Read Zou JOB 17 Bible Online

JOB 17 - Zou bible

JOB 17

¹Ka lungsim kitamzan a, ka nite tawp zo hi, kei adingin hankhuh a baisa-in a om hi.

²Mi zakote keima’ kimvelah om tahtah a, ei phinnate uh mit hla loin ka en ding hi.

³“Kei adingin nangma vankhapin hing kipie in; tuanah kei dinga ang kikham ding koi ahi ahei?

⁴Nang in a theitelna lungsim uh na khapieh hi, tua ahi ziehin nang in amate na guolzosah sih ding hi.

⁵Thaman a dei ziehin a guol a leheh mite- a tate uh’ mit in khuo mu lo ding hi.

⁶“Ama in kei pen mite’ thusie gentena ei suohsah a, mite in a mai vua a cilphit pa ukhu keima ka hi ta mawh hi.

⁷Ka dana lamin ka mit mang a, ka khut ka kengte niliep a bang ta hi.

⁸Thutang mite in tam thu ziehin lamdang a sa vua, Pasien thei lote tungah mawpengte a lungso uhi.

⁹Hizongle thumante in amau’ lampi a tukip vua, tuale khut siengtho nei amate a thahat tehteh uhi.

¹⁰Ahi vangin note na unpi-un tu-in hing peikia un, keima in note lahah mipil khat zong ka mu sih ding hi.

¹¹Ka nite lah a tawp zo ta a, ka gelnate zong maimangin, ka lungsim sunga ka lunggulte thelthang sieng zo hi.

¹²Amate in zan pen sun a suohsah vua; amate in, ‘Khuovah in miel neh ta,’ a ci uhi.[64]

¹³Ka inn bangin Misikhuo ka lamet a, miel lahah ka lupna pha leng,

¹⁴keima in Hankhuh kungah, ‘Nang ka pa na hi hi,’ ci-in, thante kungah, ‘Nang ka nu na hi hi,’ ahi sihle, ‘Ka sanggamnu na hi hi,’ va ci ta leng,

¹⁵ka kinepna hei-ah a om ta diei? Koi in ka kinepna a mu ta diei?

¹⁶Tami khu Misikhuo’ kotgolte-ah a kumsuh ding amah? Leivui lahah i peisuh ton diei mah?” a ci hi.