Read Zou PEIKHIETNA 10 Bible Online

PEIKHIETNA 10 - Zou bible

PEIKHIETNA 10

¹Tua ciengin TOPA in Moses kungah, “Pharaoh kungah va pei in; azieh pen amate lahah tami ka limte ka lah thei nading le

²Egypt-te ka motbawlna le amate lahah bang limte bawl zo ka hei, ci thu na tate le na tute’ zaha na gen thei nading le, keima TOPA ka hi lam na thei nadingin ama’ lungtang le a uliente’ lungtang ka khausah hi,” a ci hi.

³Tuaci’n Pharaoh kungah Moses le Aaron pei-in, “Hebrew-te’ Pasien, TOPA in tam bangci hi: ‘Ka mai-a nang kiniemkhieh ding bang tanvei niel sawm na hei? Amate in keima ei bieh thei nadingun ka mite peisah in.

⁴Azieh pen ka mite pei ding na niel leh zing ciengin na gam sungah kauphe kang tungsah ding hi.

⁵Koima in leitang a mu thei lo nadingin kauphete in lei maitang zosie tuommang ding uhi. Kauphe in giel khiehmawhte netum a, lozau-a na suon uh singkung zosie valtum sieng ding hi.

⁶Na innsung, na ulien zosie’ innsung le Egypt-te zosie’ inn sungah leitunga a pien vua kipan tuni dongin na pu na pate in a mukhah ngai nai lo uh kauphete a dimin ang om ding hi,’ ci hi,” ci-in a gen hi. Tua ciengin ama kihei-in Pharaoh kung pan a pusuoh hi.

⁷Pharaoh’ uliente in ama kungah, “Eite tungah tam mipa bang tanvei thangkam banga hing om ding ahei? Amate in a Pasien uh ahi TOPA a bieh thei nadingun mite peisah in. Egypt a kisiet lam a thei nai lo na hi amah?” ci uhi.

⁸Tuaci’n Pharaoh kungah Moses le Aaron kipeipi kia a, ama in a kung vuah, “Pei unlen na TOPA na Pasien uh va bie ta un! Ahi vangin koi teng pei ding na hi uh ahei?” a ci hi.

⁹Moses in, “Ka khangnote le ka khanghamte tawh ka pei ding uhi; ka tapate, ka tanute, ka ganhingte le ka bawnghonte utawh ka pei ding uhi, bangzieh ahei cile TOPA’ pawi ka kham ding uhi,” a ci hi.

¹⁰Pharaoh in amate kungah, “Note tawh na naupangte kang peisah tah leh no tawh Pasien ang om tahtah hi ta ven! Keima in kang sieng genin, na lungsim sung vuah ngimna hoi lo na nei uhi.

¹¹Tua bang hi thei buong lo e! No pasal teng pei unlen, TOPA va bie ta un, azieh pen noma’ ang nget ahi hi,” a ci hi. Tuale Pharaoh kung panin amate kinotmang hi.

¹²Tua ciengin TOPA in Moses kungah, “Egypt leitangah kauphete tu-in, gielpi’ khiehmawh kung zosie a neh thei nadingin Egypt leitang tungah na khut zah in,” a ci hi.

¹³Tuaci’n Moses in Egypt leitang tungah a ciengkhut zah a, TOPA in khumi ni sun tungtawn le khumi ni zan tungtawnin leitang tungah nisuona hui a langsah hi; zingmawng ciengin nisuona hui in kauphete a puoh hi.

¹⁴Nidang hunin a om ngai nai lo, bangma cih hunin zong a om ngai nawn lo ding, Egypt leitang tung zosie-ah kauphe honpi tung a, Egypt gam buppi-ah a om hi.

¹⁵Leitang a miel zo ding za-in kauphete in lei maitang vannuoi a tuomcip hi; amate in gam sunga om kung zosie le gielpi’ khiehmawh singkung ga zosie a netum uhi; Egypt leitang tung zosie-ah gamlah singkungte hile kungnote hile a na dawng khat beh om lo hi.

¹⁶Pharaoh in Moses le Aaron naw hlat a, “TOPA na Pasien uh’ tung le nogel tungah ka khiel zo hi.

¹⁷Tu tung tami ka mawna ei maisah in. Ama in ka kung panin tami sina a lah nadingin na TOPA Pasien kungah thum in,” a ci hi.

¹⁸Pharaoh kung panin ama pei-in TOPA kungah thu ngen hi.

¹⁹TOPA in tuami nisuona huipi pen a hat mama nitumna huipi suohsah a, kauphete tawmangin San Tuipi[24] denna-in nei hi; Egypt gam sungah kauphe khat zong om nawn lo hi.

²⁰Ahi vangin TOPA in Pharaoh’ lungtang khausah a, Israel-te peisah nuom lo hi.

²¹Tua ciengin TOPA in Moses kungah, “Egypt leitang tungah khuomiel, a kitham thei za-a khuomiel a om thei nadingin vantung lamah na khut zah in,” a ci hi.

²²Tuaci’n Moses in vantung lamah a khut zah a, Egypt gam leitang zosie-ah nithum sung mutzin a tung hi.

²³Ni thum sung amate khatlekhat a kimu thei sih vua, a opna panun koima a pupiel thei sih hi; ahi vangin Israel-te’ tenna munah khuo a vah hi.

²⁴Tua ciengin Pharaoh in Moses hlanin, “Pei unlen TOPA va bie ta un. Na tuuhonte ule na bawnghonte uh beh nuasie un. Na tate uh nangawn zong na zawpi thei ding uhi,” a ci hi.

²⁵Ahi vangin Moses in, “TOPA ka Pasien uh’ tungah biehpiehnate le meihal biehnate nei piehsah lo phamaw hi.

²⁶Ka ganhingte uzong koma tawh a zawton lo phamaw a, ganhing kecin khat zong kinuasie thei lo ding hi, bangzieh ahei cile TOPA ka Pasien uh ka bieh nadingun tuate lah panin pawlkhat ka deitel ding uh phamaw hi. A mun ka tun masangun TOPA bieh nadingin bang pen zang ding ci ka thei nai sih uhi.

²⁷Hizongle TOPA in Pharaoh’ lungtang khausah a, a pei ding uh phal lo hi.

²⁸Tua ciengin Pharaoh in ama kungah, “Ka kung panin peimang ta’n! Ka mai nei mukia lo nadingin kidawm in. Azieh pen ka mai nei mu ni ni-in na si ding hi,” a ci hi.

²⁹Moses in, “Na gen bangin hi taheh! Na mai kang mu ngai nawn sih ding hi,” a ci hi.