Read Zou JOB 2 Bible Online

JOB 2 - Zou bible

JOB 2

¹Ni khat TOPA kungah van mite[3] a kilah dingin a tung vua, TOPA mai-a kilah dingin Satan[4] zong amate lahah a pei hi.

²TOPA in Satan kungah, “Nang hei pana hing pei na hiei?” a ci hi. Satan in TOPA kungah, “Leitungah ka vah kawikawi a, tunglam le neilam ka kawmna pana ang pei ka hi hi,” ci-in a dawng hi.

³TOPA in Satan kungah, “Ka nasem Job na phawh kha ngai ei mah? A nuol baang lo, a thutang, Pasien giingin sietna a pel ama tawh a kibang leitungah koima om lo hi,” a ci hi. A hang om lo pi-in ama suhsiet dinga kei nei hantawh vangin ama in a citahna a hlasuo nai deh sih hi,” a ci hi.

⁴Tua ciengin Satan in TOPA dawng a, “Vun tangin vun! Mite in amau’ hinna[5] a hutdam nadingin a neisa zosie uh a pie ding uhi.

⁵Ahi vangin tu-in na khut zah inlen, a gu le a telte va khoipieh lacin na maitang mama-ah hing gausam pai ta va” a ci hi.

⁶TOPA in Satan kungah, “Hoi pai lien e, ama nangma thu thu ahi ta hi; a hinna khat beh khawipieh in,” a ci hi.

⁷Tuaci’n TOPA kung panin Satan pusuoh a, Job a ketaw pan a luvum dongin a kidahhuoi hima a veisah hi.

⁸Job[6] in a kikhuot nading beelkeh khat la a, vut lahah a to hi.

⁹Tua ciengin a zi in ama kungah, “Na citahna tudet tentun lai ding na mah? Pasien gausam[7] inlen kisi ta ven,” a ci hi.

¹⁰Ahi vangin ama in a zi kungah, “Numei mawte kamham bangin na ham hi. Pasien kung panin a hoi sang hi vei, a sie zong i sang sih ding amah?” a ci hi.

¹¹Tu-in Job’ khanguol thum, Teman-te Eliphaz, Shuh mi Bildad, le Naamah mi Zophar-te in ama tunga a tung tam gimnate zosie a zah ciengun, a inn ciet panun ama hlai ding le henem dingin a kuon uhi.

¹²Amate in a gamla panin ama a galmu ciengun a thei pah ta sih vua, tuale amate in a aw uh sangsahin a gingin a kap uhi; amate in a puon uh a botkeh vua, a lu tung vua tukia dingin van lamah leivui a septo uhi.

¹³Amate in sun sagi le zan sagi sung tuol puongah ama a topi vua, tuale koima in ama kam khat beh a hopi ngam sih uhi, azieh pen ama’ thuohna a natsiet lamtah amate in a mu uhi.