Read Zou PEIKHIETNA 25 Bible Online

PEIKHIETNA 25 - Zou bible

PEIKHIETNA 25

¹TOPA in Moses kungah tam bangin gen hi:

²Keima ading biehna ang peipi nadingun Israel-te kungah gen in; alungtang sungah a pie nuom mi zosie tung panin kei adingin biehna na sang ding hi.

³Amate tung pana na san ding biehna khu tam teng ahi hi: Kham, ngun, sumngo,

⁴a dum, a dupsan, le a ausan puonte le hoitaha kigan puonte, keelmul,

⁵a sana kibum tuutang vunte, savun kizutnem sa,[61] gising,

⁶meivahte ading sathau, nu sathau ding le gimnamtui dingin sil namtuite,

⁷siempu puon le awmdal-a kikhai ding suongsan le onyx suongte ahi hi.

⁸Amate lahah ka ten thei nadingin kei adingin amate mun siengtho khat bawlsah in.

⁹Biehbuh le a vanzah zosie’ lim dan ding tawh kisai-in na kunga kang lah zosie tawh kituohin na bawl ding hi.

¹⁰Amate in gising tawh singkuong khat bawl ding uhi; adung tong ni le alang, avai tong khat le khap, a sanna tong khat le khap hi ding hi.

¹¹Nangma in kham citah tawh tuami singkuong a sung a puo na zut ding a, a tung kimvelah kham tawh a geihuol na bawl ding hi.

¹²Nangma in tua singkuong adingin kham kuol li sungin singkuong keng lite tungah tuate na bul ding a, apang khatah kuol ni, apang lang khatah kuol ni ma na bul ding hi.

¹³Gising singzawl na sui ding a, kham tawh tuate na zut ding hi.

¹⁴Singkuong puoh nadingin singkuong panga a kuolte sungah a zawlte na siet ding hi.

¹⁵Singkuong’ bilte sungah zawlte om suoh ding hi; tuate kilakhie lo ding hi.

¹⁶Nangma in singkuong sungah kang pieh ding thuciemna[62] na koi ding hi.

¹⁷Tua ciengin kham citah tawh hepina topha![63] khat na bawl ding hi; adung tong ni le khap, avai tong khat le khap hi ding hi.

¹⁸Kham Cherub ni na bawl ding hi; hepina topha[64] mong tuohah a kikheng tua Cherub-te na omsah ding hi.

¹⁹Among khatah Cherub khat bawl inlen, among lang khatah Cherub khat ma bawl in; among tuohah Cherub-te na bawl ding a, tuate hepina topha[65] tawh sakhatin na bawl ding hi.

²⁰Cherub-te in a tung lamah a hlate zahin, a hlate tawh hepina topha lie suhin khatlekhat kimaingat ding hi; Cherub-te’ maitang in hepina topha lam nga ding uhi.

²¹Singkuong tungah hepina topha na koi ding a, singkuong sungah nangma kang pieh ding thuciemna[66] na koi ding hi.

²²Hepina topha tung, thuciemna singkuong tunga om Cherub nite kikal panin nang kang kimupi ding a, khumi munah Israel-te adinga ka thupiehte zosie a unpi-in nangma tungah kang pie ding hi.

²³Gising tawh sabuoi khat na bawl ding a, adung tong ni, avai tong khat, a sanna tong khat le khap hi ding hi.

²⁴Kham citah tawh tua sabuoi na zut ding a, a kimvelah kham tawh a geihuol na bawl ding hi.

²⁵Sabuoi kimvelah avai khutpeh cie a pha zawlpeh khat na bawl ding a, tua zawlpeh kimvelah kham tawh a geihuol na bawl ding hi.

²⁶Tua sabuoi adingin kham kuol li na bawl ding a, a ning li, a keng lite-ah na hen ding hi.

²⁷Sabuoi zawn nading zawlte a tu dingin a zawlpeh gei-ah a kuolte om ding hi.

²⁸Gising tawh zawlte bawlin kham tawh na zut ding a, tamte tawh sabuoi kizawng ding hi.

²⁹Gimnamtui adingin kuongdaite le pakante, dawn thei biehna sun nadingin thawlte le haite na bawl ding hi; kham citah tawh tuate na bawl ding hi.

³⁰Keima’ mai sabuoi tungah Ompina Anlum na koi zing ding hi.

³¹Kham citah tawh meivah tunna khat na bawl ding hi. Meivah tunna bul le a kungte pen sehta tawh kikhensa hi ding hi; a haite, a nunte le a papete tua tawh kisamat ding hi;

³²a pangte panin ba guh meng ding a, a pang khatah meivah tunna ba thum mengin, a pang lang khatah meivah tunna ba thum ma meng ding hi;

³³a ba khat ciet tungah a nun le a pape a om almond ga tawh a kibang hai thum, le adang ba khat ciet tungah a nun le a pape a om almond ga tawh a kibang hai thum ma om ding a, meivah tunna panin a ba guh mengkhie ding hi.

³⁴Tua meivah tunna tung mama-ah a nunte le pape khat ciet a nei almond ga tawh a kibang hai li om ding hi.

³⁵A kopa a menkhietna a masa pen nei-ah a nun khat om ding a, a kop nina nei-ah a nun khat ma om ding hi. A kop tawpna nei-ah a nun khat om ding a, meivah tunna panin a ba guh mengkhie ding hi.

³⁶A nunte le a bate kisamat ding a, a unpi-in kham citah tawh kikheng hi ding hi.

³⁷Ama adingin meivah sagi na bawl ding hi; a mai teng a tanvah dingin meivahte kikoi ding hi.

³⁸A meitena taite le a dopna kuongte kham citah hi ding hi.

³⁹A umlebeel zosie kham citah talent khat tawh kibawl ding hi.

⁴⁰Muol tunga kang lah lim dan bangbanga tuate na bawl ding ahi lam thei in.