Read Zou JOB 7 Bible Online

JOB 7 - Zou bible

JOB 7

¹“Leitungah mihingte in na hamsa a sem vua, tuale amahaw’ nite zong khu a kiciel nasem pa-a’ bang hi lel lo amah?

²Ni hlim lunggul sila khat tawh kibang a, lawman san ding kal a ngahla nasemte tawh kibang hi.

³Tuaci’n a mawhna-in hla tampi ka om a, zan tampi lunggimna khu keima’ tanh ahi hi.

⁴Ka lup ciengin keima in, ‘Bang hunin ka tho diei?’ ka ci hi. Ahi vangin zan khuo a sawt a, zing khuovah dongin ka kilumlele hi.

⁵Thanlom le buonnawi in ka citung a tuom hi; ka vun naikulin hima naite zong a pawtkhie hi.

⁶Ka nite khu siemgante’ siemphei sangin gangzaw a, lametna om loin a mong tung paipai hi.[22]

⁷“Ka hinkhuo pen husankhat beh ahi lam ei phawh in; Ka mit in sil hoi kici a mukia ngai nawn sih ding hi.

⁸Ei na mukha ngai mit in ei mukia nawn lo ding hi; na mit tawh nei et laitahin kei ka mangthai ta ding hi.

⁹Meiilum kaite thengin a manthai bangin, Misikhuo-a peisuhte a katokia sih uhi;

¹⁰a inn vuah amate a kilekia ta sih vua, a munte un amate a thei kha nawn sih hi.

¹¹“Tua ziehin ka kam ka ki-ip sih ding hi; ka lungkham ziehin ka ham ding a, ka genthei ziehin ka phun ding hi.

¹²Nang in ei cing ding na koi nadingin kei, tuipi ganhing ahi sihle gulhiempi ka hi amah?

¹³“Lum leng nuom dawm vanin, kimu leng phatuom va,’ ka ci leh,

¹⁴mangsie nei mansah a, mangmunate mu-in nei zausisah hi,

¹⁵tuaci’n ka pumpi in a hici thuoh sangin ei kilawlmehin si leng ka nuomzaw hi.

¹⁶Ka hinkhuo ka cimtah ta a; kumtawna hing ding lah ka hi sih hi. Ka hinkhuo husan khat ahi bo ziehin ei hici opsah ta mai un.

¹⁷Tam za taha na thupi se ding le na lungsim sungah a gieh valia ding,

¹⁸zingmawng sielin vilin, a hun sima na ze-et dingin, mihingte bang hi lel ahei?

¹⁹Bakhat sung beh mit tuhna-in ei nei loin, ka cilval zaw dong beh ei hici opsah phot lo ding na mah?

²⁰Nang, mihingte encih pa aw, a khiel ka hi lezong nangma tungah bang pen gamta khiel ka hei? Bang dingin na muiciem dingin ei bawlin, bang dingin na vangih suoh laizang ka hei?

²¹Bang dingin ka tawnkhielna ei ngaidam loin, ka khielna ei lahpieh lo na hei? Tu-in lei lahah ka lum ding a, nei sui vangun ka om sih ding hi,” a ci hi.