Read Zou LAPITE 102 Bible Online

LAPITE 102 - Zou bible

LAPITE 102

¹Gimna thuoh khat a thazawm ciengin TOPA mai-a a thumna le a ngetna. TOPA aw, ka thungetna ei za in; nangma tungah ka kikona hing tung taheh.

²Ka lunggim hun ciengin ka kung panin na mai phuol sin. Nangma in na bil ei ngat in; kang hlat ciengin mallangin ei dawng in.

³Bangzieh ahei cile ka nite meikhu bangin tawp a, ka gu ka tangte zong meikhuh bangin kavam hi.

⁴Ka lung a kham a, lopa bangin a vul hi; ka tha a zawmgawp a, an zong ka ne zo ta sih hi.

⁵A gingin ka tautauna ziehin ka gu guohin ka om ta hi.

⁶Senel gam sunga om simbu le ngalgawta lahah a om keising tawh ka kibang ta hi.

⁷Ka lup lai-in ka hah hi; innkhum dawna a tuomtuon va tawh ka kibang hi.

⁸Sunthapai-in ka galte in keima ei tawh uhi; kei ei simmawte in ka min samsietna-in zang uhi.

⁹Azieh pen keima in an-in vut ka ne a, na lungthahna le na thangpaina ziehin, ka tuidawnte hlitui tawh kihal hi; azieh pen nangma in nei domto a, nei paimang hi.

¹¹Ka hinkhuo nite ahile nitah lama a om nihlim tawh kibang a, lopa bangin ka vul hi.

¹²Ahi vangin TOPA aw, nang pen tawntung kumpi na hi hi; a khang khangin na min a kip peisuoh hi.

¹³Nangma tho-in Zion na hepi ding hi; bangzieh ahei cile nang in ama maipha na pieh ding hun ang tung ta ding hi; a kisesa hun ang tung ta hi.

¹⁴Azieh pen na nasemte in tua suongtumte a it uhi; tuale a leivuite tungah zong khuotuona a nei uhi.

¹⁵Minamte in TOPA’ min a zatah ding vua, leitung kumpi zosie in na minthanna a zatah ding uhi.

¹⁶Azieh pen TOPA in Zion khuopi a lam ding hi; tuale a minthanna tawh ama ang kilang ding hi.

¹⁷Ama in mi cimawte’ thungetna thupisim ding a, a thungetna uh a simmaw sih ding hi.

¹⁸A suoh nai lo mite in TOPA a phat thei nadingun, ang pieng lai ding khang mite adingin tam thu kiciemte taheh.

¹⁹TOPA a bie dingin mite le kumpi gamte a kaikhop ciengin, Zion ah TOPA’ min, Jerusalem ah ama phatna a pulah thei nadingun, thongkiete’ tauna a za ding le a si dinga kisate a hla dingin, TOPA in a siengtho ama’ mun sang panin ei ensuh a, vantung panin ama in leitung a ensuh hi.

²³Ama in ka khan a kimsuhin ka thahatna ei suhtanpieh hi; ama in ka hinkhuo nite zong ei tomsahpieh ta hi.

²⁴Keima in, “Khang tawntunga a kip ka Pasien aw, ka nuntah kimtanin kei ei la sin” ka ci hi.

²⁵Tanglai hunin nang in leitung bulpi na phut a, tuale vantungte na khut tawh na bawlsa ahi hi.

²⁶Amate mangthai ding a, hinanle nang na kip den hi; amate ahi ule puon bangin a siepaat ding uhi. Nangma in amate puon bangin na kheel a, amate a mangthai uhi;

²⁷ahi vangin nang na kibang den a, na kumte in mong a nei sih hi.

²⁸Na nasemte’ tate lungmuongin a teng ding uhi; nangma’ opna munah a suon a hlahte uh kisukip ding hi.