Read Zou JOB 19 Bible Online

JOB 19 - Zou bible

JOB 19

¹Tua ciengin Job in dawng a:

²“Note in bang tanvei ei bawlsie-in na kamteng utawh ei genpaat ding na hi uh ahei?

³Note in sawmvei tah nei hosie zo uhi; kei tunga na khielna uh na zum sih uh amah?

⁴A khiel tahpi ka hi leh zong ka khielna ka kipuoh ding ahi hi.

⁵Kei ei langpangin no le no na kitawisang vua, ka zalatna khu ka mawna zieh hi na ci uleh,

⁶Pasien in a khiel dinga ei sesa ahi lam le ka kimvelah a len tawh ei khu ahi lam thei un.

⁷‘Tatsietna,’ ci-in ka kiko cieng nangawnin ei kidawng sih a, ka hlat vapo vangin thuman-a thukhen mi om lo hi.

⁸Ama in nawtsuoh thei lo nadingin ka lampi a khah bing a, ka lampi khuo a mielsah hi.

⁹Ama in ka vang ei hawkhieh pieh a, ka lu panin kumpi lukhu ei lahpieh hi.

¹⁰Ama in a munmun panin ei satguoi a, kei ka mangthai ta hi, ama in sing phungkal bangin ka kinepna a phungkal sieng hi.

¹¹Ama in kei tungah a lungthahna kuontaw a, a galpa tawh a kibangin kei ei simtha hi.

¹²Kei ei sim dingin a galkapte ang kuon uhi; kei ei nan nadingin kulh[67] a cieng vua, ka buh kimvelah galphuol a sat uhi.

¹³“Ama in ka innpite tawh ei kigamlasah a, ama in ka meltheite zin a tangsah hi.

¹⁴Ka hieng ka sante le ka guolte in ei taisan sieng ta uhi;

¹⁵ka inna ang tung ngai ka zinte in ei mangngil bawl ta uhi. Ka tengta numeite in zong zin bangin ei ngaisun vua; amahaw’ muna-ah khuolmi khat ka suoh ta hi.

¹⁶Ka nasempa ka hlan a, ahi vangin ama in ei dawng lo hi; ama ka zol kul ding hi.

¹⁷Ka zinu in ka husan namsie sa a; ka innpite adingin ka kidahhuoi hi.

¹⁸Naupangnote nangawn in kei ei simmaw ta uhi; ka din popo ciengin amate in ei gensie vangiam uhi.

¹⁹Ka guol ngaite in ei huo vua, ei na it ngaite in zong ei langbawl ta uhi.

²⁰Ka satel le ka gute ka vunah a beh ta a, a hing lemlem ka hi tabo hi.

²¹No ka guolte aw, kei ei khuotuo un, kei ei khuotuo un, azieh pen Pasien’ khut in kei ei tham zieh ahi bo hi!

²²Pasien’ ei bawlsiet banga bang dinga nei genthei bawl vua, ka tahsa thuohna khu na lungkim nai vaset sih uh amah?

²³“Ka thugente lai-in kigiel hinlen, laibu khat sungah kigiel leh nuom sam vang e!

²⁴Hanawh peh tungah tua teng sekhu tawh kikhen hinlen, a om den dingin suong tungah kigiel leh ci sam ing e!

²⁵Bangzieh ahei cile keima in kei ei Tanpa[68] a hing ahi lam ka thei a, ama[69] in ni tawp ni ciengin leitung[70] ah keima ei dinpi ding hi, ci zong ka thei hi.

²⁶Tua bangin ka vun a kisiet zaw ciengin, ka tahsa-in[71] Pasien ka mu ta ding hi.[72]

²⁷Ka gei-a[73] Pasien khu ka mu ding a, ka mit in midang en loin ama ka en ding hi. Tuami khu ka ngahla sengin lung tawp dihdehin ka om hi!

²⁸Note in, ‘Ama bangci bawlsiet ding,’ na ci vua, ‘A thuzungpi ama kungah kimu hi,’ na ci uleh,

²⁹thangpaina in namsau tawh danpiehna hing tun ding ahi ziehin, tua namsau giing bo un. Tuaci’n thukhenna a op lamtah note in na thei ding uhi,” a ci hi.