Read Zou ESTHER 5 Bible Online

ESTHER 5 - Zou bible

ESTHER 5

¹A ni thum ni-in a kumpi puon tawh Esther kisiemin, kumpipa’ kikhopna innkhan tawh a kigalsai kumpi’ inn leituol sung lamah a ding hi. Kumpi inn lutna tawh a kigalsai kumpi’ inn sunga kumpi topha tungah kumpipa a to hi.

²Kumpipa in inntuola a ding Kumpinu Esther a mu behin tua nu in ama’ maipha nga a, Esther lamah a khuta a tawi a kham ciengkhut a zah phei hi. Tua bepin Esther in ama nai a, kumpipa ciengkhut dawn a tham hi.

³Kumpipa in tua nu kungah, “Kumpinu Esther aw, bang thu ahei? Na nget nop bang pen ahei? Nang tungah kumpi gam a phalkhat cieng nangawn ang kipie ding hi,” a ci hi.

⁴Tua ciengin Esther in, “Kumpipa na lung lam ahile, kumpipa dinga ka bawl ka ankuonglui ne dingin tuni-in Haman tawh hing pei ta un,” a ci hi.

⁵Tua ciengin kumpipa in, “Eite in Esther’ dei banga i sep thei nadingin mallangin Haman vah lan ta un,” a ci hi. Tuaci’n Esther’ siemsa ankuong im dingin kumpipa le Haman a pei uhi.

⁶Amate in zu a neh laitahun kumpipa in Esther kungah, “Na nget nop bang ahei? Ang kipie ding hi. Bang ahei na thum ding? Ka gam phalkhat cieng dong nangawn ang kipie ding hi,” a ci hi.

⁷Tua bepin Esther in, “Nang tunga kang nget nop le kang thum nop pen tami ahi hi:

⁸Keima in kumpipa’ maipha ka nga a, kumpipa in ka ngetna le ka thumnate nei pieh nuom dinga ahile, keima in noma gel dinga ka bawl ka ankuonglui ne dingin zing ciengin kumpipa le Haman hing pei un. Tua ciengin keima in kumpipa’ gen bangin kang dawng ding hi,” a ci hi.

⁹Khum ni-in Haman lungdam kipahin a pei hi. Ahi vangin kumpi tunkot gei-a om Modecai in a mai-ah na ding beh lo a, zatahna lim a na lah lo a mu ciengin, Mordecai tungah ama lungthah mama hi;

¹⁰hizongle ama le ama ki-ip kenkonin inn-ah Haman a pei hi. Tua ciengin a guolte le a zi Zeresh hlan a,

¹¹a hauna thupi dante, a tapa nei teng, kumpipa in pahta-in a za a khansahna teng, kumpipa’ uliente le vaihawmte sangin a lienzaw-in ama a koina thu zosie amate kungah a gen hi.

¹²Haman in genbe lai a, “Kumpinu Esther nangawn in a bawlsa ankuong luina-ah kumpipa tawh ankuong im dingin kei ci simlo midang koima peisah lo hi. Zing ciengin zong kumpipa tawh ankuong imton dingin ama in ei hlan lai hi.

¹³Ahi vangin kumpipa’ tunkot ah a to Jew-te Mordecai ka mu laisie tam teng zosie a mawhna suoh zel hi,” a ci hi.

¹⁴Tua ciengin a zi Zeresh le a guolte zosie in ama kungah, “Tong sawmnga a sang khuom phutsah inlen, tua tungah Modecai a kikhailia nadingin zing ciengin kumpipa kungah gen in; tua ciengin ankuong im dingin kumpipa tawh lung nuomtahin pei in,” a ci uhi. Haman in tam thu hoi sa a, tuaci’n a gui-awh nading khuom ama a phutsah hi.