Read Zou PEIKHIETNA 32 Bible Online

PEIKHIETNA 32 - Zou bible

PEIKHIETNA 32

¹Muol tung panin Moses a kumsuh ha lam mite in a thei ciengun Aaron kimvelah kikhawmin ama kungah, “Hing pei inlen, kote dingin ka mai vua pei ding pasien-te ei bawlpieh in; Egypt gam pan ei peipito pa Moses lah bang suoh ta ahei ka thei sih uhi,” a ci uhi.

²Aaron in amate kungah, “Na zite, na tapate ule na tanute uh’ bil tunga a ba uh kham bilbate sutdawh unlen ka kungah tuate hing peipi un,” a ci hi.

³Tuaci’n mi zosie in a bil vua a ba uh kham bilbate a sutdawh vua, Aaron kungah tuate a peipi uhi.

⁴Ama in amate kung panin kham la-in sumtui sunna[87] sungah a sung a, bawngno lim khat a bawlpieh hi; tuale amate in, “Israel aw, tamte khu Egypt leitang pana ang peipito na pasien-te uh ahi hi!” a ci uhi.

⁵Aaron in tua a mu bepin a mai-ah maitam khat a lam hi; tuale Aaron in tangtawh a, “Zing cieng pen TOPA ading pawi bawl ni hi ding hi,” a ci hi.

⁶Zingmawngin amate tho bai-in meihal biehnate a lui vua, thunuom biehnate a peipi uhi; tuale anne tuidawn dingin mite a to vua, zu khamin numei le pasal guolnuomin a thangtat uhi.

⁷TOPA in Moses kungah, “Thakhatin kumsuh in! Egypt leitang pana na peitopi na mite a lelamin a gamta sieng ta uhi;

⁸ka thupieh lampi panin amate a piel zuai ta uhi; amate dingin a kituisun bawngno lim khat bawlin tua tungah biehpiehna lui-in a bie vua, tuale ‘Israel aw, tamte khu Egypt leitang pana ang peipito na pasien-te uh ahi hi!’ ci uhi,” a ci hi.

⁹TOPA in Moses kungah, “Keima in tam mite bang zatahin ngawngkhauh ahi uh ahei ci ka mu zo hi.

¹⁰Keima in amate tungah ka sinso-in ka manthaisah nadingin kei guohin ei omsah un. Nang na hi leh minam lien khatin kang bawl ding hi,” a ci hi.

¹¹Ahi vangin Moses in TOPA a Pasien kungah thum vangut a, “TOPA aw, nangma in na vanglietna le na banhat tawh Egypt leitang pana na peipi na mite tungah bang dingin sinso ding na hei?

¹²Bang dingin Egypt-te in, ‘Muol tunga a tha ding le lei maitang pana a suhmaimang dinga ngaisutna gilo tawh amate a peipi hi bo,’ ci ding uh ahei? A zauhuoi na lungthahna panin kihei in; na lungsim khelin na mite tungah gimna tungsah vawt sin.

¹³Amate tungah nangma ma na kiciem a, ‘Na suon na hlahte van tunga aasi za-in tamsahin, ka ciemsa tam leitang zosie na suon na lahte tungah a unpi-in ka pie ding a, amate in tua leitang a luo zing ding uhi,’ ci-a na genna na nasemte Abraham, Isaac, le Israel hing phawh bo in,” a ci hi.

¹⁴Tuale TOPA a lungsim kikhelin a mite tunga a tunsah sawm sietna a tungsah nawn sih hi.

¹⁵Tua ciengin Moses kihei-in a khut sunga om thuciemna[88] suongpeh ni, a pang langni tuoh, a nua le ama-a kigiel suongpehte tawi-in muol tung panin a kumsuh hi.

¹⁶Suongpehte ahile Pasien’ bawl ahi a, suongpehte tunga kikhuoh laigielte zong khu Pasien’ laigiel ahi hi.

