Read Zou PEIKHIETNA 23 Bible Online

PEIKHIETNA 23 - Zou bible

PEIKHIETNA 23

¹A man lo thu na thezah sih ding uhi. Elna tawh teci pang dingin mi gilote tawh na kikhut zop sih ding uhi.

²Sietna bawl dingin mi a tamzaw’ thu na zui sih ding uhi; thu kineina-ah teci na pan ciengun mi a tamzaw lamah pangin thutang na lehei sih ding uhi;

³thu kineina-ah mizawngte zong na angvan tuom sih ding uhi.

⁴Na galte uh’ bawngtang hile a laa hile a gammang na tuokhah uleh na puohkia ding uhi.

⁵Note ang muda pa khat’ laa a van tawh a pua na mu uleh na peisan mawh sih ding vua, a keng tawh a dinkia thei nadingin na hu ding uhi.[56]

⁶Na mipi a zawngte thu kineina tungtangah thutang na lehei sih ding uhi.

⁷A man lo pi-a mi mawsahna khu a gamlapi-ah pelh unlen, maw nei lo pa le midih pa that sih un. Bang ding ahei cile keima in a tatkhiel pa ka suohta sah ding hi.

⁸Guhgol sum in uliente’ mit tawsah a, thuman mite’ thu a lehei ziehin guhgol na la sih ding uhi.

⁹Pemta khat na gawt sih ding uhi; note in pemta’ lungsim na thei uhi, azieh pen note zong Egypt gamah pemta na hi ngai uhi.

¹⁰Kum guh sung na lo vuah khai tu-in a piengte na kaikhawm ding uhi;

¹¹ahi vangin a kum sagina ciengin na mipi uh a zawngte in a neh thei nadingun leitang na tawlngasahin hlaw loin lo na khul ding uhi; gamsate in amate’ nuasie teng ne ding uhi. Na lengga lote ule na olive lote uzong tua bang ma-in na bawl ding uhi.

¹²Ni guh sung na nasep na sem ding vua, ahi vangin na bawngtangte ule na laate uh a khawl thei nading le, na inn sung vua a suoh silate le pemtate in tha tha a nga thei nadingun a ni sagi ni-in na tawlnga ding uhi.

¹³Na kung vua kang gensa zosie thusim unlen, pasien dangte’ min lo kha sih un; na kam panun tuate kizasah sih un.

¹⁴Keima adingin kum khatin pawi thumvei na bawl ding uhi.

¹⁵Tolsaw lo anlum pawi na bawl ding uhi; keima in kang thupieh bangin Abib hla a kisesa hunin ni sagi sung tol saw lo anlum na ne ding uhi, bangzieh ahei cile tua hla sungin Egypt panin note na peikhie uhi. Ka mai-ah khutguoh tawh koima ang kilaa lo ding hi.

¹⁶Lo sunga na tu uh, na na sepna uh a ga masate tawh anlah pawi na bawl ding uhi. Lo sunga khaici na tu hun vua kipanin na sepna uh a ga na kaikhop uh kum tawp ciengin an kaikhopna pawi na bawl ding uhi.

¹⁷TOPA Pasien mai-ah na pasal zosie uh kum khatin thumvei kilaa ding uhi.

¹⁸Tol kisawsa sil khat popo tawh ka biehpiehna si na pieton sih ding vua, ahi sihle ka pawi-a kipie a thaute zingmawng dongin na omsah sih ding uhi.

¹⁹TOPA na Pasien uh’ inn ah leitanga pieng na anpal uh a hoi pen na peipi ding uhi. Api’ nawizu tawh keelno na huontha sih ding uhi.

²⁰Ka bawlsa munah note ang peipi ding le lamkalah ang cing dingin na mai vuah vantungmi khat ka sawl ding hi.

²¹Ama thusimin ama’ aw ngai un; ama ledo sih un. Ama sungah ka min om ahi ziehin ama in na thu palsatte uh ang maisah sih ding hi.

²²Ahi vangin ama’ aw limtahin ngai-in ka thu gen zosie na sep uleh na galte’ gal ka hi ding a, na langte’ lang ka hi ding hi.

²³Na mai vuah ka vantungmi pei-in Amor-te, Hit-te, Perez-te, Canaan-te, Hiv-te le Jebus-te kungah hing peipi-in, amate ka phietmang ciengin,

²⁴a pasien-te uh’ mai-ah kun loin, a na uzong sem loin, amau’ gamtat bangin na gamta sih ding vua, a pasien-te uh suhsiet piehin a milim khuompite uh na satguoi pieh ding uhi.

²⁵TOPA na Pasien uh na bie ding vua, keima[57] in na an ule na tui uh thupha ka pie ding hi; keima in note lah panin natna ka lamang ding hi.

²⁶Na gam sung vuah nausie le a ciing koima om lo ding hi; keima in note kang vuoisi sah ding hi.

²⁷Na mai vuah ka zauhuoina ka sawl ding a, na phuhkhah ding mi zosie lungbuoisahin, na kung panun na galte zosie kihei-in ka taisah ding hi.

²⁸Keima in na mai panun Hiv-te, Canaan-te le Hit-te a notmang dingin natna[58] ka sawl ding hi.

²⁹Leitang gamkhing suohin na langkhat vuah gamsa ang tam luo ding ahi ziehin kum khat sungin na mai panun amate ka notmang sih ding hi.

³⁰Khumi gam a luo khop ding za-a na tam masangun na mai panun them khat khatin amate ka delmang ding hi.

³¹San Tuipi[59] panin Philistia-te’ tuipi dong le senel gam panin Euphrates gun dongin na gamgi uh ka phut ding hi; bangzieh ahei cile keima in na khut sung vuah tua gama tengte kang pie ding a, na mai vuah amate na delmang ding uhi.

³²Amate le a pasien-te utawh thuciemna na bawl sih ding uhi.

³³Na gam sung vuah amate teng lo ding hi. Tua hi sihle amate in kei tungah note ang mawsah ding uhi; bang ding ahei cile a pasien-te uh na bieh uleh tua khu note dingin thangkam khat ang hi tahtah ding hi.