Read Zou JOB 6 Bible Online

JOB 6 - Zou bible

JOB 6

¹Tua ciengin Job in a dawng hi:

²“Ka lungbuoina khu te thei hi hinlen, ka tuosietna teng kitawite thei le izaw!

³Bangzieh ahei cile tua khu tuipi senel sangin a gihzaw ding hi; tua ahi ziehin ka kamhamte a khauh kha ta hi.

⁴Vanglienpa’[16] thaltang ka sungah om a; keima sungah a gu kidie hi; Pasien’ zauhuoinate in kei ei do dingin a kiguol uhi.

⁵Gam laate in lopa a neh ciengun hamin, ahi sihle bawngtang in butu a neh ciengin a awng amah?

⁶Ci saw loin antui lote kine thei a, aatui lamte sungah a tuina a om amah?[17]

⁷Tuate dugaw-in ka ciem nuom sih a; tuate pen a luohsuohuoi an tawh kibang lel hi.[18]

⁸“Ka ngetna khu kinga hinlen, Pasien in ka lunggul ei pie ding hi le maw.

⁹Pasien in keima ei mehcip nuom hinlen, ama in a khut hing hlasuhin ei that mai le izaw!

¹⁰Tami khu ka kihenepna ahi ding a; ka thuohna nangawnah nuomin ka kipah[19] ding hi; bangzieh ahei cile keima in Siengtho Pa’ thu ka niel sih hi.

¹¹Keima in ka nga thaw nadingin ka thahatna khu bang ahei? Ka lungduoi zawh nadingin a tawpna-a ka nga ding khu bang ahiei?

¹²Ka thahatna khu suong’ thahatna ahi a, ka tahsa khu sumngo thahatna ahi amah?

¹³A mantahin keima sungah huna ka nei sih a, panpi nget nading mi koima om lo hi.

¹⁴“A khanguol pa a khuotuo lote[20] in Vanglienpa[21] giin dan a thei sih hi.

¹⁵Luitui khang bangin ka guolte a zuoutat vua, a kangkia hawhtui luong bang le,

¹⁶tuikhal in a khahcip luitui le buon in a khucip vuakhal tui suoh bangin, amate a zuoutat uhi.

¹⁷Khuo lum hun ciengin tuate a zungmang sieng uhi; nisa in a kah ciengin a opna vuah a gawkang sieng zieu uhi.

¹⁸Amau’ lampi panin khuolzinte a piel vua; gamdai-ah amate peito-in a kisie uhi.

¹⁹Tema khuolzinte in tui a sui vua, Sheba khuolzinte a na kinem uhi.

²⁰A kimuon ziehun a lungkie vua; amate kungah tungin a cimaw uhi.

²¹Tu-in kei adingin nohaw tua bang lel na hi vua, ka tuosietna mu-in na zau uhi.

²²Keima in, ‘Letsong khat nei pie ding vuoi?’ ahi sihle ‘Na neisa panun guhgol nei pie ding vuoi?’

²³ahi sihle, ‘Ka langpa’ khut sung panin nei hundam ding vuoi?’ ahi sihle, ‘Mi bawlsiete’ khut sung panin nei tan ding vuoi?’ kang ci ngai amah?

²⁴“Ei hil inlen ka sip dide ding hi; bangci tatkhiel ka hei ci ei theisah in.

²⁵A thuman kammalte bangza tahin vanglien ahei! Ahi vangin nei phawsietna in bang a phatuomsah ngel ei?

²⁶Mi mawsietna kammalte tawh thu hil thei-a kingaisun na mah, a cimawte thu gen pen huipi lang bang hi lel lo amah?

²⁷Pa nei lote tung nangawnah ai na san vua, na khanguol pa zong na dehkang uhi.

²⁸“Hinanle tu-in kang thum hi, keima ei en un; bangzieh ahei cile na maitang vuah kei ka zuou vawt sih ding hi.

²⁹Kilekia un, kang thum hi, khielna kibawl da taheh. Tu-in hing kihei vawi un, ka dihna a zauhuoi dinmun a tung hi.

³⁰Ka hamkhiel bang om ahei? Ke’n ciemin tuosietna khen thei lo ding ka mah?