Read Zou LAPITE 101 Bible Online

LAPITE 101 - Zou bible

LAPITE 101

¹David’ phatna la khat. Keima in thumanna le thutanna la ka sa ding hi. TOPA aw, na tungah la kang sa ding hi.

²Keima in nuol baang lo lampi ka sin ding hi. Tua khu bang hunin nga ding ka hei? Lungsim citahna tawh ka inn sungah ka kalsuon ding hi;

³keima in kimanna nei lo na khat popo ka mitsuon sih ding hi. Lamkhielte’ nasepna ka muda hi; tua khu ka tungah a beh sih ding hi.

⁴A lungsim kawi mi kei tawh a kigamla ding hi; keima in sietna kici bangma ka thei sih ding hi.

⁵Keima in a vengpa a dap gensiet mipa ka susie ding hi. Kiphatsahna, kihisahna lungsim a nei mi ka thuoh zo sih ding hi.

⁶Gam sunga thuman mite kei tawh a ten thei nadingin, maipha ka pie ding hi; nuol baang loin a gamta poma in keima’ na a sem ding hi.

⁷Solna a zang mi poma ka inn sungah a om thei sih ding hi; zuouthu a gen poma ka opna-ah a om thei sih ding hi.

⁸Keima in zingmawng sielin gam sunga migilote zosie ka susie ding a, TOPA’ khuopi panin sietna a bawl mite zosie, ka sumaimang ding hi.