Read Zou PEIKHIETNA 8 Bible Online

PEIKHIETNA 8 - Zou bible

PEIKHIETNA 8

¹[19]Tua ciengin TOPA in Moses kung ah, “Pharaoh kungah pei-in ama kungah, ‘TOPA in tam bangci hi: “Amate in keima ei bieh thei nadingun ka mite peisah in.

²Amate na peisah nuom sih leh uphawh tawh na gam buppi gimna kang pie ding hi.

³Nile gun sungah uphawh a dim ding hi; na kumpi inn sung, na lupna inndan sung, na lupna tung, na uliente’ inn sung le na mipite’ inn sung, na lungthu tung ule na annel pawina kuong sung teng vuah ang lut ding hi.[20]

⁴Nangma tung, na mite tung le na ulien zosie tungah uphawhte ang kato ding hi,” ci hi,’ ci-in gen in,” a ci hi.

⁵[21] TOPA in Moses kungah, “Aaron kungah, ‘Gunte, tui zawite, le buoltuite tungah na ciengkhut tawh na khut zah inlen, Egypt leitang tungah uphawhte katosah in,’ ci-in gen in,” a ci hi.

⁶Tuaci’n Aaron in Egypt’ tuite tungah a khut a zah hi; tuale uphawhte kato a, Egypt leitang a tuommang hi.

⁷Hinanle mitphiel siemte in a siemna utawh tua bang lien ma-in a bawl thei vua, Egypt leitang tungah uphawhte a katosah uhi.

⁸Tua ciengin Pharaoh in Moses le Aaron hlanin, “Kei le ka mite kung panin uphawhte a lah nadingin TOPA kungah thu ngen un. TOPA kungah biehna lui dingin mite ka peisah ding hi,” a ci hi.

⁹Moses in Pharaoh kungah, “Na kung pan le na innte panin uphawhte kihemin Nile gun sung behah a om den nadingin bang hun ciengin nang ading, na uliente ading le na mipite adingin thu hing ngetpieh ding ka hei, ei gen in,” a ci hi.

¹⁰Ama in, ”Zing cieng,” a ci hi. Moses in, “TOPA kohaw’ Pasien tawh a kibang koima om lo hi, ci na thei nadingin na ci bang hi taheh!

¹¹Uphawhte in nang le na innte, na uliente le na mite ang peisan ding hi; Nile gun behah amate kinuasie ding hi,” a ci hi.

¹²Tua ciengin Pharaoh kung pan Moses le Aaron a pei uhi; tuale Moses in Pharaoh tunga a tunsah uphawhte tawh kisai-in TOPA kungah a kiko hi.[22]

¹³TOPA in Moses ngetna bangin a bawl hi: Inn sung, innhuong sung, le lote lahah uphawhte a si hi.

¹⁴Amate in a lom lomin tuate a khawm vua, gam sung teng a uithan sieng hi.

¹⁵Pharaoh in a noptuom lam a mu ciengin a lungtang khausah a, TOPA gensa bangin amate’ thu ngai lo hi.

¹⁶Tua ciengin TOPA in Moses kungah, “Aaron kungah, ‘Egypt gam buppi-ah gam tho a om nadingin na ciengkhut zah inlen leivui sat in,’ ci-in,” a ci hi.

¹⁷Tuale amate in tua bang ma-in a bawl uhi; Aaron in a ciengkhut tawh a khut zahin leivui sat a, mihing tung le ganhing tungah a kibangin gam thote tu hi; Egypt gambuppi sunga leivui zosie gam tho a suoh sieng hi.

¹⁸Mitphiel siemte in a phuolsel uh siemna tawh gam tho suosah ding a hanciem vangun a bawl thei sih uhi. Mihingte le ganhingte tungah gam tho a om hi.

¹⁹Mitphiel siemte in Pharaoh kungah, “Tami khu Pasien’ khutme ahi bo hi!” a ci uhi. Hinanle Pharaoh’ lungsim khauh a, TOPA gensa bangin a thugen uh a ngai sih hi.

²⁰Tua ciengin TOPA in Moses kungah, “Zingmawng tho bai inlen, tuikhuh zuonin Pharaoh ang pei ciengin a mai-ah na kilah inlen ama kungah, ‘TOPA in tam bangin gen hi: Amate in keima ei bieh thei nadingun ka mite peisah in.

²¹Tua bang hi loin ka mite na peisah nuom sih leh nang, na uliente, na mite tung le na inn sung tengah ankuong tho honpite kang hla ding hi; Egypt-te’ innte le tuate’ tenna leitang zong ankuong tho honpite tawh a kidim ding hi.

²²Ahi vangin tua ni ciengin tami leitangah kei TOPA ka hina na thei nadingun, ka mite tenna Goshen leitang ankuong tho honpite in a bop lo nadingin ka tuom koi ding hi.

²³Tua bangin ka mite le na mite kikalah kilamdanna[23] khat ka bawl ding hi. Zing ciengin tam ciemtena ang om ding hi,” ci hi,’ ci-in gen in,” a ci hi.

²⁴TOPA in tua bang ma-in bawl a, ankuong tho honpite in Pharaoh’ inn sung le a uliente’ inn sung teng a bawm valuoi hi; ankuong thote ziehin Egypt gamsung zosie-ah leitang kisie hi.

²⁵Tua ciengin Pharaoh in Moses le Aaron hlanin ama in, “Pei un, tam gam sungah na Pasien uh tungah biehna lui un,” a ci hi.

²⁶Ahi vangin Moses in, ”Tua banga bawl ding pen dih lo hi; azieh pen ka TOPA ka Pasien uh kunga ka lui uh biehna pen Egypt-te adingin a kidahhuoi ahi hi. Egypt-te muna-ah a kidah uh biehna lui uleng amate in suong tawh ei seplia lo ding uh amah?

²⁷Ni thum sung peina gamlahah pei-in, ama’ ei thupieh bangin TOPA ka Pasien uh kungah biehna ka va lui ding uhi,” a ci hi.

²⁸Tuaci’n Pharaoh in, ”Gamlapi-ah na pei sih ding po uleh gam lahah TOPA na Pasien uh tungah biehna lui dingin kang peisah ding hi. Kei adingin thu ei ngetpieh in,” a ci hi.

²⁹Tua ciengin Moses in, “Nangma kung panin ka pei zaw behin TOPA kungah thu ka ngen ding a, zing ciengin Pharaoh kung pan, a uliente kung pan le a mite kung panin ankuong tho honpite a leng mang sieng ding hi; TOPA kunga biehna a pie ding mite phal lona tawh Pharaoh hing zuoutat kia nawn poma sin,” a ci hi.

³⁰Tuaci’n Pharaoh kung pan Moses pei-in TOPA kungah thu a ngen hi.

³¹TOPA in Moses’ nget bangin a pie a, Pharaoh kung, a uliente kung, le a mite kung panin ankuong tho honpite lengmangsahin khat zong a om nawn sih hi.

³²Ahi vangin Pharaoh in a lungtang khausah lai veve a, mite peisah nuom lo hi.