in a khut langkhat utawh a van puoh uh tu-in a khut langkhat utawh galhiem a tawi vua, tua bangin na a sem uhi.

¹⁸Tuale innlamte in a nasep pumun a kawng vuah namsau a kuo uhi. Ka gei-ah pengkul mut pa a om hi.

¹⁹Tuale keima in mi thupite, uliente, le adang mite kungah, “Nasepna lienin zaipi tah a huom a, kulpi tungah eite khatlekhat kikhenin gamlapi i kihal uhi.

²⁰Tuaci’n pengkul aw na zah ciengun ka kungah hing kikhawm un. I Pasien in eihaw adingin gal ei dopieh ding hi,” ka ci hi.

²¹Tuaci’n na ka sem vua, amate alang in phalvah panin aasi suo dongin teipi a tawi uhi.

²²Khum hunin keima in zong mite kungah, “Zanin galvilin sunin na a sep thei nadingun mi zosie a nasemte ciet utawh Jerusalem ah hing gieh ta un,” ka ci hi.

²³Tuaci’n keima hileng, ka sanggamte hile, ka nasemte hile, ka nua ei zuite keima ei cingte in hile, ka puon uh ka suo man ngai sih uhi; mi khat cietin a khut ziet lamah a galhiem a tawi hi.[20]