Read Zou PEIKHIETNA 29 Bible Online

PEIKHIETNA 29 - Zou bible

PEIKHIETNA 29

¹Amate in ka siempu na a sep thei nadingun a tung vuah siensuona tam bangin na bawl ding hi. Paubaang lo bawngtangno khat le tuutang ni,

²tol saw lo anlum, sathau kihal tol saw lo mohte, sathau tawh a kizut tol sawlo mophengte la in. Tuate pen mangbunel tawh na bawl ding hi.

³Law khat sungah tuate na koi ding a, a law tawh tawi-in bawngtang le tuutang ni zong na peipi ding hi.

⁴Kikhopna puonbuh kotbiengah Aaron le a tapate na zawpi ding a, tui tawh amate na sil ding hi.

⁵Tua ciengin puonte la-in, puon tungsil le siempu puontuolpi, siempu puon le awmdal, Aaron na silsah ding a, hoitaha kigan siempu puon gaana tawh ama na gah ding hi;

⁶a lu tungah diel na khimsah ding a, dielkhim tungah kumpi lukhu siengtho na khusah ding hi.

⁷Nu sathau la-in a luzangah sungsuhin na nu ding hi.

⁸Tua ciengin a tapate zawpi-in puontungsil na silsah ding a,

⁹kawnggahte[75] tawh gahin, a lutung vuah lukhute na khusah ding hi; tawntung ngaina kip a omsa ma bangin siempu nasepna pen amau-a’ hi ding hi. Tua bangin Aaron le a tapate na sudet ding hi.

¹⁰Kikhopna puonbuh mai-ah bawngtang na peipi ding hi. Aaron le a tapate in bawngtang’ lu tungah a khut uh ngam ding a,

¹¹TOPA mai, kikhopna puonbuh lutna mai-ah tua bawngtang na go ding hi.

¹²Bawngtang si themkhat la-in na khutme tawh maitam kite tungah na nu ding a, a omlai a si teng zosie maitam zungah na sung ding hi.

¹³A gilpi tuom a thau zosie le a sin tuom a tepkai le a kal ni le a kal tuom a thaute la-in maitam tungah tuate na hal ding hi.

¹⁴Ahi vangin bawngtang sa le a vun le a eehte, giephuol pu lamah mei tawh na hal ding hi; tua khu mawna zieha biehna ahi hi.

¹⁵Tua ciengin tuutangte khat la-in Aaron le a tapate in tuutang luzangah a khut a ngam ding vua,

¹⁶tuale tuami tuutang go-in a si la-in maitam kimvelah na the ding hi.

¹⁷Tua ciengin tuutang semnenin a sungkuo le a kengte na sawp sieng ding a, a sabate le a lu tawh tuate koitonin,

¹⁸maitam tungah tuutang sa a unpi-in na hal ding hi; tua khu TOPA tunga meihal biehna hi ahi a; a gimnamtui, TOPA tunga mei tawh kihal biehna ahi hi.

¹⁹Tuutang adang khat na la ding hi; tuale Aaron le a tapate in a luzangah a khut uh ngam ding a,

²⁰tua tuutang go-in a si them khat la-in Aaron’ zietlam bildawn, a tapate’ zietlam bildawn, amau’ zietlam khutpi dawn le amau’ zietlam kepi dawnte nu-in, a si omlai teng maitam apang zosie-ah na the ding hi.

²¹Tua ciengin maitam tunga om gansi themkhat le nu sathau themkhat la-in Aaron le a puonte tung le a tapate le a puonte tungah na the ding hi; tua ciengin ama le a puonte a siengtho hi ding a, a tapate le a tapa’ puonte zong a siengtho hi ding hi.

²²Tuutang thau, a mei thau, a sungkuo tuom a thau, a sin tunga beh a tepkai, a kalgel a tuom a thau, le a phei zietlam (azieh pen tua khu suhdetna tuutang ahi hi)

²³le TOPA mai-a om tol saw lo anlum law sung panin anlum khat, sathau tawh kibawl anlum beh khat, le mopheng khat na la ding hi;

²⁴tam teng pen a unpi-in Aaron’ khutphang le a tapate’ khutphang tungah na koi ding a, TOPA mai-ah a kivei biehna dingin tuate na lamto ding hi.