¹⁷Joshua in mite kiko gamlumna a zah ciengin Moses kungah, “Giephuol ah gal kidona aw ging hi,” a ci hi.

¹⁸Hinanle ama in, “Tua khu a zote’ awging hi lo a, a lelte’ awging zong hi lo hi; kei zah pen mi guolnuomte’ kikona awging ahi bo hi,” a ci hi.

¹⁹Giephuol nai a tun lien tahin ama in bawngno le lamvuikai mipite mu a, Moses a lungthah sengin a khut sung panin suongpehte a paimang a, muol bulah a tawkeh hi.

²⁰Ama in a bawlsa uh bawngno la-in mei tawh hal a, gawtvui-in tui tungah thezah a, Israel-te in tua tui a dawnsah hi.

²¹Moses in Aaron kungah, “A tung vua mawna lienpi na tunsah nadingin tam mite in na tungah bang ang bawl uh ahei?” a ci hi.

²²Tuale Aaron in, “Ka TOPA aw, kilungsosah seng sin; sietna bawl ding mite a uh lam na theisa ahi hi.

²³Amate in keima kungah, ‘Ka masang vua a pei ding pasien-te ei bawlpieh in; Egypt gam pana ei peipito tami Moses lah bang suoh ta ahei ka thei zo ta sih uhi,’ ei ci uhi.

²⁴Tuaci’n keima in amate kungah, ‘Kham nei popo in hing sutdawh ta un!’ ka ci hi; tuaci’n amate in keima kungah tuate ei pie vua, mei sungah ka sep leh tami bawngno lim ang suoh hi bo!” a ci hi.

²⁵Moses in mipite’ phengtatnate a mu bepin (azieh pen Aaron in a galte uh’ simmaw nuisat dingin amate a na phengtatsah hi),

²⁶giephuol tunkotah Moses ding a, “TOPA lamah koi teng na pang vuoi? Keima kungah hing pei un!” a ci leh ama kimvelah Levi’ tapate a unpi-un a kikhawm pai uhi.

²⁷Tuale ama in a kung vuah, “TOPA, Israel-te’ Pasien in, ‘No a koimapo in na pang vuah namsau kikuo ciet un! Giephuol cin tengah tunkot khat pan tunkot khatah kile kawikawi unlen, a koimapo in na sanggampa, na guolpa, le na vengpa that ciet un,’ ci hi,” a ci hi.

²⁸Moses’ thupieh bangin Levi mite a gamta vua, khum ni-in mihing tul thum bang a si hi.

²⁹Moses in, “Tuni-in na tung vuah thupha ang tunsah thei nadingin note khat ciet in na tapa uh ahi a, na tanu uh ahi zongin na suplaw vua, TOPA na sem dingin noma le noma[89] na ki-ap uhi,” a ci hi.

³⁰A zing ni-in Moses in mite kung ah, “Mawna lienpi khat na bawl zo uhi. Hinanle TOPA kungah tu-in ka peito ding a, na mawna ziehun thoidamna ka bawl kha thei ding hi,” a ci hi.

³¹Tuaci’n TOPA kungah Moses kilekia a, “Ala, tam mite in mawna lienpi khat bawl zo uhi; amate adingin kham pasien-te bawl tawm uhi.

³²Ahi vangin tu-in a mawna uh maisah in, na maisah zawh sih ding leh nangma’ gielsa laibupi panin ka min ei phiet dawh ta’n,” a ci hi.

³³Ahi vangin TOPA in Moses kungah, “Ka tunga ang maw poma ka laibu panin ka phiet ding hi.

³⁴Ahi vangin tu-in pei inlen na kunga kang gensa munah mite peipi in; en in, na mai-ah ka vantungmi ang pei ding hi. Hizongle daantat ni ding ang tun ciengin a mawna ziehun amate ka daantat ding hi,” a ci hi.

³⁵Tua ciengin Aaron’ na bawlsa bawngno tungah amau’ gamtatnasate ziehin mite tungah TOPA in pul natna a tungsah hi.