Read Zou PEIKHIETNA 15 Bible Online

PEIKHIETNA 15 - Zou bible

PEIKHIETNA 15

¹Tua ciengin Moses le Israel-te in TOPA kungah tami la a sa uhi: “TOPA tungah zeila sa vang, azieh pen vangnei tahin ama guol zo hi; sakolte le a tunga tuongte tuili lai-ah sepmang zo hi.

²TOPA khu ka zaitha le ka thahatna[28] ahi a, ama ka hutdamna a suoh zo hi. Ama ka Pasien ahi a, ama ka phat ding hi. Keima in ka pa’ Pasien phatin ama ka liensah ding hi.

³TOPA khu galhang pa hi a; ama’ min khu TOPA ahi hi.

⁴“Ama in tuipi sungah Pharaoh’ leengte le a galkapte sepsuh a, San Tuipi[29] sungah ama’ deiteel uliente a tummang uhi.

⁵Tuihuol in amate khucip a, suongtum bangin a thuhna munah amate a tumsuh uhi.

⁶TOPA aw, na zietlam khut khu thahat sil bawl theina hi a- TOPA aw, na zietlam khut in dogalte a vatmai hi.

⁷A thupi na vanglietna tawh ang langbawlte na bungbulet hi; na lungthahna na lengsah a, tua in hampa bangin amate katumsah hi.

⁸Na husan in tuipi li bang cingsahin, tuihuolpi zong cienphung bangin dingsah hi; tuili lai-a tui thuhte zong a khalh gawpsah hi.

⁹Dogalte in, ‘Ka del ding a, ka nuaphah ding hi, gal vanlahte ka hawm ding a, tuate ka deizaza ka kitan ding hi. Ka namtem ka dawh ding a, amate ka khut tawh ka susie ding hi,’ a ci uhi.

¹⁰Na hui tawh na sem ciengin tuipi in amate a tuomcip hi. Tuipi gimnei sungah amate ngentang bangin a tumsuh uhi.

¹¹“TOPA aw, pasien-te lahah nangma tawh kibang koi om ahei? Sienthona-ah a lien, thupina-ah a lipkhap huoi, na lamdangte a bawl, nangma tawh kibang koi om ahei?

¹²Na zietlam khut na zah a, lei in amate a valtum hi.

¹³“A tul ngai lo na itna tawh nangma in na tatsate na pui a; a siengtho na tenna munah na hatna tawh amate na pui hi.

¹⁴Mite in za-in a kiling vua; Philistia gama tengte, lungkhamna in a tukon hi.

¹⁵Tua ciengin Edom uhpite lungkie-in, Moab makaite zau-in a ling vua; Canaan gam sunga tengte zosie lungkhamin a tuisuoh uhi.

¹⁶Amate tungah zauna le citutna a tung hi. TOPA aw, na mite in a kalsan masang, na tatsa mite in a kalsan masangin, na ban hat ziehin amate suongtum bangin pia loin om uhi.

¹⁷TOPA aw, na ten nadinga na bawlsa mun, TOPA aw, na khut tawh na phusa biehbuh ah, amate na pui a, nangma’ luo muol tungah amate na suon hi.

¹⁸TOPA khu kumtawnin a maang zing ding hi, ci-in la a sa uhi.

¹⁹Pharaoh’ sakolte, a leengte le a leenghawlte tawh tuipi sungah a pei lai-un TOPA in a tung vuah tuipi tuite luongsahkia hi; ahi vangin tuipi laikim leihul tungah Israel-te a pei uhi.

²⁰Tua ciengin Aaron’ sanggamnu kamsang Miriam in a khutah tawm a tawi hi; numei zosie lamin a tawmte utawh a zui uhi.

²¹Amate tungah Miriam in la sa hi: “TOPA kungah la sa un, azieh pen thupi tahin ama a guol zo hi. Ama in tuili lai-ah sakol le a hawlte a sepmang hi,” a ci hi.

²²Tua ciengin Moses in San Tuipi[30] pan Israel-te peipi a, Shur senel gam zuonin a pei uhi. Senel gamah nithum sung lam a pei vua, tui a mu sih uhi.

²³Marah a tun ciengun tui kha ahi ziehin Marah tui a dawn thei sih uhi. Tua ahi ziehin khum mun pen Marah[31] ci-in a min kiphuo hi.

²⁴Moses tungah mite a phun vua, “Bang dawn ding i hi uh ahei?” a ci uhi.

²⁵TOPA kungah ama kiko a, TOPA[32] in ama singthem khat[33] lah hi; ama in tui sungah tua singthem a sep pai leh tuami tui a hlum pai hi. TOPA in khum munah amate dingin thukham khat le ngaina kip khat bawlin khumi munah amate a zelah hi.

²⁶Ama in, “TOPA na Pasien uh’ aw limtah ngai-in ama muna-ah a manin na semin a thupiehte na thudon vua, a thukhamte na zui uleh note tungah Egypt gama ka tunsah natnate khat zong kang tungsah sih ding hi; bangzieh ahei cile kei khu note ang damsah TOPA ka hi hi,” a ci hi.

²⁷Tua ciengin ciatui sawm le ni phulna le lutu kung sawm sagi a pona Elim ah a tung uhi; tuale amate in khum mun tui gei-ah giephuol a sat uhi.