Read Zou PEIKHIETNA 34 Bible Online

PEIKHIETNA 34 - Zou bible

PEIKHIETNA 34

¹TOPA in Moses kungah, “A masa tawh a kibangin suongpeh ni sui inlen, na tawhkehsa amasa suongpehte tunga kigiel thute ma tua suongpehte tungah ka giel ding hi.

²Zingmawngin kithawi-in Sinai Muol tungah peito inlen, muol dawn khum mun keima kungah nang mama hing kilah in.

³Nangma tawh koima hing katosah sin len, muol tung zosie tengah koima hing omsah sin; tua muol mai-ah tuuhon hitale, bawnghon hitale gamtasah sin,” a ci hi.

⁴Tuaci’n Moses in a masa bangin suongpeh ni a sui hi; tuale zingmawngin ama thobai a, TOPA thupiehsa bangin a khut sungah suongpeh ni tawi-in Sinai Muol tungah a kato hi.

⁵Meii lahah TOPA kumsuh a, ama tawh khum munah dingtonin a min, “TOPA,”[91] ci-in a pulah hi.

⁶Ama mai-ah TOPA pei a, “TOPA, TOPA, hepi siem le khuotuo siem Pasien, lungthah bailo-in itna kip le muonhuoina tawh a kidim,

⁷a khang tul khatna[92] dongin itna kip nei-in, khielna, thupalsatna le mawna a ngaidam, hinanle mawna mawh maisah loin, pate’ khielna tate tung le tute tungah, khang thum khang li donga a thuh pa,” ci-in a pulah hi.

⁸Tuale Moses in leilam nga-in a lu naw kunsuhin a bie hi.

⁹Ama in, “Tu-in nangma muna-ah maipha ka nga leh TOPA aw, kang thum hi, kote tawh TOPA hing pei in. Tam mite ngawngkhauh minam ahi zongun ka khielna ule ka mawna uh ei ngaidam inlen, na gouluo dingin kote ei la in,” a ci hi.

¹⁰Ama in tam bangci hi: Keima in thuciemna khat ka bawl hi. Nangma’ mite zosie mai-ah leitung muncin tenga a om minam khatpo tunga a kibawl ngai nai vawt lo na lamdangte ka bawl ding hi; amate lahah na tenna uh mi zosie in TOPA’ nasepna a mu ding uhi; azieh pen note tunga ka sil bawl ding pen a zauhuoi mama ahi hi.

¹¹Tuni-a kang thupieh khu zui in. En in, na mai-ah Amor-te, Canaan-te, Hit-te, Perez-te, Hiv-te, le Jebus-te ka notmang ding hi.

¹²Na peina ding gama a teng mite tawh thuciemna na bawl khah lo nadingin kidawm in. Na bawl khah leh note dingin awna thang a suoh ding hi.

¹³A maitamte uh na phel ding vua, a biehna songte uh kuoitawngin a siengtho a khuomte uh[93] zong na satpua ding hi.

¹⁴(Pasien dang na bie sih ding hi. Azieh pen ama’ min Thangsie ahi TOPA khu a thangsie Pasien ahi hi).

¹⁵Tua gama teng mite tawh thuciemna na bawl sih ding hi. Bang ding ahei cile amate in a pasien-te utawh pahtatna bawlin a pasien-te uh kungah a kithoi ciengun amate lahah mi pawlkhat in ang hlan ding vua, a siemsa uh na ne kha ding uhi.

¹⁶Na tapate uh’ zi dingin a tanute uh la-in, tuale a pasien-te utawh pahtatna a bawl a tanute un na tapate uh pen a pasien-te utawh ang pahtatsah kha ding uhi.

¹⁷A kisung pasien-te na bawl sih ding uhi.

¹⁸Tolsaw lo anlum pawi na bawl ding uhi. Abib hla, a kisesa hun sung tengin kang thupieh bangin ni sagi sung tol saw lo anlum na ne ding uhi; bangzieh ahei cile note Abib hla sungin Egpyt panin na peikhie uhi.

¹⁹Naubu a hong masa pen na ganhingte uh, bawng le tuu tacil apa zosie keima-a’ ahi hi.

²⁰Laa a tacil tuuno khat tawh na tanh ding vua, na tat sih uleh a ngawng na hiatawng ding uhi. Na tacilte zosie uh na tanh ding uhi. Khut guoh tawh koima ka mai-ah hing kila lo ding hi.

²¹Ni guh sung na na sem ding vua, ahi vangin a ni sagi ni-in na tawlnga ding uhi; lohlaw hun le anlah hun sung na ngawnin na tawlnga ding uhi.

²²Nipikalte’ pawi, mangbu a tung masa pawi, le kumbei an kaikhop pawi na bawl ding uhi.

²³Na pasalte a unpi-un Israel Pasien ahi TOPA Pasien mai-ah kum khatin thumvei kilaa ding uhi.

²⁴Bangzieh ahei cile na masang vuah minam dangte ka notmang ding a, na gamgi uh ka golkeh ding hi; TOPA na Pasien uh mai-ah kum khatin thumvei a kilaa dingin na peito sungun koima in na leitang uh ang deigaw sih ding hi.

²⁵Tol tawh ka biehpiehna sisan na pieton sih ding vua, zingmawng dongin peisan pawi biehpiehna kikoi lo ding hi.

²⁶Na leitang vua a pieng a gamasate lahah a tuituoh pen TOPA na Pasien uh’ inn ah na peipi ding uhi. Api’ nawizu tawh keelno na huontha sih ding uhi.

²⁷TOPA in Moses kungah tam bangin gen hi: “Tam thute giel in; tam thute tawh kituohin nangma le Israel tawh thuciemna khat ka bawl zo hi.

²⁸Khum munah ni sawmli le zan sawmli sung TOPA tawh Moses omton hi; ama an ne lo tuidawn loin a om hi. Tuale ama in suongpehte tungah thuciemna kammalte ahi thupieh sawmte[94] a giel hi.

²⁹Moses in a khut sungah thuciemna[95] suongpeh ni tawi-in Sinai Muol tung pan a kumsuh ciengin, Pasien tawh ama a va kiho zo ziehin a maivun a tan lamtah Moses in a thei sih hi.

³⁰Aaron le Israel mi zosie in Moses a mu ciengun a maivun taang a, ama kungah a pei ngam sih uhi.

³¹Ahi vangin Moses in amate hlan hi; tuale Aaron le mihon makaite zosie zong ama kungah a peikia vua, Moses in amate a hopi hi.

³²Tua zaw ciengin a nai-ah Israel-te zosie a pei vua, ama in TOPA in Sinai Muol tunga ama kunga a gen zosie thupiehna-in amate tungah a pie hi.

³³Moses in amate a hopi zaw ciengin maikhuna khat tawh a maitang a khu hi;

³⁴ahi vangin TOPA tawh holim dingin ama mai-ah Moses a tum sielin a pusuokia masangsie a maikhuna a ladawh hi; ama pusuohin Israel-te kungah ama tunga kipie thute a gen ciengin,

³⁵Israel-te in Moses’ maivun taang mu uhi; tuale ama tawh kiho dinga a pei masangsie-in Moses in maikhuna tawh a mai a khukia hi.