Read Zou JOB 42 Bible Online

JOB 42 - Zou bible

JOB 42

¹Tua ciengin Job in TOPA dawng a:

²“Bangkim na bawl thei lam le na siltupte koima in a khaam thei lo lam ka thei hi.

³‘Theina loin koi in tam thuhilna phuoldap ahei? Tua ziehin ka theitel lo thute, ka thei lo le kei dinga a lamdang mama thute ka gen zo hi.

⁴‘Za in, kang gen ding hi; nang kang dong ding a, kei kungah nei gen ding hi,’ nei ci hi.

⁵Na thugente ka bilin ka na za ngai a, hinanle tu-in ka mit in ang mu ta hi;

⁶tua ahi ziehin kei le kei ka kisimmaw a, leivui le vut kinu-in ka kisia ta hi,” a ci hi.

⁷TOPA in tam thu zosie Job kungah a gen zaw ciengin, TOPA in Teman mi Eliphaz kungah: “Nang le na guol gel tungah ka lungthahna a kuong hi; azieh pen kei thu a manin na gen sih hi.

⁸Tua ahi tah ziehin tu-in bawngtang sagi le tuutang sagi kai-in ka nasempa Job kungah peipi unlen, noma dingin meihal biehna bawl un; tuale ka nasempa Job in note adingin ang thumpieh ding hi; azieh pen keima in note’ motna tawh kizui-in kang bawl sih ding hi; ama’ thungetna ka sang ding hi; bangzieh ahei cile note in Job’ gen bangin keima’ thu a manin na gen sih uhi,” a ci hi.

⁹Tuaci’n Teman mi Eliphaz le Shuh mi Bildad le Naamath mi Zophar pei-in TOPA in amate kunga a gen bangin a gamta vua, tuale TOPA in zong Job’ thungetna a sanpieh hi.

¹⁰Job in a guol thum teng adingin thu a ngetpieh zaw ciengin TOPA in Job citheisah kia hi; tuale Job tungah TOPA in nidanga a neisa a zani-in a piekia hi.

¹¹Tua ciengin ama kungah a sanggam numei pasal zosie le nidang lai-a a melthei teng zosie a haw vua, inn sungah ama tawh an a neton uhi; TOPA in ama tunga a tunsah sil hoi lo zosie ziehin ama hlasietpi-in a henem uhi; tuale amate in sum[164] pawlkhat le kham khutsip khat ciet a pie uhi.

¹²TOPA in a masa lam sangin a hun nukhia lamah Job thupha piezaw a, ama in tuu tulsawm le tulli, kalaoh tulguh, bawngtang kap tulkhat, le laa api tulkhat nei hi.

¹³Ama in tapa sagi le tanu thum nei hi.

¹⁴Ama in a tanu masa pen’ min Jemimah phuoh a, a nina pen Keziah hisahin a thumna nu’ min pen Keren-happuch phuoh hi.

¹⁵A gam sung zosie vuah Job’ tanute banga melhoi a om sih a, a sanggam pasalte tawh kibangin a pa un amate gamh a luosah hi.

¹⁶Tua zaw ciengin Job kum za le kum sawmli sung hing lai a, khangli cieng dong a ta, a tute le a tusawnte mu hi.

¹⁷Tuale Job a khan hlinin a vuoisi hi.