Read Zou JOB 8 Bible Online

JOB 8 - Zou bible

JOB 8

¹Tua ciengin Shuh mi Bildad in dawng a:

²“Bang tanvei tam thute gengen ding na hi a, bang tanvei na kama na thu gente huipi lang bang ding ahei?

³Pasien in thutang a lehei amah? Ahi sihle Vanglienpa[23] in thudih a lepei amah?

⁴Ama’ langkhatah na tate in mawna a bawl uleh, ama in a khielna vanglietna sung vuah amate a pie ding hi.

⁵Pasien sui-in Vanglienpa tunga na thum a,

⁶siengtho-in na thudih po leh, ama in ang en valon ding a, ama in nangma’ mun ngai ma-ah ang koikia ding hi.

⁷Na kipatna khu thupi sih nanle, mailam-ah na thupi mama ding hi.

⁸“A tawpsa hunlui thute kantel inlen, a pu a pate uh’ na mukhiet thute ngaisun in;

⁹eite pen zani mi i hi bo ziehun bangma i thei sih uhi, bangzieh ahei cile i leitung hinkhuo khu ni hlim bang bep ahi bo hi.

¹⁰Amate in nang hing hilin, a thu hing genin, amau’ theitelna sung pana ang gen ding uh ahi sih amah?

¹¹“Cianawng a op lona-ah pumpeng[24] kung po thei ding amah? Tui op lona-ah pumpeng pung thei ding amah?

¹²Tuate a paa laitahin a kivat sih zongin adang kungte sangin vul baizaw hi.

¹³Pasien mangngilte’ lampi tua bang ahi hi; Pasien a thei lo mite’ kinepna tawpin mangthai uhi.

¹⁴Amau’ kimuonna khu vauzam ahi bo a, amau’ kingapna zong khu momthang ahi bo hi.

¹⁵A inn tungah mi khat kingam leh, tua inn in puo zo lo ding hi; a khut tawh mi khat in tu paupau leh tua pen kip zo lo ding hi.

¹⁶“Mi gilote nisa lahah a luhing [25]thei vua, umlai-ah a bamengte a zam hi.

¹⁷Suong kiciengte kimvelah a huite kiviel a, suongkawmte lahah tuate a teng uhi.[26]

¹⁸A mun panun amate kisusie leh, amate in a niel ding vua, ‘Ke’n nang kang mu ngai sih hi,’ ci ding uhi.

¹⁹En vawi, tamte khu amau’ nopsahna lampi ahi a, tuale adangte zong lei lah panin ang podawh lai ding hi.

²⁰“En in, Pasien in bangma cihin genbaang lo mipa nuol ngai lo ding a, gitlona a bawlte panpi lo ding hi.

²¹Ama in na kam dimdimin ang nuisah ding a, na kam tawh kipahin na awng vapo ding hi.

²²Nangma ang mudate maizumna puon kisilsah ding a, migilote’ puonbuh om nawn lo ding hi,” a ci hi.