Read Zou ESTHER 3 Bible Online

ESTHER 3 - Zou bible

ESTHER 3

¹Tam thu teng zaw ciengin Kumpi Ahasuerus in Agag-te Hammedatha’ tapa Haman a za khangsah a, a naseppi miliente zosie sangin a lienzaw-in a koi hi.

²Tuale kumpipa’ tunkota a suoh kha kumpipa’ nasemte zosie in Haman zatah bawlin a mai-ah a kun vangiam uhi; azieh pen ama tam banga kibawl ding ahi hi, ci-in kumpipa in thu a piehsa ahi hi. Hizongle ama’ mai-ah Mordecai kun loin zatahna zong pie lo hi.

³Tua ciengin kumpipa’ tunkota om kumpipa’ nasemte in Mordecai kungah, “Bang dinga kumpipa’ thupieh mang lo na hei?” a ci uhi.

⁴Amate in ni khat zaw ni khat ama kungah a gen vua, ama in amau’ thugen a man nop lo ciengin, Mordecai’ thugente a kimang ding ma ahi amah ci a thei nadingun Haman kungah a khie uhi; bangzieh ahei cile ama pen Jew-te a hina thu amate kungah a gen hi.

⁵Ama mai-ah Mordecai kun loin zatahna a pieh lo lam a mu ciengin Haman thangpai mama hi.

⁶Hinanle ama in Mordecai khat guoh tunga a khut hlan ding pen bawltah a sa sih a, tuaci’n ama kungah Mordecai’ mite a kigenna bangin, Haman in Ahasuerus’ kumpi gam sung muncin tenga a om Mordecai’ mite ahi Jew zosie suhsiet a sawm hi.

⁷Kumpi Ahasuerus’ uh a kum sawm le nina, a hla masa pen ahi Nisan hla panin a ni ni, a hla hla-in Pur a kici aisanna tawh Haman mai-ah ai kisan a, a hla sawm le nina Adar hla a ni sawm le thum ni-in[11] a aisan a pha hi.

⁸Tua ciengin Haman in Kumpipa Ahasuerus kungah, “Nangma’ kumpi gam sung gamkhen tenga mite lahah kithezahin a tuom om mi pawlkhat a om hi; amahaw’ ngainate pen adang mi zosie-a’ tawh kibang lo a, kumpipa’ thukhamte a zui sih uhi, tuaci’n kumpipa in bangma law loin amate na hici tanghla ding kilawm lo hi.

⁹Kumpipa in hoi na sah leh, amate a kisuhsiet nadingin thukhenna bawl inlen, kumpipa’ sumkholna sunga koi dingin kumpipa’ nasepna vaisaite khut sungah ngun talent tul sawm ka pie ding hi,” a ci hi.

¹⁰Tuaci’n kumpipa in ama’ khuta om a suoikaina khutsip a sutdawh a, Jew-te’ gal ahi Agag-te Hammedatha’ tapa Haman a pie hi.

¹¹Kumpipa in Haman kungah, “Na sum gente le na mi gente zong nangma tungah ang kipie zo a, na dei bangin amate tungah kibawl ta’n,” a ci hi.

¹²Tua ciengin a hla masa a ni sawm le thum ni-in kumpipa’ thuvanpite zosie kihlan a, tuale Haman’ thupieh zosie tawh kizui-in kumpipa vaisaite, gamkhen zosie a uhte, minam zosie lahah miliente tungah lai kigiel hi, gamkhen zosie-ah amau’ lai ciet, mi zosie tungah amau’ ham cietin kigiel hi; kumpi Ahasuerus’ min tawh tami lai kigiel a, kumpipa’ khutsip tawh kitum hi.

¹³Kumpi gamkhente zosie-ah laitaite lai kipiesah a, a hla sawm le nina, a ni sawm le thum ni, ni khat sungin Jew-te zosie a teh a khang, numei naupang susie-in thatin a suhmang nading ule amau’ neisa teng a tomgam nadingun thu kipie hi.

¹⁴Khum ni-in mi zosie a baisa-in a op nadingun a kiteisawn thukhenna laidal khat ciet gamkhen mun zosie-ah kipuohin a kizasah kim ding ahi hi.

¹⁵Kumpipa’ thupiehna tawh a mallangin laitaite pei-in kumpi khuopi Susa panin thukhenna lai kihawm hi. Kumpipa le Haman zu dawnin a toton uhi; ahi vangin Susa khuopi sung a buoi mama hi.