Read Zou LAPITE 104 Bible Online

LAPITE 104 - Zou bible

LAPITE 104

¹Ka hlagau aw, TOPA phat in. TOPA ka Pasien aw, nang na lien mama hi. Nangma in patawina le thupina na sil a,

²puon tawh tuom bangin khuovah sungah na kituom hi. Nangma in puonbuh bangin vantungte na zah a,

³nangma in tuite tungah na[212] innkhan zawlte hlungin, na[213] sakol leeng adingin meiipite na bawl a, huipi’ hlate tungah nangma na tuong hi.

⁴Nangma’[214] kamtai dingin huite na bawl a, nangma in mei le meikuongte na nasemte na hisah hi.

⁵Leitung a kilawh ngai nawn lo dingin a bulpite tungah na phut hi.

⁶Nang in puon tawh tuom bangin tui thuhpi tawh leitung na tuom hi; tuite in muolte a hlumto hi.

⁷Na hosiet ziehin tua tuite a tai uhi; vanto ging ziehin a taimang uhi.

⁸Muol tung dongah letto-in, muolkuom tengah luong a, amate adinga a kisesa mun-ah a luong uhi.

⁹Tua tuite in leitung tuomkia loin, a kantan lo nadingin gamgi na phupieh hi.

¹⁰Nangma in muolkuomte sungah tuisamte na pulsah hi; muol le muol kikalah tua tuite luong a,

¹¹gamsate’ dawn ding tui na pie hi; gamlah sakolte in zong tua khu dangta phatna-in a nei uhi.

¹²Tua luitui[215] gei-ah huilah vate a busa uhi; amate in singbate lahah zeila a awi uhi.

¹³A sangna mun na opna panin nangma in muolte tui na buoh hi; nangma’ nasepna ga tawh leitung a nuomsa hi.

¹⁴Ganhingte’ neh ding le mihingte’ zah dingin[216] lopa le ankungte na posah a, leitung panin an na piengsah hi.

¹⁵Mihing’ lungsim a nuomsah dingin zu, mai a zolsah ding sathau le mihing’ lungsim a hatsah dingin an na piengsah hi.

¹⁶TOPA’ singkungte, ama in Lebanon-a a suon taamtah singkungte in tui a kham mama uhi.

¹⁷Tuami singkungte tungah vate in bu a bawl uhi; gun vapi in taasingte lahah ama ading bu a nei hi.

¹⁸Muolsangte ahile gam sakelte ading ahi a, suongtumte zong khu bilpite adingin kibuhna ahi hi.

¹⁹Khuohun ciemte nadingin hlapi na bawl hi; ni in a tum hun ding thei hi.

²⁰Nang in khuomiel na bawl a, tua khu zan hun kici a, tua hun ciengin gamsa zosie pusuohin a gamta uhi.

²¹Sa man dingin humpi khanglaite a hawh uhi; amate in Pasien kung panin a an ding a sui uhi.

²²Ni a suo ciengin amate a gelmang vua, a kuo sung vuah a lum uhi.

²³Na sem dingin mite a kuon vua, tuale nitah dongin na a sem uhi.

²⁴TOPA aw, na silbawlte tam sam e izaw! Na pilna tawh tua zosie na bawl hi; na siemsa ganhingte leitung a dim hi.

²⁵A gal lama tuipi pen lienin zai a, tua sungah a bawhva hinna a nei ganhingte a lien a neu sim zawh loin a tam hi.

²⁶Tua tuipi tungah tembawte pei a, tua sunga guolnuom dingin na bawlsa Awle[217] a om hi.

²⁷A hun ciengin an na pieh ding ngahin tam teng zosie in nangma ang en uhi.

²⁸An na pieh ciengin amate in ang khawm uhi; na khut na zah ciengin, na hoinate tawh a kidim uhi.

²⁹Na maitang na phuol ciengin, amate a lungkie uhi; nang in a naahu uh na lah ciengin amate si-in leivui ah a peikia uhi.

³⁰Na hlagau[218] nang sawl ciengin, amate kipiengsah hi; nang in leitung maitang na siemthakia hi.

³¹TOPA’ minthanna kumtawnin kip den hinlen; ama’ nasepnate ah TOPA lungdam taheh.

³²Ama in leitung a et ciengin tua leitung kiling a, muolte a tham ciengin meikhu a pusuoh hi.

³³Keima ka hin laisie TOPA tungah la ka sa ding hi; ka hin sungin ka Pasien tungah phatna la ka sa ding hi.

³⁴TOPA sungah ka lungdam ziehin ka thu ngaituonate in ama lungkimsah taheh.

³⁵Leitung panin mawnei mite mangthai sieng hinlen, migilote om nawn sih heh. Ka hlagau aw, TOPA phat in. TOPA phat in!