Read Zou PEIKHIETNA 9 Bible Online

PEIKHIETNA 9 - Zou bible

PEIKHIETNA 9

¹Tua ciengin TOPA in Moses kungah, “Pharaoh kungah pei-in ama kungah, ‘Hebrew-te’ Pasien TOPA in tam bangci hi: Amate in keima ei bieh thei nadingun ka mite peisah in.

²Bangzieh ahei cile amate peisah nuom loin na tuhkon den leh,

³TOPA’ banhat in na lozau-a a om ganhingte ahi, sakolte, laate, kalaohte, bawnghonte, le tuuhonte tungah pul natna tawh ang vatmai ding hi.

⁴Hizongle Israel-a’ zosie khat beh a si lo nadingin Israel-te’ ganhingte le Egypt-te’ ganhingte kikalah TOPA in kilamdanna khat a bawl ding hi,” ci hi, va ci ta’n,” a ci hi.

⁵TOPA in hun khat se a, “Zing ciengin TOPA in gam sungah tami ang sem ding hi,” a ci hi.

⁶A zing ciengin TOPA in tua bangin sem hi; Egypt-te’ ganhing zosie si sieng a, ahi vangin Israel-te’ ganhing khat zong si lo hi.

⁷Pharaoh in thukante sawlin Israel-te’ ganhing khat zong a si lo lam thei hi. Ahi vangin Pharaoh’ lungtang khauh lai a, ama in mite peisah lo hi.

⁸Tua ciengin TOPA in Moses le Aaron kungah, “Meikhuh sunga vut na khut dimin ham unlen, Pharaoh muna-ah Moses in vantung lamah tua vut theto heh.

⁹Tua khu Egypt gam buppi-ah leivui nel suoh ding a, Egypt gam buppi-ah mihing le ganhingte tungah uilut hima a suoh ding hi,” a ci hi.

¹⁰Tuaci’n meikhuh panin ama gel in vut la-in Pharaoh’ mai-ah a ding vua, Moses in vantung lamah tua vut a theto leh tuate in mihingte le ganhingte tungah uilut hima naikul a piengsah hi.

¹¹Uilut hima ziehin Moses mai-ah mitphiel siemte a ding zo nawn sih uhi. Bang ding ahei cile mitphiel siemte le Egypt-te zosie in zong uilut a vei uhi.

¹²Ahi vangin TOPA in Pharaoh’ lungtang khausah a, Moses kungah TOPA in a gensa ma bangin ama in a thu uh ngai lo hi.

¹³Tua ciengin TOPA in Moses kungah, “Zing ciengin thobai-inlen, Pharaoh mai-ah kipulahin ama kungah, ‘Hebrew-te’ Pasien, TOPA in tam bangci hi: Amate in keima ei bieh thei nadingun ka mite peisah in.

¹⁴Bangzieh ahei cile leitung buppi-ah keima tawh a kibang koima khat beh om lo hi, ci na thei nadingin keima in tami hunin nang, na uliente, le na mite tungah ka pul natna zosie kang tungsah ding hi.

¹⁵Azieh pen tu-in ka khut zahin pul natna tawh nang le na mite kang vatmai thei a, leitung panin zong kang sumai thei hi.

¹⁶Hinanle nangma kang hinkhawina pen tam zieh ahi hi: Na tungah ka vanglietna kang lah nading le leitung buppi-ah ka min a kiphuongzah thei nading ahi hi.

¹⁷Nang le nang na kiliensah lai vaset a, ka mite langbawlin a pei ding uh na phal sih hi.

¹⁸Zing cieng tu bang hunin Egypt gam kisat huna kipan tuhun donga a kimu ngai nai lo, a nasie penpen gielpi ka kiesah ding hi.

¹⁹Tua ahi ziehin mi sawl inlen lozau-a na ganhingte le na nei na lam zosie munbih khatah tuosah in; tuate tungah gielpi ang kieh ciengin kibuhna munah a kipeipi lo, lozau-a a om mihing ahi a, ganhing ahi zongin a si ding hi,’ ci-in gen in,” a ci hi.

²⁰Pharaoh’ uliente lahah TOPA’ kammal a zatah pawlkhat in munbih khatah a salte ule a ganhingte a nawtaisah uhi.

²¹TOPA’ kammal a thusim lo mite in lozau-ah a salte ule a ganhingte a nuasie uhi.

²²TOPA in Moses kungah, “Egypt gam sung zosie-a om mihing, ganhing le Egypt gamsung lote lahah a po singkung zosiete tungah gielpi a kieh thei nadingin vantung lamah na khut zah in,” a ci hi.

²³Tua ciengin vantung lamah Moses in a ciengkhut zah a, TOPA in van tosahin giel kiesah a, leitungah meikuong a kumsuh hi. TOPA in Egypt gamah gielpi kiesah hi.

²⁴Tuami laikimah gielpi le meikuong khawl loin phe lahlah a, gam khat ahi zaw a kipanin Egypt gamsung buppi-ah tam banga gielpi siehuoi a kie ngai nai sih hi.

²⁵Tumi gielpi in Egypt gambup sung lozau lahah a om na vannuoi, mihing le ganhing a ni-in a satpaai hi; gielpi in lozau-a kung zosie zong satpai a, lozau-a singkung zosie zong vattan hi.

²⁶Israel-te tenna Goshen gam behah gielpi kie lo hi.

²⁷Tua ciengin Pharaoh in mi sawlin Moses le Aaron a hlansah a, ama gel kungah, “Tun-in ahile kei ka khiel zo ta hi; keima le ka mipite ka khiel vua, TOPA a dih hi.

²⁸TOPA kungah thum un! Pasien’ vanto le giel kicing zo ta! Kang peisah ta ding vua, na thaam uh a ngai nawn sih hi,” a ci hi.

²⁹Moses in ama kungah, “Tam khuopi panin ka pusuo behin TOPA lamah ka khut ka zah ding hi. Leitung in TOPA-a’ ahi hi, ci-in na thei nadingin vanto khawlin gielpi veng ding hi.

³⁰Ahi vangin nang le na uliente in TOPA Pasien na giin nai vaset lo lam uh ka thei hi,” a ci hi.

³¹(Tu-in anthul kungte le mangbuham kisie hi. Bang ding ahei cile mangbuhamte a vui laitah ahi a, anthul kungte a paa laitah ahi hi.

³²Ahi vangin mangbu le mangbumante kisie lo hi. Azieh pen tuate khangham nai lo hi.)

³³Tuaci’n Pharaoh kung panin khuopi pulamah Moses peikhie a, TOPA lamah a khut a zah ciengin vanto le gielpi khawl pai a, leitungah guo zu nawn lo hi.

³⁴Ahi vangin Pharaoh in guopi, gielpi le vanto a theu zo lam a mu ciengin ama khatvei khiel lai a, ama le a uliente in a lungtang uh a khausah uhi.

³⁵Tuaci’n TOPA in Moses tungtawnin a gensa bangin Pharaoh’ lungtang khausah a, Israel-te peisah lo hi.