Read Zou JOB 10 Bible Online

JOB 10 - Zou bible

JOB 10

¹“Ka hinkhuo ka cimtah hi; ka nopnopin ka phun ding hi; keima in aicim-tangkha tawh a kibang ka hinna ka sutsut ding hi.

²Keima in Pasien kungah, ‘Kei ei mawsah da in; bang dinga ei do bawl na hei, ei theisah in,” ka ci ding hi.

³Keima ei kigawt bawl a, na khut tawh na sepsate kisimmaw-in, migilote’ nasepna angvan ding khu nangma’ hoi sah ma amah?

⁴Cilesa’ mit na nei amah? Mihingte mu bangin na mu amah?

⁵Na nite, mihingte’ ni tawh kibang amah, ahi sihle na kumte zong mihing’ kum ma tawh kibang ahi amah?

⁶Nang in ka khielna nei sulzui a, ka mawna na kantel hi.

⁷Nang in kei ka khiel lo lam na thei mawh vangin na khut sung pana ei hunkhie ding koima a om sih amah?

⁸Na khut tawh keima ei lomin nei bawl hi; tu-in kihei-in keima nei susie hi.[33]

⁹Kei tungman tawh nei bawlna hing phawhkia in; nangma in kei leivui ei suohsah sawmkia na hi amah?

¹⁰Bawngnawi suh bangin keima ei suhin, bawngnawi khal bangin ei khalsah hi lo na mah?

¹¹Vun le satel tawh nei tuom a, gute le thahuite na kimatsah hi.

¹²Nangma in hinkhuo le itna kip nei pie a, nangma’ ei kepna in ka hinkhuo a humbih hi.

¹³Hinanle na lungsim sungah tam silte na im lai hi; tam pen na lungtup ahi lam keima in ka thei hi.

¹⁴Keima ka maw leh nei kaihlit a, ka khielna nei maisah sih hi.

¹⁵Ka gitlo leh gimna ka thuoh hi! Ka thuman leh ka lu ka pongsah thei sih hi, azieh pen ka gentheina ka et ciengin, mindaina tawh ka kidim hi.

¹⁶Humpi bangin kei nei vai hi; nang in kei langkhatah a zauhuoi nate na bawl hi.

¹⁷Keima ei mawmat dingin tecite a tha na khel a, kei lamah nangma’ lungthahna a khang semsem hi; nangma in kei ei do dingin galkap a tha tha nang puoh hi.[34]

¹⁸“Bang dingin ka nu sung panin ei na piengsah poma na hei? Koima’ ei na mu masangin na kisi dawh ta ve leng,

¹⁹tuale ka nu sung panin hankhuh ei na kitut pai hinlen, a na kipieng kha lo hi tamai le izaw.

²⁰Ka nite tomkal khat[35] sung hi lo amah? Keima in themno khat lungnopna[36] ka mu thei nadingin,

²¹kang kinuale nawn lo nading gam le lungzinna le khuomiel gam ka zot masang,

²²khuovah khuomiel tawh a kibahna, lungzinna[37] le buoina gamah ka pei masangin, keima ngentangin ei omsah un,” a ci hi.