Read Zou NEHEMIAH 5 Bible Online

NEHEMIAH 5 - Zou bible

NEHEMIAH 5

¹Tu-in mite le a zite un a unau uh Judah mite tungah lungkim lona lienpi khat a gingsah uhi.

²Azieh pen mi pawlkhat in, “Ka tanute ule ka tapate utawh ka kunta mama uhi; kote in an ne-in ka hin thei nadingun an ka sui uh kul hi,” a ci uhi.

³Pawlkhat in zong, “Kote in kiel hun sungin an lei nadingin ka lote uh, ka lengga umte ule ka innte uh vankhapin ka pieh uh kul ding hi,” ci uhi.

⁴Tuale mi pawlkhatte in, “Kumpipa’ sieh pieh dingin ka lote ule ka lengga umte uh khamin sum ka palah uhi,” a ci uhi.

⁵Ko pen ka unaute utawh si khat sa khat ka hi uhi; ka tate uzong amau’ tate ma bang ahi uhi; hinanle ka tapate ule ka tanute uh nuom lopipi-in sal dingin ka pausawl mawh vua, tuale ka tanute uh pawlkhat ei na kisuhthangpieh zo ta hi; ka lote ule ka lengga umte uh midangte’ neisa suoh ta ahi ziehin tuate tat nading bangma ka bawl zo sih uhi,” ei ci uhi.

⁶Keima in a kikona ule tam bang phunnate ka zah ciengin ka lung thah mama hi.

⁷Keima in tam thu tungtang ka lungngai zaw ciengin, mi thupite le uliente ka mawsah hi; tuale keima in amate kungah, “Nohaw zosie in na unaute uh tungah sum met na la uhi,” ka ci hi. Tua thu teng kaituo nadingin keima in kikhopna thupi khat ka hlan a,

⁸tuale amate kungah, “Minam dangte’ khut sungah sala kizuasa Judah i unaute i hi zawhna za utawh i tankia vua, hizongle tu-in note in na zua uh na mipite i tatkia lo uh a phamaw ahi hi!” ka ci hi. Gen ding thei loin amate a sip dide uhi.

⁹Tuaci’n keima in, “Na sil bawl uh pen a hoi vawt sih hi. Eite in i galte ahi minam dangte’ zakona i thuoh lo nadingin i Pasien zatahna tawh na gamtat ding uh kilawm hi lo amah?

¹⁰Tua tham loin, keima le ka sanggamte, le ka nasemte in amate sum le an ka palahsah uhi. Tami a met lahna mawngmawng khawlsah va vui.

¹¹Tuni mama-in amate kung pana na lahpiehsa teng uh: a lo, a lengga um, olive um, a innte ule a met tawh na lah uh sum, an, lenggazu, le sathaute amate tungah piekia un,” ka ci hi.

¹²Tua ciengin amate in, “Tua teng zosie ka piekia ding vua, amate kung panin bangma dang ka ngen nawn sih ding uhi. Na gen bangin ka gamta ding uhi,” ei ci uhi. Keima in siempute hlanin a ciemsa bangun a gamtat nadingun ka kiciemsah hi.

¹³Keima in zong ka puonte thingin, “Tam kamciem a pel poma a inn le a neisa panin Pasien in thingkhie taheh. Tua bangin amate kithingkhie dawh hinlen hawmsuoh taheh!” ka ci hi. A kikhawm zosie in, “Hi taheh,” ci-in TOPA a phat uhi. Tuale a kamciemsa uh bangin mite a gamta uhi.

¹⁴Tua tham loin Judah gam uhpa dinga ei kise hun a kipan, Kumpi Artaxerxes a maan a kum sawmnina panin sawmthum le nina dong, kum sawm le kum ni sung, keima le ka sanggamte in gam uhte’ nga ding ante ka ne sih uhi.

¹⁵Kei mai-a gam uhte’ na semte in mite tungah vangih a na suon vua, tuale ngun shekel sawmli banah amate tung panin an le lenggazu a na la uhi. Amau’ nasemte nangawn in mi tungah thu nei nuom lai vaset uhi. Hizongle keima in Pasien giing ka hi ziehin tua bangin ka gamta sih hi.

¹⁶Tami kulcienna-ah kei mama in ka sem a, leitang bangma ka la vawt sih hi; tuale na sem dingin ka nasemte zosie tua munah a kisutuo uhi.

¹⁷Tua tham loin kim le pam minamte kung pana ang peite sim lo, ka sabuoi-ah an a ne, Jew-te le uliente lahah mi za le sawmnga pha den hi.

¹⁸Ni khat neh dingin bawngtang luong khat, a kituomteel tuu luong guh kigo hi; keima adingin aa-te zong kigo a, ni sawm a cin sielin savun um tampi dimin lenggazu kibawl hi; tua za-in tawp tama nanle keima in gam uhte’ nga ding anneh ka kal sih hi; azieh pen mipite genthei luo uhi.

¹⁹Ka Pasien aw, keima in tam mite dinga ka bawlsa zosie keima dingin a hoi lamin ei phawh in.