Read Zou PEIKHIETNA 3 Bible Online

PEIKHIETNA 3 - Zou bible

PEIKHIETNA 3

¹Moses in Midian-te’ siempu ahi a sungpa Jethro’ tuuhonte a cing hi. Ama in gamlah nitumna lamah a tuute peipi a, Pasien’ muol Horeb a tung hi.

²Khum mun sawlbawh lah meikuong sung panin ama kungah TOPA’ vantungmi kilang hi; ama in a et leh tua sawlbawh kuong a, hinanle a katum sih hi.

³Tua ciengin Moses in, “Kei va pei-in tami ka sil mu lamdang ka en ding a, bang dinga sawlbawh katum lo ahei ci ka va kan ding hi,” a ci hi.

⁴A en dinga ama a peina TOPA in a mu bepin Pasien in sawlpang kawm panin ama hlan a, “Moses, Moses!” ci hi. Ama in, “Tanah om ing,” a ci hi.

⁵Tua ciengin ama in, “Ei nai sin! Na kenga na kedapte sutdawh in, azieh pen tua na dinna mun khu mun siengtho ahi hi,” a ci hi.

⁶Ama in, “Keima in na pa’ Pasien, Abraham’ Pasien, Isaac’ Pasien, le Jacob’ Pasien ka hi hi,” a cibe lai hi. Moses in Pasien a et ngam lo ziehin a mai a hum hi.

⁷Tua ciengin TOPA in, “Egypt gama ka mite thuoh gimna ka mu zo ta hi; amate tunga nasem uhte ziehin keima in a kikona uh aw ka za zo hi. A thuoh uh gimnate ka thei a,

⁸Egypt-te khut sung panin amate a hunkhie ding le khum gam panin a hoi a tanzau leitang, bawngnawi le khuoizu a luonna leitang, Canaan-te, Hit-te, Amor-te, Perez-te, Hiv-te le Jebus-te’ opna munah amate a peipi dingin kang peisuh zo hi.

⁹Tu-in ka kungah Israel-te kikona ang tung zo a, Egypt-te in amate a gawtna ka mu zo hi.

¹⁰Tuaci’n hing pei-in Egypt panin ka mi Israel-te a peipi dingin Pharaoh kungah kang sawl ding hi,” a ci hi.

¹¹Ahi vangin Moses in Pasien kungah, “Kei koi ka hi a, Pharaoh kungah pei-in Egypt panin Israel-te va peipi ta ding ka hei?” a ci hi.

¹²Ama in, “Nangma tawh kang omton ding hi; tami khu nangma ang sawl keima ka hina lim hi ding hi: Egypt panin Israel-te na peipi zaw ciengin tami muol tungah Pasien na bie ding hi,” a ci hi.

¹³Ahi vangin Moses in Pasien kungah, “Israel-te kungah pei inlen amate kungah, ‘Na pate uh’ Pasien in na kung vuah ei sawl hi,’ vaci taleng amate in, ’A min bang ahei?’ ci-in ei dong uleh amate kungah bang ka gen ta diei?” a ci hi.

¹⁴Pasien in Moses kungah, “KEIMA AHI KEIMA ka hi hi,” a ci hi.[5] Ama in, “Israel-te kungah, ‘KEIMA a kici pa in na kung vuah keima ei sawl hi,’ ci-in tam bangin na gen ding hi,” a cibe lai hi.

¹⁵Pasien in zong Moses kungah, “Tam bangin Israel-te kungah, ‘TOPA,[6] na pate uh’ Pasien, Abraham’ Pasien, Isaac’ Pasien, le Jacob’ Pasien in na kung vuah kei ei sawl hi,’ na ci ding uhi: Tam pen keima min’ hi tawntung ding a, tam pen khang tawntungin ei kilawna hi ding hi.

¹⁶Pei-in Israel upate khawm inlen a kung vuah, “TOPA, na pu na pate uh’ Pasien, Abraham’ Pasien, Isaac’ Pasien le Jacob’ Pasien keima tungah ang kilah zo hi. Egypt gam sungah na tung vua ang kibawlna ka mu zo hi.

¹⁷Egypt’ gimna panin Canaan-te, Hit-te, Amor-te, Perez-te, Hiv-te le Jebus-te’ leitang, bawngnawi le khuoizu luonna leitangah note kang peipito ding hi,’ ci hi,” va ci ta’n.

¹⁸Amate in na thu ang ngai ding uhi; tuale Egypt kumpipa kungah nang le Israel upate pei-in ama kungah, “TOPA ahi Hebrew mite’ Pasien in kote ei kimupi zo hi; ka Pasien uh ahi TOPA tungah biehna ka lui thei nadingun ni thum peina gamlahah ei peisah in,’ va ci ta un.

¹⁹Hizongle khut thahat khat’ paubawlna longal tawh Egypt kumpipa in note ang peisah lo ding lam ka thei hi.[7]

²⁰Tuaci’n ka khut zahin tua sunga ka bawl ding na lamdangte tawh Egypt-te ka vatmai ding hi; tua zaw ciengin ama in note ang peisah ding hi.

²¹Keima in Egypt-te muna-ah tam mihingte maipha ka pie ding hi. Na pei ciengun khut guoh tawh na pei sih ding uhi;

²²numei a kici poma in a vengte le a inn sunga zintungte kung panin ngun le kham tawh kibawl kizepnate le puonsil nihtente a ngen ding vua, na tapate le na tanute na silsah ding uhi; tua bangin note in Egypt-te’ van na lahpieh ding uhi,” a ci hi.