Read Zou PEIKHIETNA 39 Bible Online

PEIKHIETNA 39 - Zou bible

PEIKHIETNA 39

¹Siengtho muna nasep nadingin amate in a dum, a dupsan, a ausan vauzamte tawh a kilimgat puon a bawl uhi; TOPA in Moses a thupiehsa bangin Aaron adingin puonsil siengthote a gatpieh uhi.

²Ama in kham, a dum, a dupsan, a ausan vaute le a kop-a kihiaton vau hoite tawh a kigan puonte tawh siempu puon a bawl hi.

³A dum, a dupsan, a ausan tuumul vauzamte le a kop-a kihiaton vau hoite tawh a kigan puonte, siemnel taha a kizep nadingin, khampehte a pa dihdehin kisehin, a themthemin khauzamin ki-atsan hi.

⁴Amate in siempu puon dingin liengkaih puon bawlin among nite gelah a zom uhi.

⁵TOPA in Moses a thupiehsa bangin a kiga nadingin a kilimgat tua tunga puon om pen kham, a dum, a dupsan, a ausan tuumulte, vaute le a kop-a kihiaton vau hoite tawh a kigan puonte tawh kibawl hi; a vanzahte le a sep dan pen a kibang ahi hi.

⁶Israel tapate phaza tawh kizui-in onyx suongte kitat a, tua suongte tunga khutsip tungah min a kikhetkuoh bangin minte kikhenkuoh a, tuaci’n kham tawh kibawl a zepna sungah kikoi hi.

⁷TOPA in Moses a thupiehsa bangin ama in Israel tapate phawna suong dingin siempu puon’ liengkaih puon tungah tua suong tegel bul hi.

⁸Ama in siempu puon bangin kham, a dum, a dupsan, a ausan tuumul khaute le a kop-a kihiaton vau hoite tawh a kigan puonte tawh siemnel tahin awmdal a bawl hi.

⁹Tua awmdal in a kikim ning li nei a, tua awmdal pen thuop ni-in kibawlin adung khap khat, avai khap khat pha hi.

¹⁰Amate in tuami sungah suong guol li-in a cieng vua, a guol masa pen carnelian[107], chrysolite, le emerald suongte ahi hi;

¹¹a guol nina pen turquoise, sapphire,[108] le suongkang zolte ahi hi.

¹²A guol thumna pen jacinth, agate, le amethyst suongte ahi hi;

¹³a guol lina pen beryl, onyx, le jasper suongte ahi hi. Kham tawh kibawl a zepna sungah tuate kikoi hi.

¹⁴Israel tapate’ min tawh kituohin a minte uh a kigielna suong sawm le ni om hi; tuate pen khutsip tunga min gielna tawh a kibang a, minam sawm le nite adingin a min ciet uh kigiel hi.

¹⁵Amate in awmdal adingin khauhuol tawh a kibang a kihuol kham citah khainieng a bawl uhi;

¹⁶tuale awmdal adingin kham a zepna ni le kham kuol ni bawlin awmdal’ mongte ah tua kham kuol ni a koi uhi;

¹⁷tuale amate in awmdal’ mongte-a kikoi kham kuol nite sungah kham khauhuol ni tegel a khum uhi.

¹⁸Amate in a zepna ni tegel tungah khauhuol mong nite a zom uhi; tua bangin siempu puonah liengkaih puon masang lamah a bul uhi.

¹⁹Tua ciengin amate in kham kuol ni a bawl vua, khum tegel pen siempu puon tawh a kizom a sunglam gei, awmdal mong ni gelah a vaw uhi.

²⁰Amate in kham kuol ni a bawl vua, siempu puon liengkaih ni tegel nei a mailam, a kihoi gat siempu puonkhau a kizopna tung sonah a vaw uhi.

²¹TOPA in Moses a thupiehsa bangin, hoitaha kigan siempu puon khau tungah a beh den thei nading le siempu puon tung panin awmdal a hlagin lo nadingin siempu puon kuolte ah khauhuol dum khatin a gah uhi.

²²Ama in vaudum beh tawh a kigan siempu puontuolpi zong bawl hi;

²³puon gawlan[109] kihong bangin puontuolpi laikimah a vang om a, a kikee lo nadingin tua a vang kimkotah ki-aiha kai hi.

²⁴Amate in a mongah a dum, a dupsan, a ausan vaukhaute le a kop-a kihiaton vau hoite tawh a kigan puonte tawh kizem mang kawlsing gate a bawl uhi.

²⁵TOPA in Moses a thupiehsa bangin kham citah sialawngte zong a bawl vua, puontuolpi mong kimvela mang kawlsing gate kikalah tua sialawngte a koi uhi;

²⁶siempu nasep nadingin puontuolpi mong kimvelah sialawng khat le mang kawlsing ga khat, khat zaw khat kikahhal diemdiemin a ban banin kikhai hi.

²⁷TOPA in Moses a thupiehsa bangin amate in Aaron le a tapate adingin khau hoi tawh kigan puontungsilte

²⁸le khau hoi tawh kigan lukhute, hoitaha kigan puon hoite tawh kibawl bawngbi sungten hoite,

²⁹le a kop-a kihiaton vau hoite tawh a kigan puonte tawh a kibawl kawnggah le hieu tawh kizem a dum, a dupsan, a ausan puonte zong a bawl hi.

³⁰Amate in kumpi lukhu siengtho adingin kham siengtho a peh khat a bawl vua, khutsip tunga lai kigielte bang ma-in tua tungah, “ TOPA dinga ki siensuosa,” kici laiteng a gielkuoh uhi.

³¹TOPA in Moses a thupiehsa bangin amate in dielkhim tungah khauhuol dum khat tawh a khi uhi.

³²Tam bangin kikhopna puonbuh ahi biehbuh nasep zosie kimansieng hi; Israel-te in TOPA’ thupiehsa bang lienin a sem sieng zo ta uhi.

³³Tua ciengin amate in biehbuh, a puonbuh le a vanzah zosie, a vankhainate, khuompehte, a zawlte, a khuompite le a tunna te;

³⁴a sana kibum tuutang vunte le savun nemte[110] tawh a kibawl a tungkhu le kot puonkhai dalna puon;

³⁵thuciemna singkuong,[111] a zawlte le hepina topha[112] tawh;

³⁶sabuoi le a vanzah zosie, le Ompina Anlum;

³⁷meivah kibulsa kham meivah tunna le a vanzahte zosie le a kivah ding sathau;

³⁸kham maitam, nu sathau le a tuinam gimnamtuite le puonbuh kotbieng adingin puonkhai;

³⁹sumngo maitam le sumngo sialen, a zawlte le a vanzah zosie; kisilna kuong le a ngahna;

⁴⁰buh tuola puon kikhaite, a khuompite, a tunnate le buhtuol tunkot puonkhai, a khauhuolte le a khetphimte; kikhopna puonbuh ahi biehbuh nasepna kizang van zosie;

⁴¹siempu nasepna dinga a siengtho muna kizang ding hoitaha kigan puonte, siempu Aaron ading biehna puon siengtho le a tapate’ puonte, Moses kungah a tawi uhi.

⁴²Israel-te in TOPA’ thupiehsa bang lienin na zosie a sem uhi.

⁴³Moses in nasep zosie van a, TOPA’ thupieh bang lienin amate in nasep a zawsieng lam uh a mu ciengin amate thupha a pie hi.