²⁵Tua ciengin a khut sung panun tuate na la ding a, TOPA mai-ah a namtui dingin gimnamtui meihal biehna maitam tungah mei tawh na haltum ding hi. Tua khu TOPA tunga mei tawh kihal biehna ahi hi.

²⁶Aaron suhdetna dinga kigo tuutang’ awmpheu la-in TOPA mai-ah a kivei biehna-in na lamto ding hi; tua khu nangma’ tanh hi ding hi.

²⁷A kivei biehna dinga kilamto a awmpheu le suhdetna biehna tuutang pana Aaron le a tapate tanh ding ahi a kivei biehna dinga kilamto a mal na siensuo ding hi.

²⁸Tam teng pen Aaron le a tapate dinga Israel-te tung pana a kaih zing ding uh ahi hi, azieh pen tami khu biehna khat ahi hi; tua khu Israel-te in TOPA tunga thunuom biehna dinga a pieh uh a biehpiehna uh pana biehna khat hi ding hi.

²⁹A siengtho Aaron’ puonsilte pen ama’ si nua ciengin a tapate kipie ding hi; tua puonte sungah amate sathau kinu-in kisudet ding hi.

³⁰Ama’ siempu za a laih a tapa in siengtho munah na sem dingin kikhopna puonbuh ah a pei ciengin ni sagi sung tua puonte sil ding hi.

³¹Suhdetna tuutang na la ding a, mun siengtho khatah a sa na huon ding hi;

³²Aaron le a tapate in kikhopna puonbuh lutna-ah tuutang sa le law sunga anlum ne ding uhi.

³³Amate mama in kisuhdet nading le kisiensuo nadingin thoidamna an a ne ding vua, hizongle midangte in ne thei lo ding hi. Azieh pen tuate a siengtho ahi hi.

³⁴Suhdetna sa ahi a, anlum ahi zongin zingmawng donga a op lai leh aval teng mei-ah na haltum ding hi; tua khu a siengtho ahi ziehin kine lo ding hi.

³⁵Kang thupiehsa bang lienin Aaron le a tapate tungah na bawl ding hi; ni sagi sung tungtawn amate na sudet ding hi.

³⁶Thoidamna bawl nadingin mawna zieha biehna-in bawngtang khat zong nisielin na pie ding hi. Thoidamna na bawl ciengin maitam adingin zong mawna zieha biehna na pie ding a, tuale maitam sathau nu-in na siensuo ding hi.

³⁷Maitam adingin ni sagi sung thoidamna bawlin na siensuo ding a, tua maitam a siengtho pen hi ding hi; tua maitam a tham poma siengtho ding hi.

³⁸Tu-in maitam tunga na pieh ding tam teng ahi hi: Nisielin kum khat a pha tuuno ni ta na pie ding hi.

³⁹Zingmawngin tuuno khat na pie ding a, nitah lamin adang tuuno khat na pie ding hi;

⁴⁰tuuno a masa tawh olive thau kigawtvui hai khat’ seli-suo-sekhat tawh kihal annel law khat’ sesawm-suo-sekhat, le dawn thei biehna dingin lenggazu hai khat’ se li-suo-se khat hi ding hi.

⁴¹Nitah lamin tuuno adang khat na pie ding a, zingmawnga bang ma-in a gimnamtui ding, TOPA tungah mei tawh kihal biehna dingin an tawh biehna le dawn thei biehna na piehtha ding hi.

⁴²Tua khu na khang tawntung vua kikhopna puonbuh lutna TOPA mai-a na bawl zing ding uh meihal biehna hi ding a, keima in khum munah hing kimupi-in kang holimpi ding hi.

⁴³Khum munah Israel-te ka kimupi ding a, keima’ vang in khum mun ka siengthosah ding hi;

⁴⁴kikhopna puonbuh le maitam ka siensuo ding hi; ka siempu na sem dingin Aaron le a tapate zong ka siensuo ding hi.

⁴⁵Israel-te lahah ka teng ding a, amau’ Pasien ka hi ding hi.

⁴⁶Amate lahah ka ten thei nadingin Egypt gam pana a peipi pa TOPA a Pasien uh ka hi lam amate in ei thei ding uhi; Keima amau’ TOPA ka hi hi.