Read Zou LAPITE 106 Bible Online

LAPITE 106 - Zou bible

LAPITE 106

¹TOPA phat un! TOPA tungah lungdam ko un; azieh pen ama hoi a, ama’ itna kip tawntung hi.

²TOPA’ nasepna lienpite koi in gen thei ding a, ama’ phatna zosie koi in pulah thei ding ahei?

³Thutangin na semin, huncin tengah dihna tawh a gamta zingte khu thupha nga ahi uhi.

⁴TOPA aw, na teelsa mite’ hauna ka mu thei nading, na minamte’ kipahna sungah keima ka lungkim thei nading, nangma gouluo sungah ka kisahthei nadingin, na mite maipha na pieh ni ciengin keima ei phawh inlen, amate na hutkhiet ciengin kei zong ei hu in.

⁵

⁶Ka pu ka pate ule kote ka ni-un ka maw zo ta uhi; khielna ka bawl zo ta vua, ka gitlo gamtat ta uhi.

⁷Egypt ah ka pu ka pate a op lai-un, amate in na nasepna lamdangte a ngaisun kha sih uhi; amate in a kicing na itna kip a na phawh kha sih vua, tuale mahin San Tuipi[222] ah Sangpen Pa[223] a na langpan uhi.

⁸Hinanle a lien mama ama’ vanglietna a kitheisah nadingin, ama’ min a khuolna tawh amate na hunkhie hi.

⁹Ama in San Tuipi[224] hosie a, tuale a kanggaw pai hi; senel gam kantan bangin ama in tuithuh kantanin amate a peipi hi.

¹⁰Tuaci’n ama in a langte’ khut sung panin amate hundam a, a galte’ khut sung panin zong amate hunkhie hi.

¹¹A langte uh tui in hlummang a, a suohta khat zong om lo hi.

¹²Tuaci’n amate in ama’ thugen a um uhi; amate in ama phatna la sa uhi.

¹³Ahi vangin amate in ama’ nasepte a mangngil pai uhi; amate in thukuppi dingin ama a ngah tuom sih uhi.

¹⁴Hinanle amate in gamlahah a dugawna uh ki-ip zo loin, senel gam sungah Pasien a ze-et uhi;

¹⁵ama in amau’ nget pen pie a, ahi vangin amate lahah gawngtam natna a tungsah hi.

¹⁶Amate in giephuol-a om Moses le TOPA’ mi siengtho Aaron a haza uhi.

¹⁷Lei kihongin Dathan valtum a, tuale Abiram pawlte zong lei in a vuamang hi.

¹⁸Amau’ pawl sungah mei zong kuong a, tua meikuong in migilote a katum hi.

¹⁹Amate in Horeb ah bawngno lim khat bawlin, a kisung tua milim a bie uhi.

²⁰Amate in Pasien’ minthanna[225] pen lopa a ne bawngtang lim tawh a khel uhi.

²¹Amate in Egypt gam sungah na lienpi a bawl, Ham gam sungah na lienpi a sem, San Tuipi ah a giinhuoi nate a bawl, a hundampa uh Pasien a mangngil ta uhi.

²²

²³Tua ahi ziehin ama in amate susie ding a, a susie ding ahi ama’ lungthahna panin a heikhie dingin a mai-ah ama’ teelpa Moses ding lo hi leh, amate ka susie ding hi, a ci hi.

²⁴Tuaci’n amate in tua gamnuom a simmaw vua, ama’ kamciemna a um sih uhi.

²⁵A puonbuh sung vuah amahaw a phuncieh vua, TOPA’ thugen a mang sih uhi.

²⁶Tua ziehin ama in a khut lamto-in, gamlahah amate a pua nadingun amate tungah kiciem a,

²⁷tuale minamte lahah a suonlehlahte uh kithezahin, leitung gam zosie-ah amate a thethang hi.

²⁸Tuaci’n amate in Peor-a Baal pasien a bel vua, misite dinga kithoina-a kipie sate a ne uhi.

²⁹Amahaw’ gamtatna tawh TOPA a lungthah sah vua, tuale amate lahah pul natna a tung hi.

³⁰Tuaci’n Phinehas dingin a thum pieh a, tuale pul natna a veng hi.

³¹Tua thu pen a khang khangin ama’ dihna-in kiciemte zing hi.

³²Meribah tui gei-ah amate in TOPA a lungthahsah vua, amate ziehin Moses in hahsatna a na thuohlaw hi;

³³amate in a hlagau a lungthahsah ziehun, ama in kamkhauh a na suo dawh ta hi.

³⁴TOPA’ thupieh bangin, amate in mite a that sih vua,

³⁵hinanle minamte tawh amate kisawhalin, amau’ gamtat banga gamtat ding a kisin uhi.

³⁶Amate adinga thang ahi, a milimte uh’ na a sem uhi.

³⁷Amate in dawite biehna-in a tapate ule a tanute uh a nei uhi.

³⁸Amate in Canaan gam milimte biehna-in mawna a nei lo a tanute ule a tapate uh’ sisan a luongsah vua, sisan tawh gam sung a buasah uhi.

³⁹Tua bang a sepnate un amate buasah a, a gamtatnate sung vuah amau le amau a kizua a suoh uhi.

⁴⁰Tua ciengin a mite tungah TOPA’ lungthahna kikuontaw a, tuale ama in a gouluo a kidah hi.

⁴¹Amate a muda mite in amate a uh thei nadingin, ama in minamte’ khut sungah amate a pie hi.

⁴²A galte un amate a bawlsie vua, tuale a khut nei vuah amate koi uhi.

⁴³Ama in tam veipi amate hunkhie a, ahi vangin amate in ledona lungsim a vom uhi, tuale amau’ khielna ziehin amate a kiniemkoi hi.

⁴⁴Tua bang hinanle zong amau’ kikona a zah ciengin, ama in a cimawna uh a don hi.

⁴⁵Amau’ vang tawh ama in a thuciemna a phawhkia a, a kicing ama’ itna kip dung zui-in khuotuona a lah hi.

⁴⁶Amate sala a man mi zosie in a hlasietpi za dong dingin ama in a piengsah hi.

⁴⁷TOPA aw, kote ei hun inlen, kote in na min siengtho tungah lungdam ka ko thei nading ule kote in na minthanna ka phat thei nadingun, minamte kung panin kote ei kaikhawm in.

⁴⁸TOPA Israel Pasien in a tawntung pan a tawntung dongin thupha nga taheh. Mi zosie in, “Amen” ci ta uheh. TOPA phat un!