Read Zou PEIKHIETNA 12 Bible Online

PEIKHIETNA 12 - Zou bible

PEIKHIETNA 12

¹Egypt gam sungah TOPA in Moses le Aaron kungah tam bangin gen hi:

²Tami hla pen note dingin hla kipatna hi ding hi; note dingin kum khat sunga a hla masa pen hi ding hi

³Israel mihon vannuoi kungah gen unlen, khumi hla ni sawm ni-in amate in a innkuon ciet vua dingin tuuno khat ta a la ding uhi.

⁴Tuuno luong khat ne dinga innkuonmi a tawm seng leh, a kinaipi pen a vengte tawh tua luong khat kitang ding uhi; a ne ding mi phaza tawh kituohin tuuno sa kihawm ding hi.

⁵Na tuuno uh paubaang lo, kum khat a cingsa apa khat hi ding hi; tuami adingin tuu ahi sihle keel khat popo na la thei ding uhi.

⁶Tua tuuno, khumi hla ni sawm le ni li cieng dong na khum ding uhi; tua ciengin Israel mihon zosie in nitah lamin tuami gan go ding uhi.

⁷Amate in a si kimkhat la-in a sunga a nehna uh inn kotkhah khuom nite le a bangtung zawl nu ding uhi.

⁸Amate in khumi zan ma-in tuuno sa ne ding uhi; amate in mei-ah tua sa hangin tol saw lo anlum le tangkhate tawh me ding uhi.

⁹Tua sa a sielin ahi sihle tui tawh huonin na ne sih ding vua, ahi vangin mei tungah a lu a kengte le a sungkuote na hang ding uhi.

¹⁰Zingmawng dongin tuate khawnla khat beh na omsah sih ding uhi; zingmawng donga a kikhawngla popo na haltum ding uhi.

¹¹Na neh dan ding uh tam bang ahi hi: Na kawng uh kigahin na keng vuah kedap bunin, na khut vuah na ciengkhut uh na tawi ding uhi; tuale mallang tahin na ne ding uhi. Tuami khu TOPA’ Peisan Pawi ahi hi.

¹²Azieh pen khum zanin Egypt leitang ka nawhsuoh ding a, Egypt leitang tunga om tacil zosie, mihingte le ganhingte a nipi-in ka vatmai ding hi; Egypt pasien-te zosie tungah thu ka khen ding hi: Keima TOPA ka hi hi.

¹³Na tenna uh inn tunga sisan khu no adingin lim khat hi ding hi: Keima in sisan ka mu ciengin kang kalsan ding vua, Egypt leitang ka vatmai ciengin zong ang susie ding gimna na tung vuah ang tung sih ding hi.

¹⁴Tami ni pen note dingin phawna ni hi ding hi. Note in TOPA tungah tuami ni pen pawi bawlna ni-in na zang ding uhi; na khang tungtawnun biehna ngaina kip khatin na nei zing ding uhi.

¹⁵Ni sagi sung tol saw lo anlum na ne ding uhi; a ni masa ni-in na inn panun tol na hemdawh ding uhi, azieh pen mi khatpo in a ni masa panin a ni sagi ni dongin tol kisaw anlum a neh leh Israel sung panin kihemkhie ding hi.

¹⁶A ni masa ni-in a siengtho kikhopna khat na nei ding uhi, tuale a ni sagi ni-in zong a siengtho kikhopna khat ma na nei ding uhi; mi zosie’ neh ding an na huon ding uh ci simlo, tua hun sung tengin bangma na kisem lo ding hi.

¹⁷Tolsaw lo anlum pawi na bawl ding uhi, bang ding ahei cile tua ni ma-in keima in Egypt leitang panin na mihonte uh ka peipi hi: Na khang tawntungun tami ni pen biehna ngaina kip khatin na nei zing ding uhi.

¹⁸A hla masa pen, a ni sawm le ni li ni panin ni sawmni le ni khat nitah dongin tol kisaw lo anlum na ne ding uhi.

¹⁹Na inn sung vuah ni sagi sung tol kici kimukha lo ding hi; koipo, pemta ahi a, gammi ahi zongin tol kisaw a neh leh Israel mihonpi lah panin kihemkhie ding hi.

²⁰Tol kisaw poma na ne sih ding uhi; na tenna zosie vuah tol kisaw lo anlum na ne ding uhi.

²¹Tua ciengin Moses in Israel upate zosie hlanin amate kungah, “Pei unlen, na innkuon vua dingin tuunote teelin peisan tuuno go un.

²²Hyssop’ na lomkhat la-in kuong sunga om sisan sungah die unlen, tua kuong sunga sisan tawh bangtung zawl le kotbieng khuom nite nu un. Zingmawng masangin koima in na inn kot pulam uh na kal sih ding uhi.

²³Bangzieh ahei cile Egypt-te vatmai dingin TOPA in ang nawh ding a, bangtung zawl le kotbieng khuom nite tunga sisan a mu ciengin TOPA in tuami kotpi a peisan ding a, na inn sung vuah note ang vatmai ding a susie pa a lutsah sih ding hi.

