Read Zou PEIKHIETNA 6 Bible Online

PEIKHIETNA 6 - Zou bible

PEIKHIETNA 6

¹Tua ciengin TOPA in Moses kung ah, “Tu-in Pharaoh tunga ka bawl ding na mu ding hi: Ama in a vanglien khut tawh amate a peisah valon ding hi; ama in a vanglien khut khat tawh a gam sung panin amate a notmang ding hi,” a ci hi.

²Pasien in zong Moses hopi-in ama tungah tam bangci hi: “Keima TOPA ka hi hi.

³Abraham, Isaac le Jacob-te tungah Vanglien Pasien-in[12] ka kilang a, ahi vangin amate kungah ka min TOPA[13] ci-in ka kitheisah sih hi.

⁴Keima in pemta bangin a tenna uh Canaan leitang pieh dingin amate tawh thuciemna ka kipsah hi.

⁵Keima in Egypt-te khut sungah saltang Israel-te’ mauna aw zong ka za zo a, ka kamciemna ka phawh zo hi.

⁶Tua ahi ziehin Israel-te kungah, “Keima TOPA ka hi hi. Keima in Egypt-te’ vangih panin note kang hla ding a, amau’ sila hina panin kang suohta sah ding hi. Keima in a thahat a kizah ban le thukhenna nasep lien tawh kang tan ding hi.

⁷Keima’ mi dingin note kang la ding a, na Pasien uh ka hi ding hi. Egypt mite’ vangih pana a suohta sah, TOPA ka hina uh note in na thei ding uhi.

⁸Keima in Abraham, Isaac, le Jacob-te tungah pieh dinga ka ciemsa leitangah note kang peipi ding a, na luo dingun tua leitang kang pie ding hi. Keima in TOPA ka hi hi,’ ci-un,” a ci hi.

⁹Moses in Israel-te kungah tam thu a gen hi. Ahi vangin a lungsim uh a kitapzanna le a gimsie a saltanna ziehun amate in Moses’ thugen a ngai sih uhi.

¹⁰Tua ciengin TOPA in Moses kungah,

¹¹“Pei inlen a gam panin Israel-te a peisah nadingin Egypt kumpipa Pharaoh kungah va gen ta’n,” a ci hi.

¹²Ahi vangin Moses in TOPA hopi a, “Israel-te in ka thugen a ngai sih uhi; tua ahi ziehin a dangnal lo kei thugen[14] bangci bangin Pharaoh in ei ngai ding ahei?” a ci hi.

¹³Tam bangin Egypt kumpipa Pharaoh le Israel-te tungtang thu TOPA in Moses le Aaron hopi a, Egypt gam panin Israel-te a hla nadingun amate thu a pie hi.

¹⁴Tam teng pen amahaw’ be lutangte ahi uhi: Israel’ tapa tapen Reuben’ tapate: Hanoch, Pallu, Hezron, le Carmi ahi hi; tam teng pen Reuben’ innkuonte ahi uhi.

¹⁵Simeon tapate: Jemuel, Jamin, Ohad, Jachin, Zohar, le Canaan numei‘ tapa shaul[15] ahi hi; tam teng pen Simeon’ innkuonte ahi uhi.

¹⁶Tam teng pen a khang utawh kizui-in Levi tapate’ min ahi hi: Gershon,[16] Kohath, le Merari ahi a, Levi kum za le kum sawmthum le sagi a hing hi.

¹⁷Gershon[17] tapate: amate’ innkuon ciet tawh kizui-in Libni le Shimei ahi hi.

¹⁸Kohath’ tapate: Amram, Izhar, Hebron le Uzziel hi a, Kohath pen kum za le kum sawmthum le thum a hing hi.

¹⁹Merari tapate: Mahli le Mushi ahi hi. Tam teng pen amau’ khang tawh kizui-in Levi’ innkuonte ahi uhi.

²⁰Amram in a pa’ sanggamnu Jochebed zi-in la a, tua nu in ama tawh Aaron le Moses nei hi. Amram kum za le kum sawmthum le sagi a hing hi.

²¹Izhar tapate: Korah, Nepheg le Zichri ahi hi.

²²Uzziel’ tapate: Mishael, Elzaphan le Sithri ahi hi.

²³Aaron in Amminadab’ tanu, Nahshon’ sanggam nu Elisheba zi-in a la hi. Tua nu in ama tawh Nadab, Abihu, Eleazar le Ithamar nei hi.

²⁴Korah’ tapate: Assir, Elkanah le Abiasaph hi a, tam teng pen Korah-te’ innkuonte ahi hi.

²⁵Aaron’ tapa Eleazar in Putiel’ tanute khat zi-in a la hi. Tua nu in ama tawh Phinehas nei hi. Tam teng pen a innkuon kuonin Levi-te’ be lutangte ahi hi.

²⁶TOPA in, “Egypt panin Israel-te a honhonin peikhiet pi in,” a cina mite pen tam Aaron le Moses-te ma ahi uhi.

²⁷Egypt panin Israel-te a kipeipi nading thu Egypt kumpipa Pharaoh tawh a kiho mite pen tam Moses le Aaron ma ahi hi.

²⁸Egypt gam sungah TOPA in Moses a hopi ni-in,

²⁹ama in, “Keima in TOPA ka hi hi. Nang tunga kang gen zosie Egypt kumpipa Pharaoh kungah gen in,” a ci hi.

³⁰Ahi vangin Moses in TOPA kungah, “En in, kei pen thugen siem lo[18] mi ka hi hi. Bang dingin Pharaoh in kei thugen ei ngai ding ahei?” a ci hi.