Read Zou ESTHER 6 Bible Online

ESTHER 6 - Zou bible

ESTHER 6

¹Tuami zanin kumpipa kimu thei lo a, thupieng teng ciemtena laibu lasahin a mai-ah tuate kisim hi.

²Tua banga a kisim ciengin, kotcing, kumpipa’ numeite a uh cilgesa pasal Bigthan le Teresh in kumpipa Ahasuerus tha[12] a sawmdapna uh Mordecai in a genkhiet, thu ciemtena sunga kigiel kimu hi.

³Tua ciengin kumpipa in, “Tami thu ziehin Mordecai tungah patawina ahi sihle minphatna bang a kipie zo ta ahei?” a ci hi. Ama a cing kumpipa’ nasemte in, “Ama ading bangma khat beh kibawlpieh lo hi,” a ci uhi.

⁴Kumpipa in, “Inn tuolah koi a om ei?” a ci hi. Tua laitahin Haman in Mordecai khailia nadinga a bawl khuom tungah ama a kikhailia nading thu a gen dingin kumpipa’ inntuol pulamah a lut hi.

⁵Tuaci’n kumpipa’ nasemte in ama kungah, “Khum sungah Haman om hi; inn tuolah ding hi,” a ci uhi. Kumpipa in, “Ama hing lutsah un,” a ci hi.

⁶Tuaci’n Haman lut a, kumpipa in ama kungah, “Kumpipa in a patawi nuom mipa tungah bang kibawlpieh leh hoi na sa ei?” a ci hi. Haman in a lungsim sungah ngaisun a, “Kumpipa in keima kana a patawi nop zawh ding koi om tuon ding ahei?” a ci hi.

⁷Tuaci’n Haman in kumpipa kungah, “Kumpipa in na patawi nop mipa adingin,

⁸kumpipa’ silsa ahi kumpi puonte, kumpipa tuonna sakol a kumpi lukhu tawh lasah in.

⁹Kumpipa’ milien pen khat kungah tua kumpi puonte le sakol piesah in; ama[13] in kumpipa patawi nop mipa kumpi puon silsah hinlen, ama in[14] sakol tungah tua mipa tuongsahin khuopi gawlzing lampi tengah kaisah kawikawi inlen, ama mai-ah, ‘Kumpipa’ patawi nop mipa tungah tam bangin kibawl ding hi,’ ci-in tangtawhsah in,” a ci hi.

¹⁰Tua ciengin kumpipa in Haman kungah, “Na gensa bangin mallangin kumpi’ puonte le sakol va la ta’nlen, kumpipa’ tunkota a to Mordecai tungah va bawl ta’n. Na gensa khat beh hen nei sin,” a ci hi.

¹¹Tuaci’n Haman in kumpi puonte le sakol la-in Mordecai silsah a, khuopi gawlzing lampi tengah tuongsahin, “Kumpipa in a patawi nop mipa tungah tam bangin kibawl ding hi,” ci-in tang a tawh hi.

¹²Tua ciengin kumpipa’ tunkotah Mordecai peikia a, ahi vangin Haman ahile puon kilukhu-in a kaa pumin a inn ah a nawpei ta hi.

¹³Haman in ama tunga thupieng teng zosie a zi Zeresh le a guolte kungah a gen ciengin, a zi Zeresh le a thumop mite in ama kungah, “Na lel ngai pa Mordecai khu Jew-te ahi poma leh ama na zo sih ding a, ama’ masangah a pua valon ding na hi hi,” a ci uhi.

¹⁴Amate a kiho laitahun kumpipa’ numeite a uh cilgesa pasalte a tung vua, Esther ankuong luina-a pei dingin Haman a naw zawpi uhi.