Read Zou JOB 9 Bible Online

JOB 9 - Zou bible

JOB 9

¹Tua ciengin Job in dawng a:

²“Tua bang hi, ci ka thei tahtah ta hi; hinanle Pasien mai-ah mihing bangci dih thei ding ahei?

³Mi khat ama tawh a kisel nop leh, tua pa in tulkhat ah khatvei zong ama dawng thei lo ding hi.

⁴Ama pen a lungtang pil a, a tha zong a hat hi. Koi pen in ama do-in a guolzo ngel ahei?

⁵Muolte a khin pa ama pen amate in a thei vateh sih uhi, ama a lungthah ciengin amate a khup a thalin a tusah hi.

⁶Ama in ama’ opna panin leitung lawh a, a khuomte a kithingsah hi;

⁷ama in ni thupie a, tuale ni suoh lo hi; ama in aasite zong a humcip hi;

⁸ama beh in vanpi zah a, Tuipi[27] tuihuolte a tuoncil hi;

⁹ama pen Ngambawm, Zawlzawng Bawmluoi, le leitaw lam aasite a bawlpa ahi hi;

¹⁰ama in koima’ theitel zawh lo na lienpite bawl a, koima’ sim sieng zawh lo na lamdangte a bawl hi.

¹¹En in, ka kungah ang suoh a, ken ama ka mu sih hi; ama pei kawikawi a, hinanle ama ka thei thei sih hi.

¹²Ama in tawmang ta hi; koi in khahtan thei ding ahei? Ama kungah, ‘Bang bawl na hiei?’ koi in ci ding ahei?

¹³“Pasien in a lungthahna dawhkia lo ding hi; ama’ nei-ah Rahab panpite a kun uhi.

¹⁴Tua ahile ama bangci dawn thei-in, ama tawh ka kiho nadingin ka kammal bangci teel ding ka hei?

¹⁵Maw peng hinan leng ama ka dawng thei sih hi; keima ei mawsah pa[28] kungah hepi ding ka nget kul hi.

¹⁶Ama hlanin ei dawng nanle ka aw ei ngaipieh dingin ka um sih hi.

¹⁷Bangzieh ahei cile ama in huipi in ei mutpaisah a, ama in a thu omlo pi-in ka liemna khangsah hi;

¹⁸ama in ei naasah man sih ding a, lungkhamna tawh kei ei kidimsah hi.

¹⁹Thatanghat kidemna ding hi leh, ama a thahat ahi bo hi! Thutang kitu ding hi lei zong zumah koi in ama[29] va hlan zo ta ding ahei?

²⁰Kei a mawpeng hinan leng, ka kam in ei mawsah put ding hi; maw baang lo hinan leng zong, a letat ei hisah veve ding hi.

²¹Kei genbaang lo ka hi hi; kei le kei ka kithei sih a; ka hinkhuo ka kidah hi.

²²A unpi-in khat ahi hi; tua ahi ziehin ama in, genbaang lote le a gilote a nipi-in a susie hi, ka ci hi.

²³Tuosietna in thakhatin sina ang piensah ciengin, ama in a genbaang lote’ tuosietna[30] nuisan zieu lel hi.

²⁴Migilote’ khut sungah leitung kipie hi; ama in ama’ thukhente’ mit a humpieh hi. Tua khu ama ahi sihle a koi dang hi ding ahei?

²⁵“A tai mipa sangin ka nite gangzaw hi; tuate in na hoi mu loin a lengmang uhi.

²⁶Pumpeng gunkuong bangin a nawpei vua, muvanlai sa bawh tawh a kibang uhi.

²⁷‘Ka phunna ka mangngil ding hi; ka damai khelin kimaitaisah vang,’ ci zong nanleng,

²⁸ka gentheina teng giin citahin ka giing hi. Azieh pen nang in lah midihin nei bawl lo ding lam ka thei hi.

²⁹A maw tang ding veve ka hi hi; tuale bang dinga gimna ka ci thuoh laizang adiei?

³⁰Savan tawh kisilin tang-al tui tawh ka khut sawp sieng hi leng,

³¹nangma in ehdum sungah nei phum suh veve ding a, ka puonsil mama in zong keima ei kidah ta ding hi.

³²Azieh pen ama ka dawnkia thei nadingin ama kei bangin mihing ahi sih a, zumkong mang konga kihehpi thei ahi sih hi.

³³Koma gel tungah khut hlang ding mi a om sih a, koma gel kikalah phit-mut[31] ding mi koima a om sih hi.

³⁴Ama in kei kung panin ama’ ciengpum hing ladawh a, ama in ei lunghimaw sah nawn loin, ei zausah nawn sih leh,

³⁵tuaci’n kei zau loin ama ka hopi thei ding hi, bangzieh ahei cile ka kingaisut bang ka hi lo lam ka kithei ding hi.[32]