Read Zou ESTHER 4 Bible Online

ESTHER 4 - Zou bible

ESTHER 4

¹Mordecai in tam thu kibawl teng zosie a thei ciengin a puon botkehin la-ip puon silin vut kibuoh a, nahpitahin a kaa kawmin khuo sungah a vah kawikawi hi;

²kumpipa’ tunkotah ama peito hi, azieh pen kumpipa tunkot ah la-ip puon silte koima khat beh kilutsah lo hi.

³Kumpipa’ thupiehna le a thukhenna a tunna gamkhen zosie-a Jew-te lahah dana le kaana nasietahin omin, antangin kap le mau-in a om vua, a tamzawte in la-ip puon silin vut lahah a lum uhi.

⁴Esther’ nasem numeite le numeite a uh cilgesa pasalte pei-in ama kungah a gen ciengun, kumpinu a da mama hi; ala-ip puon a sut nadingin ama in Mordecai adingin puonsilte a hlah hi; hinanle ama in tuate sang lo hi.

⁵Tua ciengin Esther in kumpipa’ numeite a uh cilgesa pasalte lahah ama cing dinga kise ahi Hathach hlan a, bang zieha tam thu teng pieng ahei, ci Mordecai kunga kan dingin a sawl hi.

⁶Kumpipa’ tunkot mai khuopi tuolzanga om Mordecai kungah Hathach pei a,

⁷tuale Mordecai in ama tunga a pieng thu zosie le Jew-te a kitha nadingin Haman in kumpipa’ sumkholna-ah pieh dinga a sum ciemza thu zosie ama kungah a gen hi.

⁸Mordecai in zong amate suhsiet nading Susa khuopi-a kihawm thukhenna lai a kiteisawn khat ama pie a, ama in tua lai Esther lahin a thu a na gencien nading le, ama nu zong kumpipa kungah na pei pai a, a mite adingin ama kunga a va thumpieh dingin a sawl hi.

⁹Hathach pei-in Esther kungah Mordecai’ thugen teng a gen hi.

¹⁰Tua ciengin Esther in Hathach hopi-in Mordecai tungah thu zasah a,

¹¹“Kumpipa’ nasemte le kumpipa gamkhen sunga mite zosie in numei hile, pasal hile, hlat lopi-in kumpipa’ opna inn sungah a va mawh lut leh upadi khat beh om a, tua khu mi zosie a kibanga tha ding ahi hi. Kumpipa in a kham ciengkhut ama langah a na le leh beh tua mipa suohta ding a hina thu a theisa uh ahi hi. Keimama zong kumpipa kunga haw dinga ei kihlat lo zaw ni sawmthum bang pha ta hi,” a ci hi.

¹²Mordecai kungah Esther’ thugen teng a gen ciengun,

¹³Mordecai in amate kungah Esther a thuhkiana gen a, “Kumpipa’ inn sunga na op mawh vangin adang Jew-te zosie a kitha leh nang a suohta tuon dingin kingaisun sin.

¹⁴Bangzieh ahei cile tam bang hunin bangma gen loin na sip dide leh mundang khat panin Jew-te’ noptuom nading le hutkhiet na ding thu ang pieng veve ding a, ahi vangin nang le na pa’ innkuonte na si ding uhi. Tam bang hun ding ma-a kumpinu suoh na hi mel zong koi in thei ahei?” a ci hi.

¹⁵Tua ciengin Esther in amate kungah Mordecai a dawnna gen a,

¹⁶“Pei inlen, Susa khuopi-a Jew-te na mu zosie khawmin, kei tangin an na tang unlen, ni thum sung an ne lo tui dawn loin sun le zanin na om un. Keima le ka nasemte in note’ tan bangin ka na tang ding uhi. Tua zaw ciengin upadi tawh kituoh sih nanleh kumpipa kungah ka va haw ta ding hi; ka si le zong a si ka hi mai ding hi,” a ci hi.

¹⁷Tua ciengin Mordecai pei-in Esther’ sawl bangin na zosie a bawl hi.