Read Zou JOB 15 Bible Online

JOB 15 - Zou bible

JOB 15

¹Tua ciengin Teman mi Eliphaz in dawng a:

²“Mipil khat in hui tawh a kibang a kimang lo kamhamte dawngin, nisuona lam hui hawpin a kigil vasah ding amah?

³Phattuomna a om lo thute tawh kiselin, ahi sihle a sil hoi bawl thei lote uh a mawh gengen ding uh amah?

⁴Ahi vangin nang in Pasien zatahna na sumaimang a, Pasien’ mai-a thu lungngaina na khahtan hi.

⁵Azieh pen na khielna in na kam thu hil a, mi pilkhelte’ kam na teelzaw hi.

⁶Nangma’ kam in nang ang mawsah a, kei ka hi sih hi; na kam in nangma langkhatah teci a pang hi.

⁷“Mihingte lahah a pieng masa pen na hi amah? Muolte a op masanga pieng na hi amah?

⁸Pasien’ thu kikupna na ngai kha amah? Nangma ding beha pilna na ciengtan amah?

⁹Kote thei lo bang thu na thei tuom ahei? Kote telcien lo bang thu na theisiem tuom ahei?

¹⁰Kote lamah puteh samkangte a om vua, amate na pa sanga a tazaw vive ahi hi.

¹¹Pasien in ang henepnate ahi sihle awnem no tawh ang hopina te nang adingin thuneu na sa amah?

¹²Bang dingin na lungsim in ang puimang a, bang dingin na mit sat liplap na hei?[56]

¹³Tuaci’n na lungsim in Pasien a langpan a, na kam panin tua bang kammalte pusuohsah na hei?

¹⁴Mihingte bang hi tuon a, amate siengtho thei ding uh ahei? Ahi sihle numei pana pieng mite khu a thuman thei ding uh amah?

¹⁵Ama’ misiengthote nangawn Pasien in muong loin, ama muna-ah vantungte zong siengtho sa lo ahile,

¹⁶a kidahhuoi, a siehuoi, khielna tui banga a dawn mipa khu bang a ci muonla kan lai diei!

¹⁷“Keima’ thu ngai in; kang lah ding hi; ka musate kang pholah ding hi.

¹⁸Mipilte in gen pena a nei ule a pu a pate un zong a na im lo uh khu,

¹⁹amate tung behah gam na kipie a, amate lahah khuol mite a vahkha sih hi.

²⁰Migilote in a khan tungtawnun natna thuohin a kipumpeh vua, mi gawgamte adingin tuate a khan tungtawnun a kikoipieh hi.

²¹A bil sung vuah patauna aw ging a; a cithei hunun zong amate tungah mi susie pa pei-in amate a bulu ding hi.

²²Miel pana a kilekia ding uh lametna a om sih a, amate, namsau tawh si dinga laitansa ahi uhi.

²³Neh ding sui-in mun zosie-ah vah kawikawi-in, amate in, ‘An neh ding hei-ah a om diei?’ a ci uhi. Amate in khuomiel hun ang nai lam a thei uhi;

²⁴lungdonna le lungzinna in amate zausisah a, gal bawl dinga kithawi kumpi khat bangin amate a zogawp uhi.

²⁵Amate in Pasien langkhatah a khut uh zahin Vanglienpa[57] a pumtawh ziehun,

²⁶ama langkhatah lum sapi khat tawh lungkhauhtahin a tai hi;

²⁷azieh pen amau’ thaute in a mai uh tuom a, a phua vuah a thaute uh kikhol hi,

²⁸a daidam khuopite ah a teng ding vua, koima’ ten lona innte, le buathah lom suoh dinga kisesa innte sungah amate a teng ding uhi;

²⁹amate a hau sih ding vua, a neisate uh zong kip loin, lei nei-ah zong amate a zunghla sih ding uhi;[58]

³⁰miel panin amate a suohta sih ding vua, a bamengte mei in hulvamin, hui in amau’ paate[59] tawmang[60] ding hi.

³¹Amau le amau kisolin a hawmpi muong sih uheh; azieh pen amau’ lemlaw khu a hawmpi ahi bo hi.

³²A hun a tun masang gawp sieng ding a, a bate a na a nokia nawn sih ding hi.

³³Amate in lenggui bangin a ga puomte a thingdawh ding vua, tuale olive kung bangin a paate a pulsah ding uhi.

³⁴Azieh pen Pasien a thei lo honte in suonlehlah a nei sih vua, guhgol tawh kilam puonbuhte mei in a katum sieng hi.

³⁵Amate in sil hoilo paai-in sietna a piengsah uhi. Mi sol ding behbehin amau’ lungtang a kithawi uhi,” a ci hi.