Read Zou ESTHER 2 Bible Online

ESTHER 2 - Zou bible

ESTHER 2

¹Tam thu teng a pien zaw, Kumpipa Ahasuerus’ lungthahna a ven ciengin ama in Vashti phawhin, tua nu gamtatna le ama tunga a thukhennate a phawhkia hi.

²Tua ciengin ama a cing kumpipa’ nasemte in, “Kumpipa adingin ngahnu melhoi khangdawngte suisah in.

³Kumpi khuo ahi Susa khuopi-a numeite’ inn ah a melhoi ngahnu khangdawng zosie a khawm dingin kumpi gamkhen zosie-ah uliente koi in. Numeite a uh kumpipa’ cilgesa pasal Hegai in numeite cingsah in; a melhoi theithei nadingun amate kizemsah in.

⁴Tuale kumpipa a lungkimsah numei khu Vashti tangin kumpinu suoh heh,” a ci uhi. Kumpipa in tam thu pen pha a sa a, ama in tua bangin a bawl hi.

⁵Tua laitahin kumpi khuo Susa ah Benjamin-te Kish, a tapa Shimei, a tapa Jair, a tapa Mordecai a kici Jew-te khat a om hi.

⁶Kish pen Babylon Kumpipa Nebuchadnezzar in Jerusalem panin Judah Kumpipa Jeconiah tawh sala a matte lahah a kihal khat ahi hi.

⁷Mordecai[7] in a pano’ tanu Hadassah, Esther a kici mi khat kem hi, azieh pen ama in nu le a pa nei lo hi; tua numei nu a melhoi le a duongcing khat ahi a, a nu le a pa a si ciengin Mordecai in ama’ tanu dinga a kep ahi hi.

⁸Tuaci’n kumpipa’ thupiehna le a thusuo a kizah ciengin kumpi khuo Susa-a Hegai kici pa’ kep dingin ngahnu tampite a kipeipi ciengin, Esther zong kumpi inn sunga numeite a cingpa Hegai kungah kizawpi hi.

⁹Tua numei in ama’ lunglam sukha a, a maipha a nga ziehin a kisiemna dingte le a an satanh a nawpieh pai a, kumpipa’ inn sung panin a kituomteel nasem numei sagi zong guonin, ama le a nasem numeite tungah numeite’ inn a hoipen mun a pie pai hi.

¹⁰Esther in a mite tungah hile, a sanggamte tungah hile a theisah sih hi, azieh pen Mordecai in a gen vawt lo dingin ama thupie hi.

¹¹Esther bangci op a, ama in bang thu teng a tuoh diei ci thei nuomin numeite’ inn leituol ah nisielin Mordecai a vah kawikawi hi.

¹²Numeite’ kisiem dan ding ngainate a om bangin hla sawm le ni a cin zaw ciengin Kumpi Ahasuerus kungah a banbanin numei zosie a kilah ding hun a tung hi. Amau’ kisiem dan tam bang ahi hi: Sathau le Myrrh panamtui tawh hla guh sung kipuo-in, panamtui tuomtuomte le kipuona dangte tawh hla guh sung ma kipuokia uhi.

¹³Kumpipa kungah numeite a pei ciengun numeite’ inn pan kumpipa’ inn ah amau’ dei popo kikengsah hi.

¹⁴Nitah lamin tua nu pei a, zingmawng ciengin a nina numeite’ inn ah a kilekia phot vua, kumpipa’ numeite a uh cilgesa ameite a cing pasal Shaashgaz in amate kem hi. Kumpipa’ lunglam a suhkhah sih a, a min tawh a kihlatkia sih leh tua nu pen kumpipa kungah peikia nawn lo hi.

¹⁵Mordecai in a tanu dinga a kep a pano Abihail’ tanu Esther hun tung a, kumpipa kungah a pei ciengin ama in numeite a cingpa, kumpipa’ numeite a uh cilgesa pasal Hegai’ gen teng simlo bangma a ngetbe sih hi. Tu-in ama a mu zosie in Esther a pahta ciet uhi.

¹⁶Ama in a uh zaw a kum sagina a hla sawmna ahi Tebeth hla sungin kumpi’ inn sunga Kumpi Ahasuerus kungah Esther a kipeipi ciengin,

¹⁷numei dangte zosie sangin kumpipa in Esther a itzaw hi; ama in ngahnu zosie sangin a maipha le lunglutna nga kha a, ama in tua nu lutungah kumpi lukhu khusah a, Vashti tangin kumpinu a suohsah hi.

¹⁸Tua ciengin kumpipa in a uliente le a vaihawmpite adingin “Esther Pawi” a kici pawi thupi khat a bawlpieh hi. Ama in a gamkhen teng tungah zong zumkhah ni[8] khat pie a, kumpipa’ min tawh a kilawm a kituoh letsongte zong a hawm hi.

¹⁹Ngahnu siengthote a kisuhtuo[9] ciengun kumpipa’ tunkotah Mordecai a to hi.

²⁰Tu-in Mordecai in a hilsa bangin Esther in a sanggamte tungah hile, a minamte tungah hile pulah lo hi; azieh pen ama in a kep lai-in ama’ thu a man ma bangin tu-in zong Mordecai’ thu a mang hi.

²¹Kumpipa’ tunkotah Mordecai a to laitahin, kumpipa’ lupna tunkotcing Bigthan le Teresh a kici kumpipa’ numeite a uh cilgesa pasal nite lungthahin Kumpi Ahasuerus tha[10] a sawm uhi.

²²Ahi vangin Mordecai in tua thu thei-in Kumpinu Esther kungah gen a, tuale Esther in Mordecai’ min tawh kumpipa kungah a gen hi.

²³A thu kikanin a kigen bangma ahi hi, ci-in a kithei ciengin ama gel sing tungah a kikhailia hi. Tami thupieng teng kumpipa muna-ah Kumpi Gam Tangthu Laibu sungah kiciemte hi.