Read Zou ESTHER 9 Bible Online

ESTHER 9 - Zou bible

ESTHER 9

¹Kumpipa’ thupieh le a thukhenna a kisep ding kuon laitah, amate tungah Jew-te’ galte guol zo dinga a kinep ni uh, hizongle thu kikhelin Jew-te in a galte tunga a guolzaw ni ding uh, a hla sawm le nina Adar hla a ni sawm le thum ni-in,

²a siet nading uh a suite a susie dingin Kumpipa Ahasuerus’ uhna gamkhen zosie-a om amau’ khuopite-ah Jew-te a kikhawm uhi. Mi zosie in Jew-te a giin ziehun koima in amate nang zo lo hi.

³Amate in Mordecai a giin ziehun gamkhen zosie sunga miliente, kumpipa’ vaisaite, le gamkhen uhte in Jew-te a panpi uhi.

⁴Bangzieh ahei cile Mordecai in kumpi’ inn sungah thu nei mama a, a thuneina khang semsem ahi ziehin gamkhen zosie-ah a minthanna kizel hi.

⁵Tuaci’n Jew-te in namsau tawh a galte zosie uh that a, amate a mudate tungah dei bangin a bawl uhi.

⁶Kumpi khuo Susa khuopi sungah Jew-te in mi zanga thatin susie uhi.

⁷Amate in Parshandatha, Dalphon, Aspatha,

⁸Poratha, Adalia, Aridatha,

⁹Parmashta, Arisai, Aridai, Vaizatha,

¹⁰Jew-te’ gal ahi Hammedatha’ tapa Haman’ tapa sawmte that uhi; ahi vangin amate in ama’ vante a thamkha sih uhi.

¹¹Khum ni mama-in kumpipa tungah kumpi khuo Susa khuopi sunga a kithat mi phaza kizasah hi.

¹²Kumpipa in Kumpinu Esther kungah, “Kumpi khuo Susa khuopi sungah Jew-te in mi zanga a that zo ta vua, Haman’ tapa sawmte zong that zo uhi. Kumpipa’ uhna adang gamkhen tengah bang teng khat a bawl ta ding vuoi? Tu-in bang na ngen nuom lai ei? Na nget popo ang kipie ding hi. Bang nget be nuom lai na hei? Na nget popo ang kipie ding hi,” a ci hi.

¹³Esther in, “Kumpipa in hoi na sah leh, tuni-a thukhenna tawh kizui-in zing ciengin zong Susa khupi sunga om Jew-te tungah bawl thei nading phalna pie inlen, Haman’ tapa sawmte sing khuom tungah khailiasah in,” a ci hi.

¹⁴Tuaci’n kumpipa in tua banga a kibawl nadingin thu pie a, Susa khuopi sungah thukhenna kibawlin Haman’ tapa sawmte a kikhailia sieng hi.

¹⁵Adar hla a ni sawm le li ni-in Susa khuopi sunga om Jew-te a kikhawmkia vua, Susa khuopi sungah mi zathum that uhi. Hizongle amate in van a thamkha sih uhi.

¹⁶Tu-in a hinna uh hu dingin kumpipa’ uhna gamkhen teng sunga om Jew-te zong kikhawmin a galte’ khut sung panin suotahna a nga vua, amate a muda mihing tul sawmsagi le tulnga that uhi. Ahi vangin amate in vante tungah a khut a ngam sih uhi.

¹⁷Tam banga a bawlna uh pen Adar hla a ni sawm le thum ni hi a, a ni sawm le li ni-in a tawlnga vua, khum ni pen pawi bawlni le lungdam ni a hisah uhi.

¹⁸Ahi vangin ni sawm le thum ni le ni sawm le li ni-in Susa khuopi sunga om Jew-te kikhawmin, ni sawm le ngana ni-in a tawlnga vua, khum ni pen pawi bawl ni le lungdam ni ahisah uhi.

¹⁹Tua ahi ziehin khuoneute le kulpi a nei lo khuopite sunga a teng Jew-te in Adar hla a ni sawm le li ni pen pawi bawlna le khatlekhat an kithahna ni-in a zang uhi.

²⁰Mordecai in tam thu teng lai-in ciemte a, Kumpipa Ahasueras’ uhna a nai a gamla-a om gamkhen zosie sunga Jew-te zosie tungah lai a hlah hi.

²¹A kumkumin Adar hla ni sawm le li ni le sawm le nga ni pen amate in a tan nadingun thu pie a,

²²tua nite-in amau’ galte panin Jew-te a suotah ni uh ahi a, tua hla pen amate dingin dana panin lungdamna, tauna le thumna panin tawlngah ni khatin a kikhelna hla ahi sah hi. Tuaci’n amate in khum ni tegel pawibawl ni le lungdam ni a suohsah vua, amate in khatlekhat an kithahna ni le mizawngte tunga letsong pieh ni-in a nei ding uhi.

²³Tuaci’n Mordecai in amate kunga lai a na giel bangin amate in a na patsa uh tam banga a bawlnate uh Jew-te in ngaina khatin a zang uhi.

²⁴Jew-te zosie’ galpa ahi Hammeda-tha’ tapa, Agag-te Haman in Jew-te suhmang ding na sawm a, ama in amate gawtin a suhmang nadingin Pur kici ai a san hi.

²⁵Ahi vangin kumpipa’ mai-ah Esther a tun ciengin, Jew-te suhsiet nadinga a gitlo sawmna teng pen ama’ lu tungah a tuh nading, le sing khuom tungah ama le a tate a kikhailia nadingin kumpipa in lai gielin thu a pie hi.

²⁶Tua ahi ziehin tam nite Pur kammal panin Purim na kici ahi hi. Tua ahi ciengin amate in tami laihlah sunga kigiel thute zosie, le tam thute a mit utawh mu-in a pumpi utawh a tuona uh ziehin,

²⁷Jew-te in amate, a suon a hlahte ule amate a pawm mite in tam ni nite gel pen ngaina khatin sangin, lai sunga kigiel bangin kumsiela a kise hunin a pel loin a tan nadingun a kipsah uhi.

²⁸A khangkhangin innkuon sim, gamkhen sim, khuopi simah tam nite kiphawhin kitang ding hi; tuale Jew-te lahah tami Purim nite pen tan lo thei lo hi ding a, a suonlehlahte uh lahah tam nite phawna pawi a bawl zing ding uhi.

²⁹Abigail’ tanu Kumpinu Esther in Jew-te Mordecai tawh a bukim thuneina tawh a giel uh tami Purim tungtang thu a niveina laihlah pen a kipsah uhi.

³⁰Ahasuerus’ kumpi gama gamkhen za le sawmni le sagi sunga om Jew-te zosie tungah kilemna le lungmuonna a op nading deisahna laite kihlah a,

³¹Jew-te Mordecai le Kumpinu Esther in Jew-te tunga a kipsah uh ma bangin a kisesa amau’ hunin tami Purim nite a kitan nadingin thu kipie hi. Tua ma bangin amate le a suon a hlahte adingin antan nading le thumna nei nading tawh kisai ngainate a giel uhi.

³²Kumpinu Esther’ thupiehna in tam Purim tawh kisai zui ding ngainate kipsah a, tam thute lai sungah kiciemte hi.