Read Zou JOB 29 Bible Online

JOB 29 - Zou bible

JOB 29

¹Job in a thugen zomkia a:

²“Nidang hun Pasien ei cin lai bangin ka hinkhuo zilkia thei leng nuom sam vang e;

³ka lu tunga meivah a tan lai, khuomiel sunga ama’ khuovah tawh ka va lai;

⁴ka tangval thahat lai le ka buh sunga Pasien tawh ka kikhawl lai;

⁵Vanglienpa[109] kei tawh ang omton lai, ka kimvelah ka tate a op lai;

⁶bawngnawi-a ka keng ka sil lai-in, suongpi in kei adingin sathau tui bangin a pulsah hi!

⁷Khuopi tunkotah pei-in mihon opna munah ka to ciengin,

⁸ei mu khangnote in tona ei awn vua, khanghamte zong a na ding uhi;

⁹mi thupite a holim uh a khawl vua, a khut utawh a kam a hum uhi;

¹⁰miliente a sip dide vua, a dangtawng vuah a lei a behsah uhi.

¹¹Mite in a zah ciengun ei phat vua, ei mu ciengun ei thukimpi uhi.

¹²Bangzieh ahei cile mizawngte le panpi nei lo tagate a kiko ciengin ka hunkhie hi.

¹³Keima tungah mi lungkhamte’ thupha ang tung a, keima in meigongte lungnuomin la ka sasah hi.

¹⁴Puon bangin dihna ka sil a; ka thutanna pen puontuol le dielkhim tawh kibang hi.

¹⁵Mittawte adingin a mit uh ka hi a, khelbaite adingin a keng uh ka hi hi.

¹⁶Tasamte adingin a pa uh ka hi a, melmahte’ vai zong ka dinpi hi.

¹⁷Thuman lote’ ha ka suhtawngpieh a, a ha uh panin a sa neh uh ka khiehpieh hi.

¹⁸Tua ciengin, ‘Ka bu sunga a si dingin ka kingaisun a, ka nite zong senel[110] banga a tam dingin ka ngaisun hi;

¹⁹tui sungah ka huite zam a, zan tawn tungin ka bate tungah daitui a taa hi;

²⁰ka sungah ka vanglietna thasuo zing a, ka khuta thal zong a tha zing hi,’ ka ci hi.

²¹“Amate in ka thugen ngai-in ei ngah vua, sip dide-in ka thuhilna a ngai uhi.

²²Ka ham zaw ciengin a hamkia sih vua, ka thugente daitui bangin[111] amate tungah taasuh hi.

²³Amate in guotui nga bangin ei ngah vua; guo masa ngah bangin a kam a golkah uhi.

²⁴Lungmuonna a nei lo ciengun amate ka nuimai a; amate in ka maitaina a sumang sam sih uhi.[112]

²⁵Uhpipa bangin ka to a, a lampi uh ka teelpieh hi, tuale a galkapte lahah kumpi bangin ka teng a, kei pen a date a henem khat tawh ka kibang hi.