Read Zou JOB 12 Bible Online

JOB 12 - Zou bible

JOB 12

¹Tua ciengin Job in dawng a:

²“Noma beh mi kisa na hi vua, noma tawh pilna a si ding lam upla nading om lo hi.

³Hizongle no bangin theitelna ka nei hi; note nei-ah ka om sih hi. Tam bang thute koi in thei lo ding ahei?

⁴Ka guolte nuisatin ka om ta hi; Pasien ka hlan a, ama in ei dawng hi, a dih le paubaang lo mipa, mite’ nuisatin ka om ta hi.

⁵A nop a thei-a om mite in hamsiet tuohte a ciemmui bawl uhi,[45] hinanle a keng vua dingkip thei lote a pua ding uh a baisa ahi hi.

⁶Gutate’ puonbuhte a om hit hiet a, Pasien a lungthahsah mite bihtahin a om uhi, amate in a khut[46] sung vuah a pasien uh’ lim a tawi uhi.

⁷“Ahi vangin gamsate dong un, amate in note ang hil ding uhi; vana leng vate dong un, amate in no kungah ang gen ding uhi;

⁸leitung[47] singkungte dong un, amate in ang hil ding uhi; tuipi sunga ngate dong un, amate in ang gen ding uhi.

⁹TOPA’ khut in tami a bawl lam tamte zosie lahah a thei lo koi ahei?

¹⁰A khut sungah ganhing zosie’ hinna le mihing zosie’ hinna a om hi.

¹¹Lei in an a ciep bangin bil in thu kantel hi lo amah?

¹²Khanghamte in pilna a nei vua, a sawt hinte in theitelna nei hi lo amah?

¹³“Pasien[48] in pilna le hatna nei hi; ama in thukuppina le theitelna nei hi.

¹⁴Ama in a phelkhe nah leh koima in lamkia zo lo hi; ama in thongah mi a khum nah leh koima in lakhie zo lo hi.

¹⁵Ama in tuinahte khacip leh leitang gaw-in tuite kang sieng hi; ama in tuite a hla ciengin tua tui in gamsung hlummang hi.

¹⁶Ama in hatna le pilna nei hi; misolte le sol thuohte ama-a’ ahi hi.

¹⁷Ama in thudawhpite a guohtangin puimang a, thukhente mimaw suohsah hi.

¹⁸Ama in kumpite’ kawnggah khau sutpieh a, dielkai tawh a kawng uh a khipieh hi.

¹⁹Ama in siempute a guohtangin puimang a, mi hatte zong a khule thop hi.

²⁰Ama in mite’ muonte a ham thei loin koi a, khanghamte’ thu khinkhai theina a lamang hi.

²¹Ama in miliente simmaw bawl a, mi hatte’ kawnggah sutpieh hi.

²²Ama in khuomiel panin thuthuhte pholah a, ama in khuomiel thuhpi khuovah a suohsah hi.

²³Ama in minamte liensah a, tua ciengin tuate a susie hi; ama in minamte liensah a, tua ciengin a puimangkia hi.

²⁴Ama in leitung makaite[49] panin theitelna lamang a, lampi oplona gamkhing ah amate a vahvaisah hi.

²⁵Khuovah omlo khuomiel lahah amate a kimaimaw vua, zukhamte bangin amate a hawilensah hi.