Read Zou PEIKHIETNA 27 Bible Online

PEIKHIETNA 27 - Zou bible

PEIKHIETNA 27

¹Adung tong nga, avai tong nga a pha maitam khat na bawl ding hi; tua maitam in a kikim ning li nei-in, tong thum sang ding hi.

²Tua maitam ning li teng tungah a ki na bawl ding hi; a kite maitam tawh kicimatin sumngo tawh na zut ding hi.

³Vut khol nading beelte le kawbia-te, kuongte, siakate le vutluona pehte na bawl ding hi; a vanzah zosie sumngo tawh na bawl ding hi.

⁴Tuami-a zah dingin sumngo sialen khat zong na phan ding hi; tua sia-len tunga a ning li tengah sumngo kuol li na vaw ding hi.

⁵Sialen in maitam kimcieng a batsuh thei nadingin maitam zawl nei-ah na bul ding hi.

⁶Maitam dingin gising zawlte na bawl ding a, sumngo tawh tuate na zut ding hi;

⁷a kipuoh ciengin maitam pang nite tungah a zawlte a op thei nadingin a kuol vangte sungah a zawlte kikhum ding hi.

⁸Siapehte tawh maitam a lai pen na hawmsah ding hi. Muol tung nangma kunga ang kilahsa bang lienin tuate kibawl ding hi.

⁹Biehbuh tuol na bawl ding hi. Leitaw lampang in tong zakhat a sau, a kop-a kihiaton vau hoi tawh a kigan a kikhaisuh dalna puonte nei ding hi;

¹⁰a khuompi sawmni le a tunna sawmni pen sumngo tawh kibawl hi ding a, ahi vangin khuomte tunga vankhainate le a gaanate ngun tawh kibawl hi ding hi.

¹¹Leilu lampang zong a sauna tua za ma hi ding a, a kikhaisuh dalna puon tong zakhat hi-in, a khuom sawmni le a tunna sawmnite sumngo tawh kibawl ding a, ahi vangin khuompite tunga vankhainate le a gaanate ngun tawh kibawl hi ding hi.

¹²Nitumna lampangah buhtuol a vailam adingin khuom sawm le a tunna sawm tawh tong sawmnga a sau a kikhaisuh dalna puon om ding hi.

¹³Buhtuol nisuona mailam zong avai tong sawmnga hi ding hi.

¹⁴Pang khatah a kikhaisuh dalna puon tong sawm le nga hi ding a, khuom thum le a tunna thum tawh hi ding hi.

¹⁵A pang langkhatah a kikhaisuh dalna puon pen tong sawm le nga hi ding a, khuom thum le a tunna thum tawh hi ding hi.

¹⁶Buhtuol kotpi dingin tong sawmni a sau, a dum, a dupsan, a ausan, a kop-a kihiation vau hoite tawh a kigan, hieu tawh kikhui-in a kizem kot puonkhai khat om ding hi; tua in khuom li le a tunna li nei ding hi.

¹⁷Buhtuol kimvela khuom zosie ngun tawh kigah ding hi; a vankhainate ngun hi-in a tunnate sumngo hi ding hi.

¹⁸Buhtuol adung tong zakhat, avai tong sawmnga, a sanna tong nga hi ding a, a kop-a kihiaton vau hoi tawh a kigan a kikhaisuh dalna puon le sumngo tawh kibawl a tunnate tawh hi ding hi.

¹⁹Biehbuh sunga vanzah ding poma, a khetphim zosie le buhtuol-a khetphim zosie sumngo tawh kibawl hi ding hi.

²⁰Meivah a kuon zing thei nadingin, mei-a vah ding a kigawtguoi olive ga, sathau siengtho, Israel-te in nangma kungah ang tawi nadingin thu na pie lai ding hi.

²¹Tua meivah a kuon zing thei nadingin Aaron le a tapate in kikhopna puonbuh sung, thuciemna singkuong[71] mai-a dalna puon pulamah, nitah pan zingmawng dongin TOPA mai-ah vil ding uhi. Tua khu a khantan vua Israel-te in a zui ding uh ngaina kip khat hi ding hi.