Read Zou PEIKHIETNA 1 Bible Online

PEIKHIETNA 1 - Zou bible

PEIKHIETNA 1

¹Tam teng pen Jacob tawh Egypt gama a zawhton, a innkuon ciet utawh ahi Israel’ tapate’ min ahi hi:

²Reuben, Simeon, Levi, le Judah,

³Isschar, Zebulun, le Benjamin,

⁴Dan le Naphtali, Gad le Asher-te ahi hi.

⁵Jacob pana a pieng zosie a unpi-in sawm sagi a pha hi. Joseph pen Egypt gamah a na om zo ta hi.

⁶Tua ciengin Joseph, a sanggamte zosie, le tua khangmi zosie a si sieng uhi.

⁷Ahi vangin Israel-te cipha-in tampi a pha uhi; amate tamin hat citahin a hat vua, tuaci’n gam sung teng a dim uhi.

⁸Tu-in Egypt gamah Joseph a thei lo kumpi khat a khang hi.

⁹Ama in a mite kungah, “En un, Israel mite ei sangin tam zaw-in zong a thahat zaw uhi.

¹⁰Hing pei un, pilvang tahin amate bawl vai, tua banga i bawl sih leh amate ang pung ding a, gal le sa hing om leh ei do dingin i galte ang pawl ding vua, i gam panin ang taimang ding uhi.

¹¹Tua ahi ziehin thona-aana sepsahna tawh amate a gawt dingin a tung vuah nasem uhte a koi uhi. Amate in Pharaoh adingin ankholna khuopite ahi, Pithom le Rameses-te a lam uhi.

¹²Hinanle a kibawlsiet ciengin amate tampi pha semsemin a kizelthang zaw vua, tuaci’n Egypt-te in Israel-te giing mama uhi.

¹³Egypt-te in Israel-te na semsahin a gawgam mama vua,

¹⁴buoncil nasep le a hamsa tehlei bawl nasep le lolai-a nasep namkim tawh a hinkhuo uh a genthei sah uhi. A sepsahna zosie vuah amate a gawgam mama uhi.

¹⁵Egypt kumpipa in Hebrew naudomte, khat’ min Shiphrah, le adang khat’ min Puah a kicite kungah,

¹⁶“Hebrew numeite nau na dop ciengun nausuona topha tungah a to nausen en unlen, tapa ahile that un; tanu ahileh na hinkhawi ding uhi,” a ci hi.

¹⁷Ahi vangin naudomte in Pasien a giing uhi; amate in Egypt kumpipa thupieh mang loin nausen pasalte a hinkhawi uhi.

¹⁸Tuaci’n Egypt kumpipa in naudomte hlansahin amate kungah, “Bang dinga tam bang na na sep vua, nausen pasalte na hinkhawi uh ahei?” a ci hi.

¹⁹Naudomte in Pharaoh kungah, “Hebrew numeite pen Egypt numeite tawh kibang lo hi; bang ding ahei cile amate a thahat mama vua, naudomte tun masangin a na suoh zo ta uhi,” a ci uhi.

²⁰Tua ahi ziehin Pasien in naudomte a limbawl hi; tuale mite pungin a thahat mama uhi.

²¹Naudomte in Pasien a giin ziehun amate tungah Pasien in innkuonte a pie hi.

²²Tua ciengin Pharaoh in ama’ mite zosie thupie a, “Hebrew-te[1] sung panin a pieng tapa zosie Nile gun sungah na pai ding vua, ahi vangin tanu kici popo na hinkhawi ding uhi,” a ci hi.