Read Zou PEIKHIETNA 35 Bible Online

PEIKHIETNA 35 - Zou bible

PEIKHIETNA 35

¹Moses in Israel mihon zosie a khawm a, amate kungah thu a gen hi: Tam teng khu TOPA in na bawl ding vua ang thupieh ahi hi:

²Ni guh sungin nasep kiman ding a, hinanle a ni sagi ni-in TOPA tungah a thupi tawlngahna sabbath siengtho na nei ding uhi. Khum ni-in na khat a sem poma kithat ding hi.

³Sabbath ni-in na tenna uh mun zosie-ah mei na taw sih ding uhi.

⁴Moses in Israel mihon zosie tungah thu gen hi: Tami khu TOPA ang thupieh ahi hi.

⁵Note lah panin TOPA tunga pieh ding biehna pie un; kiphalna lungtang a nei poma in TOPA’ biehnate hing tawi uheh. Tuate pen: kham, ngun le sumngo,

⁶a dum, a dupsan, a ausan khaute le hoitaha kigan puon; keelmul,

⁷a san-a kibum tuutang vunte le savun hoite[96]; gising,

⁸meivah ading sathau, nu sathau le a tuinam dingin gimnamtuite,

⁹siempu puon le a awmdala bul dingin onyx suong le suong dangte ahi hi.

¹⁰Note lahah siemna nei zosie hing pei-in a bawl ding uh TOPA’ thupieh zosie pen: biehbuh,

¹¹a puonbuh le a tung khuna, a vankhainate le a khuompehte, a zawlte, a khuomte, le a tunnate;

¹²singkuong a zawlte tawh, hepina topha,[97] le kotkhah puonkhai;

¹³sabuoi a zawlte le a vanzah zosie tawh, le Ompina Anlum;

¹⁴mei tan nading meivah tunna zong, a vanzahte le a meivahte tawh, le meivah ding sathau;

¹⁵le panamtui maitam a zawlte tawh, nu sathau le a tuinam gimnamtuite le biehbuh kotbienga zah ding puonkhai;

¹⁶meihal biehna maitam, sumngo sialen, a zawlte, a vanzahte zosie, kuong le a ngahna tawh;

¹⁷buhtuol-a puonkhaite, a khuomte le a tunnate tawh, le buhtuol tunkot ading puonkhai;

¹⁸biehbuh khetphimte, huong khetphimte, le a khauhuolte;

¹⁹mun siengtho sunga na sep cienga zah ding hoitaha kigan puonte, siempu Aaron le a tapate in siempu a sep cieng vua a sil ding uh puon siengthote ahi hi.

²⁰Tua ciengin Moses opna panin Israel mihon zosie a peikhie uhi.

²¹Tuale a lungtang a sukha le piehnopna lungsim a nei poma a pei vua, kikhopna puonbuh le a nasep nading zosie, le puon siengthote-a zah dingin, TOPA’ biehna a tawi uhi.

²²Tuaci’n piehnopna lungtang a nei zosie, numei pasal pei-in samkilte, bilbate, min gielna khutsipte, le khibate le kham vanzah kisiemna cinteng a peipi vua, a milipin TOPA kungah kham biehna a puoh uhi.

²³A dum, a dupsan, a ausan vauzamte, puon hoi, keelmul, a san-a kibum tuutang vunte, ahi sihle savun hoite[98] ahi zongin a nei mi poma in tuate a tawi uhi.

²⁴Ngun ahi a, sumngo ahi zongin, a pie zo tapo in TOPA’ biehna-in tuate a peipi uhi; nasepna kimang thei ding gising nei zosie in zong a peipi uhi.

²⁵Numei khutsiem zosie in a khut utawh pat a heh vua, amate hehsa a dum, a dupsan, a ausan vauzamte le hoitaha kigan puonte a peipi uhi;

²⁶a khutsiemnate uh zah nopna lungtang a nei numei zosie in keelmul a gan uhi.

²⁷Makaite in siempu puon le awmdala bul dingin onyx suong le suong dangte a peipi vua,

²⁸gimnamtui le meivaha thal ding sathau, nu sathau, le gimnamtuite a peipi uhi.

²⁹TOPA in Moses tungtawnin sep dinga a thupiehsa nasep nadingin pieh nopna lungtang a nei Israel numei pasal zosie in TOPA tungah nop thu-a biehna-in tuate a peipi uhi.

³⁰Tua ciengin Moses in Israel-te kungah thu gen hi: En un, TOPA in Judah minam, Hur’ tapa, Uri’ tapa Bezalel a minin hlan zo hi;

³¹TOPA in Pasien’ hlagau[99] tawh ama kidimsah zo a, lim hoite a gel ding, kham, ngun, le sumngo tawh na a bawl ding, bul ding suong a seh ding, singzep nasep a sem ding, le khutsiem nasep zosie a sem thei dingin siemna, pilna, le khutsiemna zosie sep theina a pie zo hi.

³⁴TOPA in ama le Dan minam Ahisamach’ tapa Oholiab tungah midangte hilsawn theina a pie zo hi.

³⁵Ama in khutsiem nasep, gelsiem nasep, a dum, a dupsan, a ausan khaute le hoitaha kigan puon, ahi sihle puonzep siem nasep; siemgat siemna, le gelsiemna nasep ahi zongin nasep namkim a sem dingin a tung vuah siemna a guon hi.