Read Zou PEIKHIETNA 5 Bible Online

PEIKHIETNA 5 - Zou bible

PEIKHIETNA 5

¹Tua zaw ciengin Pharaoh kungah Moses le Aaron a pei vua, “Israel Pasien TOPA in, ‘Senel gama kei kungah pawi khat a bawl thei nadingun ka mite peisah in,’ ci hi,” a ci uhi.

²Ahi vangin Pharaoh in, “Ama thugen mangin Israel-te ka peisah na valia dingin TOPA kici pa khu koi ahiei? Tua TOPA ka thei kha vawt sih a, Israel-te zong ka peisah sih ding hi,” a ci hi.

³Tua ciengin amate in, “Ka kung vuah Hebrew-te’ Pasien ang kihil hi; TOPA ka Pasien uh tungah biehpiehna ka lui thei nadingun ni thum khuolzinna senel gamah kote ei peisah in, tua ahi sihle ama in kote tungah pulnatna ahi sihle namsau ang tungsah ding hi,” a ci uhi.

⁴Ahi vangin Egypt kumpipa in ama gel kungah, “Moses le Aaron aw, bang dinga mite na sem thei lo-a na koi gel ahei? Na nasep uh kisep khinkhian lel un!” a ci hi.

⁵Pharaoh in a thugen zom a, “Tu-in gam mite sangin amate a tamzaw ta vua,[10] hizongle amate nasep na khawlsah nuom lai uhi!” a ci hi.

⁶Pharaoh in khum ni ma-in nasem uhte le nasem vante thu pie a,

⁷“Masang lai bangin mite tungah tehlei bawl nading butu na pie nawn sih ding uhi; Peisah unlen amate ding butu khawmsah un.

⁸Ahi vangin amate kungah masang lai-a a tehlei khenza ma na ngen ding uhi; a khen za ding uh khiem sih un, bangzieh ahei cile amate mi thada ahi uhi; tua ziehin amate in, “Ka Pasien uh kungah biehpiehna ka bawl thei nadingun ei peisah in,’ ci-in a kiko uhi.

⁹Amate tungah nasep a hamsa zaw suon un; tua hile amate nasep kitahla-in zuou thu kigente a don ta sih ding uhi,” a ci hi.

¹⁰Tuaci’n nasem uhte le mite’ nasep vante pei-in mite kungah, “Pharaoh in, ‘Butu kang pie ta sih ding hi.

¹¹Pei unlen na sui thei theina vuah kisui tawm ta un. Ahi vangin na nasep uh themkhat mama kikhiem lo ding hi,’ ci hi,” a ci uhi.

¹²Tuaci’n butu tangin hampa khawm dingin Egypt gam zosie-ah mite a kikhenzah uhi.

¹³Nasem uhte in kin ngaisutin, “Butu ang kipieh lai ma bangin nisiela nasep ding za ma uh zo un,” a ci uhi.

¹⁴Pharaoh’ nasem uhte in Israel nasep vante kisat gawpin, “Bang dinga masang lam bangin zani le tuni-a man dinga ang kipie tehlei bawl zo lo na hi uh ahei?” ci-in amate kidong hi.

¹⁵Tua ciengin Israel’ nasep vante pei-in Pharaoh kungah, “Bang dinga na nasemte tam banga na bawl tah lawm ahei?

¹⁶Na nasemte butu ei kipie sih a, ahi vangin amate in ka kung vuah, ‘Tehlei bawl un!’ ei ci uhi. Na nasemte ei kisat dan en vawi! Na mite tungah na thuman sih hi,” a ci uhi.[11]

¹⁷Ama in, “Note na thasie uhi, na thasie uhi; tua ahi ziehin, “Pasien kungah biehna pie dingin ei peisah in,’ na ci uhi.

¹⁸Tu-in pei unlen na sem un. Azieh pen butu ang kipie sih ding a, hizongle tehlei a mal ngaina za ma na bawl veve ding uhi,” a ci hi.

¹⁹Amate in, “Ni sima na tehlei seh za uh khiem lo ding,” a ci ciengun Israel’ nasep vante in thu hamsa a tuo lam a kithei uhi.

²⁰Pharaoh kung panin a pei ciengun amate dawn dinga a na ngah Moses le Aaron tawh a kimu uhi.

²¹Amate in, “TOPA in note hing enin thu hing khen taheh! Bangzieh ahei cile Pharaoh le a nasemte muna-ah ko a khiel nei suohsah vua, ko tha nadingin a khut sung vuah namsau khat na koi uhi,” a ci uhi.

²²Tua ciengin TOPA lamah Moses kihei kia-in,”TOPA aw, bang dinga tam mite na bawlsiet ahei? Bang dinga kei nei sawl gumsan ahei?

²³Pharaoh kungah na min tawh thu gen dinga ka pei masah lai-a kipanin ama in tam mite a bawlsie zo hi. Nang in na mite suotah nading bangma na bawl vawt sih hi,” a ci hi.