Read Zou JOB 39 Bible Online

JOB 39 - Zou bible

JOB 39

¹“Muol tunga sakelte suo hun na thei amah? Sakhi a no nei hun na vil amah?

²Hla bangza sung gai uh ahei ci sim thei-in, a suo hun ding uh na thei amah?

³A no suoh dingin lei-ah amate bawh a, a no nei lam uh na thei amah?

⁴A note a thakhauh vua, gamlahah khanglien uhi; amate a pusuoh vua, a pite kungah a kilekia nawn sih uhi.

⁵“Gam-laate koi in hla ahei? A kikhina khau koi in sut a,

⁶a inn ding uh gamgaw lah hisahin, a tenna uh citui gam hisah hi lo ka mah?

⁷Khuopi gamlumna a nuisan zieu lel vua, sakol leeng hawipa’ kikona awging a za sih uhi.

⁸Muoltangte tungah an a mai vua, hampa lohing zosie a sui kawikawi uhi.

⁹“Gam-bawngtang in nangma’ na a sem nuom amah? Zanlai-in na gankuong gei-ah a gieh ding amah?

¹⁰Tumakuoh ah khau tawh na khi thei amah? Ahi sihle na nua-a kuomte hlo ding amah?

¹¹A thahat ziehin ama tungah kingamin, ama tungah na nasep ap ding na hi amah?

¹²Na ancilna[150] ah na ante hing puo-in ang kilekia dingin na um amah?

¹³“A hlakui-ah a mul om sih nanle va-kalaohte in a hla hazapin a zap uhi.[151]

¹⁴Azieh pen a tuite lei lahah nuasie a, leitungah tuate a lumsah hi.

¹⁵Keng khatpo in tuonkeh kha va ci a phawh sih a, gamsa khat in tuon kha va ci zong a phawh sih hi.

¹⁶Ama-a’ ahi lo bang danin a note a huot bawl a, a tui a thah ziehin gimnate a mawhna suoh nanle a thuse sih hi.

¹⁷Bangzieh ahei cile Pasien in pilna nei loin ama bawl a, tuale theitelna zong ama a kipie sih hi.

¹⁸Ama in a lengto dingin a hla a zah ciengin sakol le a tunga tuongpa a nuisan zieu lel hi.

¹⁹“Nang in sakol na hatsah amah? Nang in sakol’ ngawngmul na posah amah?

²⁰Kauphe bangin na kitomsah amah? Ama’ nahsem ging pen zauhuoi mama hi.

²¹A cin tawh nahpi-in lei khuotin,[152] nasietahin lungdam kipah a, galte tawh kimu dingin a kuon hi.

²²Zauna kici nuisanin a lungkie sih a, namsau panin a kinuale sih hi.

²³Ama tunga om thalbawm khu kilawhin a ging a, teipi le teikhawte a te lihleh hi.

²⁴Ama in lungthahna le zauhuoina tawh lei valtum a, pengkul a kitum ciengin ama a omngim thei sih hi.

²⁵Pengkul a gin ciengin, Haha! ci-in a ham hi. A gamla panin gal gimnam za a, galkap bute’ husa le awgingte kiza hi.

²⁶“Na pilna ziehin mupi sanglenin, leitaw lamah a hla a zap amah?

²⁷Nang thupiehna tawh muvanlai sanglenin, a sangpi-ah bu a tom amah?

²⁸Suongpi tungah ama teng a, suong kuohawm lahah bu a bawl hi.

²⁹Khum panin a sa mat dingte buh a, a gamlapi panin a mit in a galmu hi.

³⁰A note in sisan a hup vua, gansi opna po-ah ama a om hi,” a ci hi.