²⁴Note le na tapate in biehna ngaina kip khatin tami dan na zang zing ding uhi.

²⁵Note ang ciemsa bangin TOPA in ang pieh ding leitangah na tun ciengun tami sil bawldan na zui ding uhi.

²⁶Na tate un na kung vuah, ‘Tami sil kibawl bang a cinopna ahiei? ci-a ang dot ciengun,

²⁷‘Tami TOPA’ peisan biehpiehna ahi hi. Azieh pen ama in Egypt-te vatmai-in, ahi vangin ei innkuon teng ei hinkhawi lai a, Egypt gam sungah Israel’ innkuonte a peisan hi,’ na ci ding uhi,” a ci hi. Tuale mite lukunin Pasien a bie uhi.

²⁸TOPA in Moses le Aaron a thupieh bangin Israel-te pei-in a gamta uhi.

²⁹Zankim ciengin TOPA in Egypt gam sunga om tacil zosie, a kumpi topha tunga a to Pharaoh’ tacil-a kipan thongmiel sunga a om saltangte’ tacilte le ganhingte’ tacil zosie a vatmai hi.

³⁰Khumi zanin Pharaoh le a uliente le Egypt mi zosie a tho uhi; tuale Egypt gam sungah kaana lienpi a om hi. Azieh pen misi om lona inn khat zong om lo hi.

³¹Tua ciengin ama in Moses le Aaron a zan thuta a, ama gel kungah, “Ding un, ka mite lah panin noma ni le Israel-te peikhie ta un! Pei unlen na gen bangun TOPA bie un.

³²Na gen bangun na tuuhonte ule na bawnghonte uh zawpi unlen peimang ta un. Kei zong thupha ei pie un!” a ci hi.

³³Manlang taha tua gam a nuasie nadingun Egypt-te in mite a hantawh uhi, azieh pen amate in, “I unpi vua a si sieng ding i hi ta uhi,” a ci uhi.

³⁴Tuaci’n mite in tol a kisaw masangin a annel lom uh la-in, puon tawh annel pawina a kuongte uh tunin a liengko tung vuah a puo uhi.

³⁵Moses in a kung vua a gen bangin Israel-te a gamta uhi; amate in Egypt-te kung pan ngun le kham kizepnate, le puonte a ngen uhi.

³⁶A ngette uh a pieh nadingun TOPA in Egypt-te’ muna-ah mite maipha pie hi. Israel-te in tua bangin Egypt mite’ na a tomgampieh uhi.

³⁷Numei le naupangte kisim lo, Rameses panin Succoth-ah Israel-te pasal tul zaguh keng tawh a pei uhi.

³⁸Minam kisawhal honpite, tuuhon le bawnghon, ganhing tampite zong amate tawh a peiton uhi.

³⁹Amate in Egypt pana a ken uh annel lom panin tol kisaw lo moh a em uhi; tuate pen tol kisaw lo ahi hi, azieh pen Egypt panin amate kinotmang a, khuongai man lo lienga ang pei ziehun a an neh ding uzong a guong man sih uhi.

⁴⁰Egypt-ah Israel-te a ten hun sung uh kum zali le kum sawmthum ahi hi.

⁴¹Kum zali le kum sawmthum a cin tuami ni ma-in, Egypt leitang panin a unpi-un TOPA’ mihonte a peikhie uhi.

⁴²Egypt leitang panin a peipi thei nadingun khum zan pen TOPA adingin zanha ni ahi hi. Israel-te zosie in a khang khangin khum zan pen TOPA adingin zanha zanin a tang zing ding uhi.

⁴³TOPA in Moses le Aaron kungah tam bangin gen hi: Tam pen Peisan pawi bawl dan ding ngaina kip ahi hi: Gamdang mi koima in tua khu a ne sih ding hi.

⁴⁴Ahi vangin a kileisa sila poma in tep a kitan zaw ciengin ne thei ding hi;

⁴⁵suoh le salte ahi sihle a kiciel nasemte in ne thei lo ding hi.

⁴⁶Tua pen inn khat sungah kine ding hi; inn pulamah a sa na pusuopi sih ding vua, a gu khat zong na tawngsah sih ding uhi.

⁴⁷Israel mihon buppi in tami pawi a bawl ding uhi.

⁴⁸Na tentonpi uh pemta khatpo in TOPA kungah peisan pawi a bawl nop leh a mipi pasal zosie a tep uh kitan ding hi; tua ciengin ama in tuami a bawl nadingin a kungah neh ding hi; tuolsung mi khat bangin ama kingaisun ding hi. Hizongle tep tan lote in ne thei lo ding ahi;

⁴⁹tuolsung mite le na lah vua a teng khuol mite adingin zui ding thukham khat beh om ding hi,” a ci hi.

⁵⁰TOPA in Moses le Aaron a thupieh bangin Israel-te zosie in a bawl uhi.

⁵¹Khumi ni ma-in TOPA in Egypt gam panin Israel-te a honhonin a peipi hi.