Read Zou JOB 11 Bible Online

JOB 11 - Zou bible

JOB 11

¹Tua ciengin Naamath mi Zophar in dawng a:

²“Kamham tamza pi dawn loin hing kikoi-in, mi kamtam pa dih kitang sah ding amah?

³Na thumot gengente in midangte sipsahin, tuale mi na simmaw ciengin koima in ei maizumsah sih va na ci amah?

⁴Azieh pen, ‘Ka gamtat dan[38] a siengtho a, Pasien[39] muna-ah ka siengtho hi,’ na ci hi.

⁵Hinanle na kungah tua Pasien in a kamkahin hing hopi hinlen,

⁶pilna thusimte hing hil leh nuom man vang e izaw! Bangzieh ahei cile pilna pen nam tampi ahi hi.[40] Tua ciengin Pasien in na khielna za sangin a tawmzaw ang thuh ahi lam thei in.

⁷“Pasien’ thuthuhte mu sieng thei ding na mah? Vanglienpa’[41] sep theina tan mu zo ding na mah?

⁸Tua khu vantung[42] sanga sangzaw ahi a, nang in bang law thei na hei? Misikhuo sangin thuhzaw hi, nang in bang thei zo ding na hei?

⁹A tena pen leitung sangin sauzaw a, tuipi sangin zong zaizaw hi.

¹⁰Ama in hing nawh kha-in thong sungah hing khum hinlen, tuale thu khen dingin hing kaikhawm leh, koi in ama khahtan zo ding ahei?

¹¹Bang zieh ahei cile ama in kimanna nei lo mite thei hi; ama in mawna a mu ciengin ngaisun loin om ding amah?

¹²Hinanle gam laate mihing a suo ciengin mimawte in theitelna nga pan ding uhi.[43]

¹³“Na lungsim mansah lacin ama lamah na khutte na zah ding hi.

¹⁴Na khutah khielna a op khah leh paidawh inlen, na puonbuhte sungah gitlona tengsah sin.

¹⁵Tua ciengin nuolna om loin na khuodah ngam tahtah ding a; lung muongin omin na zau ta sih ding hi.

¹⁶Nang in gimna na mangngil ding a; tua khu a luongsa tui bangin na phawh ding hi.

¹⁷Na hinna khu sun sangin vahzaw ding a; a khuomielte, zingmawng bang ding hi.

¹⁸Lametna a op ziehin kimuonna na nei ding hi; nang ang kipanpi[44] ding a, bihtahin na tawlnga ding hi.

¹⁹Nang na lum ding a, koima in ang zausah sih ding hi; mi tampi in nangma’ maipha ang sui ding uhi.

²⁰Hinanle migilote’ mit thazaw ding a; amate adingin suotahna lampi zosie tawp ding hi. Tuale amau’ kinepna khu si ding beh ahi hi,” a ci hi.