Read Zou PEIKHIETNA 11 Bible Online

PEIKHIETNA 11 - Zou bible

PEIKHIETNA 11

¹TOPA in Moses kungah, “Pharaoh le Egypt tungah gimna khat ka tungsah lai ding hi; tua zaw ciengin tam mun panin ama in note ang peisah ding hi. Ama in note ang peisah ciengin ang notmang sieng ding uhi.

²Pasal poma in a vengte’ kung pan, numei poma in zong a vengte’ kung panin ngun le kham kizepnate a nget nadingun mite kungah gen in,” a ci hi.

³Egypt-te muna-ah TOPA in mite maipha pie hi. Tua tham loin Moses mama zong Egypt leitang tung, Pharaoh’ uliente muna le mipite muna-ah mi thupi mama khat a suoh hi.

⁴Moses in, “TOPA in tam bangin ci hi: Zankim pawlin Egypt gam muncin tengah ka pei ding hi.

⁵Egypt gama tacil zosie, a kumpi topha tunga to Pharaoh’ tacil pen a kipan, an gawina nua-a om nasem numei’ tacil zosie, le ganhing lah panin tacil zosie si ding hi.

⁶Tua ciengin Egypt gam buppi-ah bangma huna tua bang a om ngai lo, mai lamah zong a omkia ngai nawn lo ding kaana le mauna lienpi a om ding hi.

⁷Ahi vangin TOPA in Egypt le Israel a tuom khen lenlon hi, ci na thei nadingun Israel-te, mihing hile ganhing hile, ui khat in zong kawh lo ding hi.

⁸Tua ciengin keima kungah na uliente uh hing peisuhin, ka mai-ah ang lukun ding vua, ‘Nang le nangma ang zui mi zosie peidawh ta un,’ ang ci ding uhi. Tua ciengin kei ka pei ding hi,” a ci hi. Pharaoh’ kung panin a lungsosa-in peikhie hi.

⁹TOPA in Moses kungah, “Egypt-ah nalamdang ka tam bawl thei nadingin Pharaoh in na thu ang ngai sih ding hi,” a ci hi.

¹⁰Pharaoh mai-ah Moses le Aaron in na lamdang tam teng a bawl uhi; ahi vangin TOPA in Pharaoh’ lungtang khausah a, a leitang panin Israel-te peisah lo hi.