Read Zou JOB 1 Bible Online

JOB 1 - Zou bible

JOB 1

¹Uz gamah Job kici mi khat a om hi. Tua mipa nuol baang lo, a thutang, Pasien a giing le sietna lam a pel mi khat ahi hi.

²Ama in tapa sagi le tanu thum nei hi.

³Ama in tuu tulsagi, kalaoh tulthum, bawngtang kap zanga, laa pi zanga le nasem tampi nei hi; tuaci’n tam mipa pen nisuona gama mi zosie sungah a haupen ahi hi.

⁴Ama’ tapate an kikumin inn khat pan inn khatah a ban banin pei kawikawi uhi; tuale amate in a nehpi a dawnpi dingun amau’ sanggam numei thum a ciel let uhi.

⁵A pawi bawl uh viel khat a kihlit zaw ciengin Job in amate hlanin siensuo a, zingmawngin ama thobai-in a tapate zosie adingin a phaza tawh kizui-in meihal biehnate a pie hi; azieh pen Job in, “Ka tapate tawnkhielin a lungsim vuah Pasien na samsie kha thei ding uhi,” a ci hi.

⁶Ni khat TOPA mai-a kilah dingin van mite[1] a pei vua, amate lahah Satan[2] zong kihal hi.

⁷TOPA in Satan kungah, “Nang hei pana hing pei na hei?” a ci hi. Satan in TOPA kungah, “Leitungah ka vah kawikawi a, tunglam le neilam ka kawmna pana ang pei ka hi hi,” ci-in a dawng hi.

⁸TOPA in Satan kungah, “Ka nasem Job na phawh kha ngai ei mah? Nuol a baang lo, a thutang, Pasien giingin sietna a pel ama tawh a kibang leitungah om lo hi,” a ci hi.

⁹Tua bepin Satan in TOPA dawng a, “Job in Pasien ang mawh giin ahi amah?

¹⁰Ama le a inn le a neisa zosie kimvelah dai kai hi lo na mah? Nang in a sepna zosie thupha na buoh a, gam sungah ama’ neisa a pung hi.

¹¹Hizongle tu-in na khut zahin a neisa zosie lahpieh lacin na maitang mama-ah hing gausam pai ta va,” a ci hi.

¹²TOPA in Satan kungah, “Hoi pai e, a neisa zosie nangma’ thu hi taheh; a tung behah na khut hlang sih po lacin!” a ci hi. Tuaci’n TOPA kung panin Satan a pusuoh hi.

¹³Ni khat a sanggam pasal a tapen pa uh’ inn ah a tapate le a tanute an ne-in zu dawnin a op laitahun,

¹⁴kamtai khat tungin Job kungah, “Bawngtangte in lo kai-in tuate gei-ah laate a gamtat laitahin

¹⁵Sebea-te in ei simin tuate a kaimang ta vua, namsau tawh nasemte a that sieng ta uhi; nang kunga gen dinga kei beh ang suohta ka hi bo hi,” a ci hi.

¹⁶A thugen a hlit masangin adang khat tung leuleu a, “Vantung panin Pasien’ meikuong khat ang kiesuh a, tuute le a nasemte a katum sieng ta hi; nang kunga gen dinga kei beh ang suohta ka hi bo hi,” a ci hi.

¹⁷A thu gen a hlit masang ma-in adang khat tung leuleu a, “Chaldea-te pawl thum kisuo-in kalaohte ang bulu vua, a kaimang sieng ta uhi. Nasemte zong namsau tawh a that sieng ta uhi; nang kunga gen dinga kei beh ang suohta ka hi bo hi,” a ci hi.

¹⁸A thu gen a hlit masangin adang khat tungkia a, “Na tapate le na tanute in a sanggam pasal tapen pa’ inn ah an ne zu dawnin a op laitahun,

¹⁹thakhatthu-in senel gam panin huipi hat mama khat ang lang a, inn ningli teng semmangin, nungah tangvalte tungah kiesuh a, amate a si sieng uhi; nang kunga gen dinga kei beh ang suohta ka hi bo hi,” a ci hi.

²⁰Tua ciengin Job dingin a puon balkeh a, a sam heukieu-in lei-ah bohsuhin Pasien a bie hi.

²¹Ama in, “Ka nu sung pan guohtangin ka suoh a, guohtang ma-in ka kilekia ding hi; TOPA in ei pie a, TOPA ma in a kilahkia ta hi; TOPA’ min phatin om taheh” a ci hi.

²²Tam thu zosie-ah Job maw loin Pasien zong mawsah lo hi.