Read Zou JOB 32 Bible Online

JOB 32 - Zou bible

JOB 32

¹Tuaci’n ama kimuna-ah thuman kisa ahi ziehin tam mihing thumte in Job a dawng nawn sih uhi.

²Tua ciengin Ram innsung mi Buz-te Barachel’ tapa Elihu lungthah hi. Ama Job tungah lungthah hi, azieh pen Pasien sangin ama a kidihsahzaw hi;

³Job’ guolte thum tungah zong a lung thah hi; azieh pen amate in Job khiel hi, ci-in a pholah vangun a dawn nading a thei tuom sih uhi.

⁴Ama sangin amate a tazaw ahi ziehun tu-in Elihu in Job tawh kiho ding a ngahngah hi.

⁵Ahi vangin tam mi thumte in a dawn thei lo lam Elihu in a mu bepin ama lungthah hi.

⁶Buz mi Barachel’ tapa Elihu in dawng a: “Kei ka khangno lai-in, note khangham na hi ta uhi; tua ahi ziehin na kung vuah ka ngaisutnate kang pulah ding ka zum a, zong ka zau hi.

⁷Keima in, ‘Tehsie lamte in thu gen hinlen, kum tam lamte in pilna hil uheh,’ ka ci hi.

⁸Hinanle a mantahin mi sunga om hla khu Vanglienpa’[126] hu ahi a, tua in theitelna a piengsah hi.

⁹A khanghamte[127] a pil ahi sih a, thuman theite zong khanghamte ahi tuon sih hi.

¹⁰Tua ahi ziehin, ‘Ngai un; kei zong ka ngaisutna ei gensah un,’ ka ci hi.

¹¹“En un, na thugen uh ngai dingin ka na ngah a, gen ding na sui kawi lai-un, na pilkam gente uh ka ngai hi.

¹²Limtahin ka na ngai a, hinanle koima’n Job a niel zo sih a, note lahah a thugente a dawng thei koima a om sih hi.

¹³Ahi vangin, ‘Pilna mu zo ta ung; ama a dawng ding pen Pasien ahi a, mihing ahi sih hi,’ ci sih un.

¹⁴Kei ei kap nadingin thu a gen ngai sih a, note’ thugente tawh ama ka dawng sih ding hi.

¹⁵“Amate a ciza vua, bangma a dawng sih uhi; amate in gen ding kam khat zong a nei sih uhi.

¹⁶A ham lo ziehun ke’n amate ngahin, khuna a din ziehun dawng nawn lo ding ka mah?

¹⁷Kei zong kang dawng ding a, ka ngaitsutna zong ka pholah ding hi.

¹⁸Azieh pen gen ding a dimin ka nei hi; ka lungsim a ki-ip zo sih hi.

¹⁹Ka lungsim pen pawtna ding nei lo a kibilcip lenggazu tawh kibang hi; lenggazu thawlthate bangin a pawhkhe dihtah ka bang hi.

²⁰Ka thuoh zawh nadingin thu ka gen kul hi; ka kam kahin ka dawn kul hi.

²¹Koima guptuom le paituom ka nei sih ding a, koima ka maitangphat sih ding hi.

²²Azieh pen mi pawh dan ka thei sih a, pawh leng zong ei Siempa in ei sumang pai ding hi!